ಅಪ್ಪನಿಗೆ ವಂಶೋದ್ಧಾರಕ ಬೇಕಿತ್ತು. ಅಮ್ಮನಿಗೆ ಮಗಳಾದರೂ ಸರಿ, ಮಗನಾದರೂ ಸರಿ, ನಮ್ಮ ಮನೆ ಬೆಳಗಿದರೆ ಸಾಕು ಎಂಬ ಮನೋಭಾವ ಇತ್ತು. ಆದರೆ, 1988ರಲ್ಲಿ ವಿಧಿಯ ಆಟವೇ ಬೇರೆಯಾಗಿತ್ತು. ಮನೆಗೆ ಮುದ್ದಾದ ಮಗಳ ಪ್ರವೇಶವಾಗಿತ್ತು. ಆದರೆ, ಅಪ್ಪ ಮೊಂಡಾಟ ತೆಗೆದ. ನನಗೆ ಗಂಡು ಮಗುವೇ ಬೇಕಿತ್ತು ಎಂದು ಹೇಳಿದ. ಕೊನೆಗೆ ಹೆಂಡತಿಗೆ ವಿಚ್ಛೇದನ ನೀಡಿದ. ಮಹಿಳೆಯು ಒಂಟಿಯಾಗಿದ್ದುಕೊಂಡೇ ಮಗಳನ್ನು ಸಾಕಿದಳು. ಚೆನ್ನಾಗಿ ಓದಿಸಿದಳು. ಆ ಮುದ್ದಾದ ಮಗಳೇ ಈಗ ಕಷ್ಟಪಟ್ಟು ಓದಿ ಐಎಎಸ್ ಅಧಿಕಾರಿಯಾಗಿದ್ದಾಳೆ. ದೂರವಾದ ಅಪ್ಪನೇ ಪಶ್ಚಾತ್ತಾಪ ಪಡುವಂತೆ ಮಾಡಿದ್ದಾಳೆ.
ಇದು ದಿಲ್ಲಿಯ ಸೃಷ್ಟಿ ದಾಬಸ್ ರೋಚಕ ಸ್ಟೋರಿ
ಅಮ್ಮನ ಶ್ರಮ, ತ್ಯಾಗಕ್ಕೆ ಪ್ರತಿಫಲ ನೀಡಿದ ಸೃಷ್ಟಿ
ಕಷ್ಟಪಟ್ಟು ಓದಿ ಈಗ ಐಎಎಸ್ ಅಧಿಕಾರಿ
ಹೌದು, 1998ರಲ್ಲಿ ದಿಲ್ಲಿಯಲ್ಲಿ ಜನಿಸಿದ ಸೃಷ್ಟಿ ದಾಬಸ್, ತಾಯಿಯ ಮಡಿಲಿನಲ್ಲಿ ಬೆಳೆದವಳು. ಅಪ್ಪನ ಪ್ರೀತಿಯನ್ನೇ ಕಾಣದೆ, ತಾಯಿಯ ಶ್ರಮವನ್ನು ಗಮನಿಸಿ, ತಾನೂ ಓದಿ, ಭವಿಷ್ಯ ರೂಪಿಸಿಕೊಳ್ಳಬೇಕು ಎಂದು ಹಠ ತೊಟ್ಟವಳು. ದೇವರು ಈಕೆಯ ಶ್ರಮಕ್ಕೆ ಪ್ರತಿಫಲ ನೀಡಿದ್ದು, 2023ರಲ್ಲಿ ನಡೆದ ಐಎಎಸ್ ಪರೀಕ್ಷೆಯಲ್ಲಿ ದೇಶಕ್ಕೇ 6ನೇ ರ್ಯಾಂಕ್ ಪಡೆಯುವ ಮೂಲಕ ಅಭೂತಪೂರ್ವ ಸಾಧನೆ ಮಾಡಿದ್ದಾರೆ. ಇವರ ಸಾಧನೆಯನ್ನೀಗ ಎಲ್ಲರೂ ಕೊಂಡಾಡುತ್ತಿದ್ದಾರೆ.
ಬಾಲ್ಯದಿಂದಲೇ ಸೃಷ್ಟಿ ದಾಬಸ್ ಜಾಣೆ
ಪಿಯುಸಿಯಲ್ಲಿ 93% ಅಂಕ ಪಡೆದು ಮುನ್ನಡೆ
ಎಂಎ ಪಡೆದು ಆರ್ ಬಿಐನಲ್ಲಿ ಕೆಲಸ ಪಡೆದ ದಿಟ್ಟೆ
ಗ್ರಾಫಿಕ್ಸ್ ಔಟ್…
ಅಮ್ಮನ ಕಷ್ಟದ ದಿನಗಳನ್ನು ನೋಡಿಕೊಂಡೇ ಬೆಳೆದ ಸೃಷ್ಟಿ ದಾಬಸ್, ಬಾಲ್ಯದಿಂದಲೇ ಚೆನ್ನಾಗಿ ಓದುತ್ತಿದ್ದರು. ಕ್ಲಾಸ್ ನಲ್ಲಿ ಎಲ್ಲರಿಗಿಂತ ಮೊದಲು ಬರುತ್ತಿದ್ದರು. ಇದೇ ಕಾರಣಕ್ಕೆ ಅವರು ಪಿಯುಸಿಯಲ್ಲಿ ಶೇ.93ರಷ್ಟು ಅಂಕ ಪಡೆದು ತಾನು ಪ್ರತಿಭಾವಂತೆ ಎಂಬುದನ್ನು ನಿರೂಪಿಸಿದರು. ಬಿಎ, ಎಂಎ ಪಾಸಾದ ಬಳಿಕ ತಾಯಿಗೆ ಆಸರೆಯಾಗಲು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾದಕ್ಕೆ ಕೆಲಸಕ್ಕೆ ಸೇರಿದರು. ಆದರೆ, ಐಎಎಸ್ ಅಧಿಕಾರಿಯಾಗಬೇಕು ಎಂಬ ಛಲವನ್ನು ಮಾತ್ರ ಅವರು ಬಿಟ್ಟಿರಲಿಲ್ಲ.
RBI ಅಧಿಕಾರಿಯಾದರೂ ಛಲ ಬಿಡದ ಸೃಷ್ಟಿ
ರಾತ್ರಿ ಕೆಲಸ, ಹಗಲು ಓದುವುದೇ ಇವರ ದಿನಚರಿ
ಇದೆಲ್ಲದರ ಫಲವಾಗಿ ಐಎಎಸ್ ಸಾಧನೆ
ಹಾಗೆ ನೋಡಿದರೆ, ಸೃಷ್ಟಿ ದಾಬಸ್ ವೃತ್ತಿಜೀವನ ಕಂಡುಕೊಂಡಿದ್ದರು. ಆರ್ ಬಿಐನಲ್ಲಿ ಒಳ್ಳೆಯ ಸಂಬಳವೇ ಸಿಗುತ್ತಿತ್ತು. ಆದರೆ, ಐಎಎಸ್ ಅಧಿಕಾರಿಯಾಗಬೇಕು ಎಂಬ ಹಂಬಲ ಅವರನ್ನು ಕಾಡುತ್ತಲೇ ಇತ್ತು. ಹಾಗಾಗಿ, ಅವರು ಆರ್ ಬಿಐನಲ್ಲಿ ನೈಟ್ ಶಿಫ್ಟ್ ಕೆಲಸ ಮಾಡುತ್ತಿದ್ದರು. ಇವರು ಕೇಂದ್ರೀಯ ಬ್ಯಾಂಕಿನಲ್ಲಿ ಗ್ರೇಡ್ 2 ಎಚ್ ಆರ್ ಆಗಿ ಕೆಲಸ ಮಾಡುತ್ತಿದ್ದರು. ಆದರೆ, ಹಗಲು ಶಿಸ್ತಿನಿಂದ ಓದುತ್ತಿದ್ದರು. ಸತತ ಅಧ್ಯಯನದ ಬಳಿಕ ಈಗ ಸೃಷ್ಟಿ ದಾಬಸ್ ಅವರು ಐಎಎಸ್ ಅಧಿಕಾರಿಯಾಗಿದ್ದಾರೆ. ಆ ಮೂಲಕ ಪ್ರತಿಯೊಬ್ಬರಿಗೂ ಸ್ಫೂರ್ತಿಯ ಚಿಲುಮೆಯಾಗಿದ್ದಾರೆ.
ಬ್ಯೂಟಿ ವಿತ್ ಬ್ರೇನ್ ಎಂಬುದಕ್ಕೆ ಸೃಷ್ಟಿಯೇ ಸಾಕ್ಷಿ
ಯಶಸ್ಸಿನ ಶ್ರೇಯಸ್ಸನ್ನು ಅಮ್ಮನಿಗೆ ನೀಡಿದ ಮಗಳು
ಅನ್ಯಾಯ ಸರಿಪಡಿಸುವ ಪಣತೊಟ್ಟಿರುವ ಸೃಷ್ಟಿ
“ನನ್ನ ಅಮ್ಮ ಈಗ ನನ್ನ ಬಗ್ಗೆ ಹೆಮ್ಮೆಪಡುತ್ತಿದ್ದಾರೆ. ಅವರು ಪಟ್ಟ ಶ್ರಮದ ಮುಂದೆ ನನ್ನ ಸಾಧನೆ ಏನೂ ಅಲ್ಲ. ಆದರೂ, ಅಮ್ಮ ಈಗ ಹೆಮ್ಮೆಯಿಂದ ತಿರುಗಾಡುವುದನ್ನು ನೋಡುವುದೇ ನನಗೆ ಖುಷಿ. ನನ್ನ ಬಾಲ್ಯ ಕಹಿ ನೆನಪುಗಳು ಏನೇ ಇರಲಿ, ಅವೆಲ್ಲವನ್ನೂ ಮೆಟ್ಟಿ ಸಮಾಜದ ಅನ್ಯಾಯವನ್ನು ಸರಿಪಡಿಸುವುದೇ ನನ್ನ ಗುರಿ” ಎಂದು ಹೇಳುತ್ತಾರೆ ಸೃಷ್ಟಿ ದಾಬಸ್.
ತಂದೆ ಇದ್ದರೂ ಇಲ್ಲದಂತಿರುವ ಅದೆಷ್ಟೋ ಹೆಣ್ಣುಮಕ್ಕಳಿದ್ದಾರೆ. ತಾಯಿಯ ಪ್ರೀತಿಯಲ್ಲಿ ಮಾತ್ರ ಜೀವನ ಕಳೆಯುವ, ಶ್ರಮಿಸುವ ಯುವತಿಯರಿದ್ದಾರೆ. ಆದರೆ, ತಂದೆಯೇ ಇಲ್ಲದೆ, ತಾಯಿಯ ಪ್ರೀತಿ, ನೆರಳಲ್ಲಿದ್ದೂ ಪ್ರತಿಯೊಬ್ಬರೂ ಹೆಮ್ಮೆಪಡುವಂತಹ ಸಾಧನೆ ಮಾಡಬಹುದು ಎಂಬುದಕ್ಕೆ ಸೃಷ್ಟಿ ದಾಬಸ್ ಅವರೇ ನಿದರ್ಶನವಾಗಿದ್ದಾರೆ. ನಮ್ಮ ನಡುವೆ ಇದ್ದು, ನಾವೂ ಹೆಮ್ಮೆಪಡುವಂತೆ ಸಾಧನೆ ಮಾಡುವ ಸೃಷ್ಟಿಯಂತಹ ದಿಟ್ಟ ನಾರಿಯರ ಸಂಖ್ಯೆ ಇನ್ನೂ ಹೆಚ್ಚಾಗಲಿ.
