ಭಾರತದ ರಫ್ತಿನಲ್ಲಿ ಸ್ಮಾರ್ಟ್ ಫೋನ್ ಕಿಂಗ್!

ಸ್ಮಾರ್ಟ್ ಫೋನ್ ಉತ್ಪಾದನೆಯಲ್ಲಿ ಜಗತ್ತಿನಲ್ಲೇ ಭಾರತ ಮುನ್ನಡೆ ಸಾಧಿಸಿದೆ. ಇದೇ ಕಾರಣಕ್ಕಾಗಿ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅಸಮಾಧಾನದ ಮಧ್ಯೆಯೂ ಆ್ಯಪಲ್ ಕಂಪನಿಯು ಭಾರತದಲ್ಲೇ ಐಫೋನ್ ಗಳನ್ನು ಉತ್ಪಾದನೆ ಮಾಡುತ್ತಿದೆ. ಸ್ಯಾಮ್ ಸಂಗ್ ಸೇರಿ ದೊಡ್ಡ ದೊಡ್ಡ ಕಂಪನಿಗಳ ಘಟಕಗಳು ಭಾರತದಲ್ಲೇ ಇವೆ. ಇದೆಲ್ಲ ಕಾರಣದಿಂದಾಗಿ, ಭಾರತ ರಫ್ತು ಮಾಡುವ ಪ್ರಮುಖ ಉತ್ಪನ್ನಗಳಲ್ಲಿ ಸ್ಮಾರ್ಟ್ ಫೋನ್ ಈಗ ಅಗ್ರಸ್ಥಾನಕ್ಕೇರಿದೆ.

ರಫ್ತಿನಲ್ಲಿ ಅಗ್ರಸ್ಥಾನ ಪಡೆದ ಸ್ಮಾರ್ಟ್ ಫೋನ್ಸ್
ಪೆಟ್ರೋಲಿಯಂ ಉತ್ಪನ್ನಗಳನ್ನೂ ಹಿಂದಿಕ್ಕಿ ಸಾಧನೆ
ವಜ್ರದ ಉತ್ಪನ್ನಗಳನ್ನೇ ಮೀರಿಸಿದ ಸ್ಮಾರ್ಟ್ ಫೋನ್ಸ್

ಹೌದು, ಭಾರತ ರಫ್ತು ಮಾಡುವ ಉತ್ಪನ್ನಗಳಲ್ಲಿಇದುವರೆಗೆ ಪೆಟ್ರೋಲಿಯಂ ಉತ್ಪನ್ನಗಳು ಹಾಗೂ ವಜ್ರಗಳು ಅಗ್ರ ಸ್ಥಾನ ಪಡೆದಿದ್ದವು. ಆದರೆ, 2024-25ನೇ ಹಣಕಾಸು ವರ್ಷದಲ್ಲಿ ಸ್ಮಾರ್ಟ್ ಫೋನ್ ಗಳು ಭಾರತ ರಫ್ತು ಮಾಡುವ ಉತ್ಪನ್ನಗಳಲ್ಲಿ ಮೊದಲ ಸ್ಥಾನ ಪಡೆದಿವೆ. ಇದರೊಂದಿಗೆ ಜಗತ್ತಿನಲ್ಲೇ ಭಾರತವು ಸ್ಮಾರ್ಟ್ ಫೋನ್ ಗಳ ರಫ್ತಿನಲ್ಲಿ ಭಾರಿ ಮುನ್ನಡೆ ಸಾಧಿಸಿದಂತಾಗಿದೆ.

ಒಂದೇ ವರ್ಷದಲ್ಲಿ ರಫ್ತು 55% ಏರಿಕೆ
2.07 ಲಕ್ಷ ಕೋಟಿ ರೂ. ಮೌಲ್ಯದ ರಫ್ತು ಸಾಧನೆ
2 ವರ್ಷಗಳಲ್ಲೇ ರಫ್ತಿನ ಚಿತ್ರಣ ಬದಲು

ಭಾರತದಿಂದ 2024-25ನೇ ಸಾಲಿನಲ್ಲಿ2.07 ಲಕ್ಷ ಕೋಟಿ ರೂ. ಮೌಲ್ಯದ ಸ್ಮಾರ್ಟ್ ಫೋನ್ ಗಳನ್ನು ರಫ್ತು ಮಾಡಲಾಗಿದೆ. 2023-24ನೇ ಸಾಲಿನಲ್ಲಿ1.33 ಲಕ್ಷ ಕೋಟಿ ರೂ. ಮೌಲ್ಯದ ಸ್ಮಾರ್ಟ್ ಫೋನ್ ಗಳನ್ನು ರಫ್ತು ಮಾಡಲಾಗಿತ್ತು. ಒಂದು ಹಣಕಾಸು ವರ್ಷದಲ್ಲಿಸ್ಮಾರ್ಟ್ ಫೋನ್ ಗಳ ರಫ್ತು ಪ್ರಮಾಣವು ಶೇ.55ರಷ್ಟು ಏರಿಕೆಯಾಗಿರುವುದು ಗಮನಾರ್ಹ ಸಂಗತಿಯಾಗಿದೆ ಎಂದು ಕೇಂದ್ರ ಸರಕಾರವೇ ಮಾಹಿತಿ ನೀಡಿದೆ. 2022-23ರಲ್ಲಿ 94 ಸಾವಿರ ಕೋಟಿ ರೂ. ಮೌಲ್ಯದ ರಫ್ತು ಈಗ 2 ಲಕ್ಷ ಕೋಟಿ ರೂ. ದಾಟಿರುವುದು ಸಾಧನೆ ಎಂದೇ ಹೇಳಲಾಗುತ್ತಿದೆ.

ಅಮೆರಿಕಕ್ಕೆ ಭಾರತವೇ ಹಾಟ್ ಫೇವರಿಟ್
ಹತ್ತಾರು ದೇಶಗಳಿಗೂ ಭಾರತದಿಂದ ರಫ್ತು
ಜಪಾನ್ ಅನ್ನೇ ಹಿಂದಿಕ್ಕಿ ಭಾರತ ಸಾಧನೆ

ಭಾರತವು ಅಮೆರಿಕಕ್ಕೇ ಹೆಚ್ಚಿನ ಸ್ಮಾರ್ಟ್ ಫೋನ್ ಗಳನ್ನು ರಫ್ತು ಮಾಡಿದೆ. 2023-24ನೇ ಹಣಕಾಸು ವರ್ಷದಲ್ಲಿಅಮೆರಿಕಕ್ಕೆ ಭಾರತ 47 ಸಾವಿರ ಕೋಟಿ ರೂ. ಮೌಲ್ಯದ ಸ್ಮಾರ್ಟ್ ಫೋನ್ ಗಳನ್ನು ರಫ್ತು ಮಾಡಲಾಗಿತ್ತು. ಆದರೆ ಇದು, 2024-25ರಲ್ಲಿ91ಸಾವಿರ ಕೋಟಿ ರೂ.ಗೆ ಏರಿಕೆಯಾಗಿದೆ. ಭಾರತದ ಜತೆಗೆ ಅಮೆರಿಕ, ನೆದರ್ಲೆಂಡ್ಸ್, ಇಟಲಿ, ಜಪಾನ್ ಹಾಗೂ ಜೆಕ್ ಗಣರಾಜ್ಯವು ಕೂಡ ಸ್ಮಾರ್ಟ್ ಫೋನ್ ರಫ್ತಿನಲ್ಲಿಏರಿಕೆ ಕಂಡಿವೆ. ಆದರೆ, ಭಾರತ ಮಾತ್ರ ಗರಿಷ್ಠ ಏರಿಕೆ ದಾಖಲಿಸಿದೆ ಎಂಬುದು ಗಮನಾರ್ಹವಾಗಿದೆ.

ಐಫೋನ್ ಗಳ ರಫ್ತಿನಲ್ಲಿ ಭಾರಿ ಮುನ್ನಡೆ
97% ಐಫೋನ್ ಅಮೆರಿಕಕ್ಕೇ ರಫ್ತು
ತೆರಿಗೆ ಉಳಿತಾಯದ ಲೆಕ್ಕಾಚಾರವೂ ಇದೆ

ಭಾರತದಿಂದ ಅಮೆರಿಕಕ್ಕೆ ಹೆಚ್ಚಿನ ಪ್ರಮಾಣದಲ್ಲಿಐಫೋನ್ ಗಳನ್ನೇ ರಫ್ತು ಮಾಡಲಾಗುತ್ತಿದೆ. ಆ್ಯಪಲ್ ಕಂಪನಿಯು ಭಾರತದಲ್ಲಿಉತ್ಪಾದನೆಯಾಗುವ ಒಟ್ಟು ಐಫೋನ್ ಗಳಲ್ಲಿಶೇ.97.6ರಷ್ಟು ಐಫೋನ್ ಗಳನ್ನು ಅಮೆರಿಕಕ್ಕೇ ರಫ್ತು ಮಾಡಲಾಗುತ್ತಿದೆ. ಅದರಲ್ಲೂ, ಡೊನಾಲ್ಡ್ ಟ್ರಂಪ್ ಅವರು ಚೀನಾ ವಿರುದ್ಧ ಪ್ರತಿಸುಂಕದ ಅಸ್ತ್ರ ಬಳಸಿದ ಬಳಿಕ ಭಾರತದಿಂದ ಹೆಚ್ಚಿನ ಐಫೋನ್ ಗಳನ್ನು ರಫ್ತು ಮಾಡಲಾಗಿದೆ. ಅಲ್ಲದೆ, ಭಾರತದಲ್ಲಿಐಫೋನ್ ಉತ್ಪಾದನೆಗೆ ಬೃಹತ್ ಘಟಕ ತೆರೆಯಲು ಆ್ಯಪಲ್ ಮುಂದಾಗಿದ್ದು, ಇದಕ್ಕೆ ಡೊನಾಲ್ಡ್ ಟ್ರಂಪ್ ಅವರೇ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ಅಷ್ಟರಮಟ್ಟಿಗೆ, ಭಾರತದಲ್ಲಿಐಫೋನ್ ಉತ್ಪಾದನೆಯಾಗುವುದು ಪ್ರಾಮುಖ್ಯತೆ ಪಡೆದಿದೆ.

ಭಾರತದಲ್ಲೇ ಸ್ಮಾರ್ಟ್ ಫೋನ್ ಗಳ ಉತ್ಪಾದನೆಯಿಂದ ದೇಶದ ಆರ್ಥಿಕತೆಯು ಬಲಿಷ್ಠವಾಗುತ್ತಿದೆ. ಅದರಲ್ಲೂ, ಭಾರತವೀಗ 4 ಲಕ್ಷ ಕೋಟಿ ಡಾಲರ್ ಆರ್ಥಿಕತೆ ಗುರಿ ಸಾಧಿಸಿದ್ದು, ಜಗತ್ತಿನಲ್ಲೇ 4ನೇ ಬೃಹತ್ ಆರ್ಥಿಕ ರಾಷ್ಟ್ರವಾಗಿ ಹೊರಹೊಮ್ಮಿದೆ. ಭಾರತವು ಮೂರನೇ ಸ್ಥಾನಕ್ಕೆ ಜಿಗಿಯಬೇಕು ಎಂದರೆ, ಇಂತಹ ಸಂಗತಿಗಳೂ ಪ್ರಮುಖವಾಗಿ ಅಂತಾರೆ ತಜ್ಞರು.