ವಾಷಿಂಗ್ಟನ್: ಕಳೆದ 9 ತಿಂಗಳಿಂದ ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣ(ಐಎಸ್ಎಸ್)ದಲ್ಲಿ ಸಿಲುಕಿರುವ ಭಾರತೀಯ ಮೂಲದ ಗಗನಯಾತ್ರಿ ಸುನೀತಾ ವಿಲಿಯಮ್ಸ್(Sunita Williams) ಅವರು ಕೊನೆಗೂ ಭೂಮಿಗೆ ಮರಳುವ ಕಾಲ ಸನ್ನಿಹಿತವಾಗಿದೆ.
ಹಲವು ಬಾರಿಯ ವಿಳಂಬದ ಬಳಿಕ ಶುಕ್ರವಾರ ನಾಸಾ(NASA) ಮತ್ತು ಉದ್ಯಮಿ ಎಲಾನ್ ಮಸ್ಕ್(Elon Musk) ಅವರ ಸ್ಪೇಸ್ಎಕ್ಸ್ ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣಕ್ಕೆ (ಐಎಸ್ಎಸ್) ಹೊಸ ಸಿಬ್ಬಂದಿಯನ್ನು ಕಳುಹಿಸುವ ನಿಟ್ಟಿನಲ್ಲಿ ಬಾಹ್ಯಾಕಾಶ ನೌಕೆಯನ್ನು ಉಡಾವಣೆ ಮಾಡಿದೆ. ಈ ನೌಕೆಯು ಐಎಸ್ಎಸ್ ತಲುಪಿದ ಬಳಿಕ, ಅಲ್ಲಿರುವ ಗಗನಯಾತ್ರಿಗಳಾದ ಸುನೀತಾ ವಿಲಿಯಮ್ಸ್ ಮತ್ತು ಬುಚ್ ವಿಲ್ಮೋರ್ ರನ್ನು ಮರಳಿ ಭೂಮಿಗೆ ಕರೆತರಲಿದೆ. ಕ್ರೂ -10 ಯೋಜನೆಯಲ್ಲಿ ಡ್ರ್ಯಾಗನ್ ಬಾಹ್ಯಾಕಾಶ ನೌಕೆಯನ್ನು ಹೊತ್ತ ಫಾಲ್ಕನ್ 9 ರಾಕೆಟ್ ಶುಕ್ರವಾರ(ಭಾರತೀಯ ಕಾಲಮಾನ) ಬೆಳಿಗ್ಗೆ 4:33ಕ್ಕೆ ನಾಸಾದ ಕೆನಡಿ ಬಾಹ್ಯಾಕಾಶ ಕೇಂದ್ರದಿಂದ ಉಡಾವಣೆಯಾಯಿತು. ಇದು ಒಂಬತ್ತು ತಿಂಗಳ ಸುದೀರ್ಘ ಐಎಸ್ಎಸ್ ವಾಸದ ನಂತರ ಮನೆಗೆ ಮರಳುವ ಸುನೀತಾ ಹಾಗೂ ವಿಲ್ಮೋರ್ ಅವರ ಕನಸನ್ನು ಚಿಗುರಿಸಿದೆ. ಜೊತೆಗೆ ಇಬ್ಬರು ಗಗನಯಾತ್ರಿಗಳೂ ಆದಷ್ಟು ಬೇಗ ಸುರಕ್ಷಿತವಾಗಿ ವಾಪಸಾಗಲಿದೆ ಎಂದು ಕಾಯುತ್ತಿದ್ದವರಿಗೂ ನಿರಾಳತೆ ಒದಗಿಸಿದೆ.
ಈಗ ಉಡಾವಣೆಗೊಂಡಿರುವ ಡ್ರ್ಯಾಗನ್ ನಲ್ಲಿ ಅನ್ನೆ ಮೆಕ್ಲೈನ್ ಮತ್ತು ನಿಕೋಲ್ ಅಯರ್ಸ್, ಜಾಕ್ಸಾ (ಜಪಾನ್ ಏರೋಸ್ಪೇಸ್ ಎಕ್ಸ್‌ಪ್ಲೊರೇಷನ್ ಏಜೆನ್ಸಿ)ದ ಗಗನಯಾತ್ರಿ ಟಕುಯಾ ಒನಿಶಿ ಮತ್ತು ರೋಸ್ಕೋಸ್ಮೋಸ್ ಗಗನಯಾತ್ರಿ ಕಿರಿಲ್ ಪೆಸ್ಕೊವ್ ಐಎಸ್ಎಸ್‌ನತ್ತ ಪ್ರಯಾಣ ಬೆಳೆಸಿದ್ದಾರೆ.
ಕ್ರೂ -10 ಸ್ಪೇಸ್ಎಕ್ಸ್‌ನ ಮಾನವ ಬಾಹ್ಯಾಕಾಶ ಸಾಗಣೆ ವ್ಯವಸ್ಥೆಯ ಅಡಿಯಲ್ಲಿ 10ನೇ ಬಾರಿಗೆ ಭೂಮಿಯಲ್ಲಿನ ಗಗನಯಾತ್ರಿಗಳನ್ನು ಐಎಸ್‌ಎಸ್‌ಗೂ, ಐಎಸ್‌ಎಸ್‌ನಲ್ಲಿರುವ ಸಿಬ್ಬಂದಿಯನ್ನು ಭೂಮಿಗೂ ರೊಟೇಷನ್ ಆಧಾರದಲ್ಲಿ ಕರೆದೊಯ್ಯುವ, ಕರೆತರುವ ಕೆಲಸವನ್ನು ಮಾಡುತ್ತಿದೆ. ಜೊತೆಗೆ, ಡೆಮೊ -2 ಪರೀಕ್ಷಾ ಹಾರಾಟ ಸೇರಿದಂತೆ ನಾಸಾದ ಕಮರ್ಷಿಯಲ್ ಕ್ರೂ ಪ್ರೋಗ್ರಾಂ ಮೂಲಕ ಐಎಸ್ಎಸ್ ನಿಲ್ದಾಣಕ್ಕೆ ಸಿಬ್ಬಂದಿಯನ್ನು 11ನೇ ಬಾರಿಗೆ ಒಯ್ಯುತ್ತಿದೆ. ಗುರುವಾರವೇ ಫಾಲ್ಕನ್ 9 ರಾಕೆಟ್ ಉಡಾವಣೆಯಾಗಬೇಕಿತ್ತು. ಆದರೆ, ಗ್ರೌಂಡ್ ಸಪೋರ್ಟ್ ಕ್ಲಾಂಪ್ ಆರ್ಮ್ ನೊಂದಿಗೆ ಹೈಡ್ರಾಲಿಕ್ ಸಿಸ್ಟಮ್ ಸಮಸ್ಯೆ ಉಂಟಾದ ಕಾರಣ ಉಡಾವಣೆ ಮತ್ತಷ್ಟು ವಿಳಂಬವಾಯಿತು.
9 ತಿಂಗಳ ಸುದೀರ್ಘ ಐಎಸ್ಎಸ್ ವಾಸ್ತವ್ಯ
ನಾಸಾದ ಅನುಭವಿ ಗಗನಯಾತ್ರಿಗಳಾದ ಸುನೀತಾ ವಿಲಿಯಮ್ಸ್ ಮತ್ತು ಬುಚ್ ವಿಲ್ಮೋರ್ ಅವರು ಕಳೆದ ವರ್ಷ ಜೂನ್ ತಿಂಗಳಿಂದಲೂ ಐಎಸ್ಎಸ್ ನಲ್ಲಿ ಸಿಲುಕಿಕೊಂಡಿದ್ದಾರೆ. ಬೋಯಿಂಗ್ ಸ್ಟಾರ್ ಲೈನರ್ ಬಾಹ್ಯಾಕಾಶ ನೌಕೆಯಲ್ಲಿ ಅಲ್ಲಿಗೆ ತೆರಳಿದ್ದ ಅವರು, 8 ದಿನಗಳ ಕಾಲ ಬಾಹ್ಯಾಕಾಶದಲ್ಲಿ ಇರಬೇಕಿತ್ತು. ಆದರೆ, ಬೋಯಿಂಗ್ ನೌಕೆಯಲ್ಲಿ ತಾಂತ್ರಿಕ ದೋಷ ಕಂಡುಬಂದ ಕಾರಣ ಇಬ್ಬರು ಗಗನಯಾತ್ರಿಗಳೂ ಅನಿವಾರ್ಯವಾಗಿ ಐಎಸ್ಎಸ್ ನಲ್ಲೇ ಉಳಿಯಬೇಕಾಯಿತು. ಅವರನ್ನು ಕರೆತರಲು ಮಾಡಿದ ಹಲವು ಪ್ರಯತ್ನಗಳು ವಿಫಲವಾದವು. ಫೆಬ್ರವರಿಯಲ್ಲಿ ಅವರು ಮನೆಗೆ ಮರಳುತ್ತಾರೆಂದು ನಿರೀಕ್ಷೀಸಲಾಗಿತ್ತು. ಆದರೂ, ಅದೂ ಸಹ ವಿಳಂಬವಾಯಿತು. ಈಗ ಕ್ರ್ಯೂ-10 ಉಡಾವಣೆಯಾಗಿರುವ ಕಾರಣ, ಇನ್ನು ಕೆಲವೇ ದಿನಗಳಲ್ಲಿ ಸುನೀತಾ ಮತ್ತು ವಿಲ್ಮೋರ್ ಭೂಮಿಗೆ ಮರಳಲಿದ್ದಾರೆ ಎಂದು ನಾಸಾ ಹೇಳಿದೆ.
ರಾಜಕೀಯ ವಾಗ್ಯುದ್ಧ
ಸುನೀತಾ ಹಾಗೂ ವಿಲ್ಮೋರ್ ಅವರ ಐಎಸ್ಎಸ್ ವಾಸವು ಅಮೆರಿಕದಲ್ಲಿ ರಾಜಕೀಯ ವಾಗ್ಯುದ್ಧಕ್ಕೂ ಕಾರಣವಾಗಿತ್ತು. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಸ್ಪೇಸ್ಎಕ್ಸ್ ನೇತೃತ್ವ ವಹಿಸಿರುವ ಅವರ ಆಪ್ತ ಸಲಹೆಗಾರ ಎಲಾನ್ ಮಸ್ಕ್ ಅವರು ಅಮೆರಿಕದ ಮಾಜಿ ಅಧ್ಯಕ್ಷ ಜೋ ಬೈಡನ್ ಅವರು ಉದ್ದೇಶಪೂರ್ವಕವಾಗಿ ಗಗನಯಾತ್ರಿಕರನ್ನು ವಾಪಸ್ ಕರೆತಂದಿಲ್ಲ ಎಂದು ಆರೋಪಿಸಿದ್ದರು.
