ಬೆಂಗಳೂರು: ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ ಇತಿಹಾಸ ಪುಟಕ್ಕೆ ಸೇರಲು ಸಜ್ಜಾಗಿದೆ.
ಮೇ 15ರ ನಂತರ ಬಿಬಿಎಂಪಿ ನೆನಪಾಗಿ ಮಾತ್ರ ಉಳಿಯಲಿದೆ. ರಾಜಧಾನಿ ಬೆಂಗಳೂರಿನ ಆಡಳಿತದ ಚಿತ್ರಣದಲ್ಲೇ ಭಾರೀ ಬದಲಾವಣೆಯೊಂದು ಆಗಲಿದೆ. ಪಾಲಿಕೆಯ ಎಲ್ಲ ಕಾರ್ಯ, ಕೆಲಸಗಳು ಇನ್ನೂ ಮುಂದೆ ಗ್ರೇಟರ್ ಬೆಂಗಳೂರು ಹೆಸರಿನಲ್ಲಿ ನಡೆಯಲಿವೆ.
ಬಿಬಿಎಂಪಿ ಹೆಸರು ವಿಸರ್ಜನೆ ಮಾಡಿ ರಾಜ್ಯ ಸರ್ಕಾರದಿಂದ ಗ್ರೇಟರ್ ಬೆಂಗಳೂರು ಅಥಾರಿಟಿ ಅಂತ ನಾಮಕರಣ ಮಾಡಲಾಗಿದೆ. ಹೀಗಾಗಿ ಮೇ 14 ರ ನಂತರ ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ ಅಸ್ತಿತ್ವ ಕಳೆದುಕೊಳ್ಳಲಿದೆ. ಮೇ 15 ರಿಂದ ಬಿಬಿಎಂಪಿಯ ಹೆಸರು-ಸ್ವರೂಪದಲ್ಲಿ ಭಾರೀ ರೂಪಾಂತರವಾಗಲಿದೆ. ಅಂದೇ ಹೊಸ ಆಡಳಿತ ಆರಂಭವಾಗಲಿದೆ. ಮೇ 15ರ ನಂತರ ಬಿಬಿಎಂಪಿ ಅಸ್ತಿತ್ವದಲ್ಲಿ ಇರುವುದಿಲ್ಲ. ಅಂದಿನಿಂದಲೇ ಜಿಬಿಎ ಅಸ್ತಿತ್ವಕ್ಕೆ ಬರಲಿದೆ. ಮೇ 15ರಿಂದ ಬಿಬಿಎಂಪಿ ಮುಖ್ಯ ಆಯುಕ್ತರು ಗ್ರೇಟರ್ ಬೆಂಗಳೂರು ಮುಖ್ಯ ಆಯುಕ್ತರಾಗುತ್ತಾರೆ.
ಗ್ರೇಟರ್ ಬೆಂಗಳೂರು ಕಾಯ್ದೆ-2024 ಜಾರಿಗೆ ಬರಲಿದೆ. ಗ್ರೇಟರ್ ಬೆಂಗಳೂರು ಪ್ರದೇಶಕ್ಕೆ ಆಡಳಿತಾಧಿಕಾರಿ ನೇಮಕಗೊಳ್ಳಲಿದ್ದಾರೆ. ಜಿಬಿಎ ರಾಜ್ಯದ ಅತೀ ದೊಡ್ಡ ಸ್ಥಳೀಯ ಸರ್ಕಾರವಾಗಲಿದೆ. ಗ್ರೇಟರ್ ಬೆಂಗಳೂರು ಪ್ರಾಧಿಕಾರ’ (ಜಿಬಿಎ)ಕ್ಕೆ ಮುಖ್ಯಮಂತ್ರಿಗಳೇ ಅಧ್ಯಕ್ಷರಾಗಿರುತ್ತಾರೆ. ಬೆಂಗಳೂರು ಅಭಿವೃದ್ಧಿ ಸಚಿವರೇ ಜಿಬಿಎ ನ ಉಪಾಧ್ಯಕ್ಷರಾಗಿರುತ್ತಾರೆ. ಸದ್ಯ ಪಾಲಿಕೆಯ ಹಳೆಯ 225 ವಾರ್ಡ್ ಗಳು ಮಾತ್ರ ಜಿಬಿಎ ವ್ಯಾಪ್ತಿಗೆ ಬರುತ್ತವೆ. ನಂತರ ಸರ್ಕಾರದ ಅದೇಶ ಬಂದ ನಂತರ ಉಳಿದ ಗ್ರಾಮಗಳು ಸೇರ್ಪಡೆ ಅಗಿ ನಂತರ ಅವುಗಳನ್ನು ಜಿಬಿಎ ವ್ಯಾಪ್ತಿಗೆ ಒಳಪಡಿಸಲಾಗುತ್ತದೆ. ಈಗ ಇರುವ ಪಾಲಿಕೆ ಬೋರ್ಡ್ ಗಳ ಬದಲಾಗಿ ಹೊಸ ಗ್ರೇಟರ್ ಬೆಂಗಳೂರು ಅಂತ ಬೋರ್ಡ್ ಗಳು ಬರುತ್ತವೆ.
