ಲಂಡನ್: ಬ್ರಿಟನ್‌ನ ಐಕಾನಿಕ್ ಮೋಟಾರ್‌ಸೈಕಲ್ ಬ್ರ್ಯಾಂಡ್ ‘ನಾರ್ಟನ್’, ತನ್ನ ಬಹುನಿರೀಕ್ಷಿತ ಫ್ಲ್ಯಾಗ್‌ಶಿಪ್ ಸೂಪರ್‌ಬೈಕ್‌ನ ಮೊದಲ ಅಧಿಕೃತ ವಿನ್ಯಾಸದ ರೇಖಾಚಿತ್ರವನ್ನು (design sketch) ಅನಾವರಣಗೊಳಿಸಿದೆ. ಈ ಮೂಲಕ, ಬೈಕ್ ಜಗತ್ತಿನಲ್ಲಿ ಹೊಸ ಅಧ್ಯಾಯ ಬರೆಯಲು ಸಜ್ಜಾಗಿರುವ ತನ್ನ ‘ರಿಸರ್ಜೆನ್ಸ್’ (Resurgence) ಅಭಿಯಾನಕ್ಕೆ ಅಧಿಕೃತವಾಗಿ ಚಾಲನೆ ನೀಡಿದೆ.
ಭಾರತದ ಟಿವಿಎಸ್ ಮೋಟಾರ್ ಕಂಪನಿಯ ಮಾಲೀಕತ್ವದಲ್ಲಿರುವ ನಾರ್ಟನ್, ತನ್ನ ಸೊಲಿಹಲ್ ಪ್ರಧಾನ ಕಚೇರಿಯಲ್ಲಿ ಈ ಹೊಸ ವಿನ್ಯಾಸವನ್ನು ಬಿಡುಗಡೆ ಮಾಡಿದೆ. ನಾರ್ಟನ್‌ನ ವಿನ್ಯಾಸ ಮುಖ್ಯಸ್ಥರಾದ ಸೈಮನ್ ಸ್ಕಿನ್ನರ್ ಅವರು ರಚಿಸಿರುವ ಈ ರೇಖಾಚಿತ್ರವು, ಆಧುನಿಕ ವಿನ್ಯಾಸ ಭಾಷೆ ಮತ್ತು ಬ್ರ್ಯಾಂಡ್‌ನ ಹೊಸ ಗುರುತನ್ನು ಜಗತ್ತಿಗೆ ಪರಿಚGತ್ತಿದೆ.
ಗೆರ್ರಿ ಮೆಕ್‌ಗವರ್ನ್ ಮಾರ್ಗದರ್ಶನ
ಈ ಮಹತ್ವಾಕಾಂಕ್ಷೆಯ ‘ರಿಸರ್ಜೆನ್ಸ್’ ಅಭಿಯಾನದ ಭಾಗವಾಗಿ, ಜಾಗ್ವಾರ್ ಲ್ಯಾಂಡ್ ರೋವರ್‌ನಲ್ಲಿ ತಮ್ಮ ಸೃಜನಶೀಲ ನಾಯಕತ್ವಕ್ಕೆ ಹೆಸರುವಾಸಿಯಾದ ಪ್ರೊಫೆಸರ್ ಗೆರ್ರಿ ಮೆಕ್‌ಗವರ್ನ್ ಅವರನ್ನು ಮುಖ್ಯ ಸೃಜನಶೀಲ ಸಲಹೆಗಾರರಾಗಿ ನೇಮಿಸಲಾಗಿದೆ. ಅವರು ನಾರ್ಟನ್‌ನ ವಿನ್ಯಾಸ ತಂಡದೊಂದಿಗೆ ಸೇರಿ, ಬ್ರ್ಯಾಂಡ್‌ನ ಶ್ರೀಮಂತ ಬ್ರಿಟಿಷ್ ಪರಂಪರೆಯನ್ನು ಆಧುನಿಕ ವಿನ್ಯಾಸ ತತ್ವಗಳೊಂದಿಗೆ ಸಂಯೋಜಿಸಿ, ಹೊಸ ಪೀಳಿಗೆಯ ಮೋಟಾರ್‌ಸೈಕಲ್‌ಗಳನ್ನು ರೂಪಿಸಲಿದ್ದಾರೆ.
EICMA 2025ರಲ್ಲಿ ಪದಾರ್ಪಣ
ಈ ಹೊಸ ಸೂಪರ್‌ಬೈಕ್ ನೇತೃತ್ವದಲ್ಲಿ, ಸಂಪೂರ್ಣ ಹೊಸ ಶ್ರೇಣಿಯ ಮೋಟಾರ್‌ಸೈಕಲ್‌ಗಳು ಇದೇ ವರ್ಷ ಮಿಲಾನ್‌ನಲ್ಲಿ ನಡೆಯಲಿರುವ EICMA (ಅಂತರಾಷ್ಟ್ರೀಯ ಸೈಕಲ್ ಮತ್ತು ಮೋಟಾರ್‌ಸೈಕಲ್ ಪ್ರದರ್ಶನ) ದಲ್ಲಿ ಪದಾರ್ಪಣೆ ಮಾಡಲಿವೆ. ಈ ಹೊಸ ಮಾದರಿಗಳು ನಾರ್ಟನ್‌ನ ಪರಂಪರೆಗೆ ಧಕ್ಕೆಯಾಗದಂತೆ ಆಧುನಿಕ ವಿನ್ಯಾಸ ತತ್ವವನ್ನು ಅಳವಡಿಸಿಕೊಳ್ಳುವ ಗುರಿಯನ್ನು ಹೊಂದಿವೆ.
ಈ ಬಗ್ಗೆ ಮಾತನಾಡಿದ ಪ್ರೊಫೆಸರ್ ಮೆಕ್‌ಗವರ್ನ್, “ಆಧುನಿಕತೆ, ನಾವೀನ್ಯತೆ ಮತ್ತು ಐಷಾರಾಮಿ ಎಂಬ ಪದಗಳು ಕ್ಲಾಸಿಕ್ ಮೋಟಾರ್‌ಸೈಕಲ್ ಬ್ರ್ಯಾಂಡ್‌ಗಳ ಬಗ್ಗೆ ಯೋಚಿಸುವಾಗ ತಕ್ಷಣ ನೆನಪಿಗೆ ಬರುವುದಿಲ್ಲ. ಆದರೆ, ಮೋಟಾರ್‌ಸೈಕಲ್‌ಗಳು ಮತ್ತು ಕಾರುಗಳು ಭಾವನೆಗಳನ್ನು ಕೆರಳಿಸುವ ಸಾಮರ್ಥ್ಯವನ್ನು ಹಂಚಿಕೊಳ್ಳುತ್ತವೆ. ನಾರ್ಟನ್‌ನ ಶ್ರೀಮಂತ ಪರಂಪರೆಯು ಈ ಅವಕಾಶವನ್ನು ಆಕರ್ಷಕವಾಗಿಸಿದೆ,” ಎಂದರು.
ಟಿವಿಎಸ್‌ನ ಬೃಹತ್ ಹೂಡಿಕೆ
ಟಿವಿಎಸ್ ಮೋಟಾರ್ ಕಂಪನಿಯು ನಾರ್ಟನ್ ಬ್ರ್ಯಾಂಡ್ ಅನ್ನು ಪುನರುಜ್ಜೀವನಗೊಳಿಸಲು ಬದ್ಧವಾಗಿದ್ದು, ಈಗಾಗಲೇ 200 ಮಿಲಿಯನ್ ಪೌಂಡ್‌ಗಳಿಗಿಂತ ಹೆಚ್ಚು ಹೂಡಿಕೆ ಮಾಡಿದೆ. 2025ರ ಆರಂಭದಿಂದ ಕಂಪನಿಯ ಉದ್ಯೋಗಿಗಳ ಸಂಖ್ಯೆಯನ್ನು ಶೇಕಡ 25ರಷ್ಟು ಹೆಚ್ಚಿಸಲಾಗಿದೆ. ಇದು ಜಾಗತಿಕ ವಿಸ್ತರಣೆಯ ಹೊಸ ಯುಗಕ್ಕೆ ಕಂಪನಿಯನ್ನು ಸಿದ್ಧಪಡಿಸುತ್ತಿದೆ.
ನಾರ್ಟನ್‌ನ ವಿನ್ಯಾಸ ಮುಖ್ಯಸ್ಥ ಸೈಮನ್ ಸ್ಕಿನ್ನರ್, “ನಾವು ವಿನ್ಯಾಸಗೊಳಿಸಿರುವ ಮತ್ತು ನಮ್ಮ ಇಂಜಿನಿಯರಿಂಗ್ ತಂಡಗಳು ನಿಖರವಾಗಿ ಅಭಿವೃದ್ಧಿಪಡಿಸಿರುವ ಮೋಟಾರ್‌ಸೈಕಲ್‌ಗಳು ಜಗತ್ತನ್ನು ಬೆರಗುಗೊಳಿಸುವುದರಲ್ಲಿ ಮತ್ತು ಸಂತೋಷಪಡಿಸುವುದರಲ್ಲಿ ಸಂಶಯವಿಲ್ಲ. ಇಂದಿನ ರೇಖಾಚಿತ್ರವು ನಮ್ಮ ಶ್ರೀಮಂತ ಪರಂಪರೆಯನ್ನು ದಿಟ್ಟ ಭವಿಷ್ಯದೊಂದಿಗೆ ಬೆಸೆಯುವ ಮುಂಬರುವ ಬೈಕ್‌ಗಳ ಒಂದು ಸಣ್ಣ ಝಲಕ್ ಮಾತ್ರ,” ಎಂದು ಹೇಳಿದರು.
