ಇತ್ತೀಚೆಗಷ್ಟೇ ಹುಬ್ಬಳ್ಳಿಯಲ್ಲಿ ಕಾಮುಕನೊಬ್ಬ ಐದು ವರ್ಷದ ಬಾಲಕಿ ಮೇಲೆ ಅತ್ಯಾಚಾರ ನಡೆಸಿ, ಕೊಲೆ ಮಾಡಿದ್ದ. ಈ ಪ್ರಕರಣ ಮಾಸುವ ಮುನ್ನವೇ ಅಪ್ರಾಪ್ತ ಬಾಲಕಿಯರ ಮೇಲಿನ ಅತ್ಯಾಚಾರ ಪ್ರಕರಣಗಳಿಗೆ ಸಂಬಂಧಿಸಿದಂತೆ ಅಂಕಿ-ಸಂಖ್ಯೆಯೊಂದು ಹೊರ ಬಿದ್ದಿದ್ದು, ಇಡೀ ಮಾನವ ಕುಲವೇ ತಲೆ ತಗ್ಗಿಸುವಂತಾಗಿದೆ. ಹೌದು! ಈ ಅಂಕಿ-ಸಂಖ್ಯೆ ಕೇಳಿ ಇಡೀ ಪೋಷಕ ಸಂಕುಲ ಬೆಚ್ಚಿ ಬಿದ್ದಿದೆ.
ಅಪ್ರಾಪ್ತೆಯರನ್ನೂ ಬಿಡದ ಕಾಮುಕರು
ಕಾಮುಕರ ಅಟ್ಟಹಾಸಕ್ಕೆ ನಲುಗುತ್ತಿರುವ ಜೀವಗಳು
4 ತಿಂಗಳಲ್ಲಿ ದಾಖಲಾದ ಅತ್ಯಾಚಾರ ಪ್ರಕರಣಗಳೆಷ್ಟು ಗೊತ್ತಾ?
ಕಾನೂನುಗಳು ಎಷ್ಟೇ ಕಠಿಣವಾದರೂ ಅತ್ಯಾಚಾರ ಪ್ರಕರಣಗಳು ಮಾತ್ರ ಸಮಾಜದ ಪಿಡುಗಿನಂತೆ ಬೆಳೆಯುತ್ತಿರುವುದು ದುರ್ದೈವದ ಸಂಗತಿ. ಕಾಮುಕರ ಅಟ್ಟಹಾಸಕ್ಕೆ ಅದೆಷ್ಟೋ ಜೀವಗಳು ನಲುಗಿ ಹೋಗುತ್ತಿವೆ. ಅದೆಷ್ಟೋ ಜೀವಗಳು ಚಿಕ್ಕವಯಸ್ಸಿನಲ್ಲಿ ಕಮರಿ ಹೋಗುತ್ತಿವೆ. ಅದೆಷ್ಟು ಕುಟುಂಬಗಳ ಆತ್ಮವಿಶ್ವಾಸ ಕುಗ್ಗಿ ಹೋಗುತ್ತಿವೆ. ಇವುಗಳ ಪರಿವೇ ಇಲ್ಲದ ಕಾಮುಕರು ಕ್ರೌರ್ಯ ಮೆರೆಯುತ್ತಿದ್ದಾರೆ. ಅತ್ತೀಚೆಗೆ ಅಪ್ರಾಪ್ತರ ಮೇಲೆ ಕಾಮುಕರ ಅಟ್ಟಹಾಸ ಹೆಚ್ಚಾಗುತ್ತಿದ್ದು, ಅಂಕಿ-ಅಂಶಗಳು ಬೆಚ್ಚಿ ಬೀಳಿಸುವಂತಿವೆ.
ರಾಜ್ಯದಲ್ಲಿ ಕೇವಲ 4 ತಿಂಗಳಲ್ಲಿ 979 ಅಪ್ರಾಪ್ತ ಬಾಲಕಿಯರ ಮೇಲೆ ಅತ್ಯಾಚಾರ ನಡೆದಿದೆ ಎಂಬ ಅಂಕಿ-ಅಂಶ ಬಯಲಾಗಿದೆ. ಕಳೆದ ವರ್ಷ ಬರೋಬ್ಬರಿ 2,960 ಅಪ್ರಾಪ್ತ ಬಾಲಕಿಯರು ಅತ್ಯಾಚಾರಕ್ಕೆ ಒಳಗಾಗಿದ್ದಾರೆ. ಬರೀ ನಾಲ್ಕು ತಿಂಗಳಲ್ಲಿ ಸಾವಿರದಷ್ಟು ಬಾಲಕಿಯರು ಕಾಮುಕರ ಅಟ್ಟಹಾಸಕ್ಕೆ ಬಲಿಯಾಗಿರುವುದನ್ನು ಕಂಡು ಇಡೀ ಕರುನಾಡು ಬೆಚ್ಚಿ ಬಿದ್ದಿದೆ. ಈ ಅಂಕಿ-ಸಂಖ್ಯೆ ಕೇಳಿ ಬೆಚ್ಚಿ ಬಿದ್ದಿರುವ ಪೋಷಕರು, ಮಕ್ಕಳನ್ನು ಮನೆಯಿಂದ ಹೊರಗೆ ಕಳುಹಿಸಲೂ ಭಯ ಬೀಳುವಂತಾಗಿದೆ.
ಕಾನೂನು ಸುವ್ಯವಸ್ಥೆ ಎಲ್ಲಿಗೆ ಹೋಯಿತು? ಶಾಲಾ ಸಂಸ್ಕಾರ ಎಲ್ಲಿಗೆ ಹೋಯಿತು? ಎಂದು ಪ್ರಜ್ಞಾವಂತರು ಬೇಸರ ವ್ಯಕ್ತಪಡಿಸುತ್ತಿದ್ದಾರೆ. ಈ ಪೈಕಿ ಬೆಂಗಳೂರು ನಗರದಲ್ಲೇ ಅತೀ ಹೆಚ್ಚು ಪ್ರಕರಣಗಳು ಬಯಲಿಗೆ ಬಂದಿರುವುದು ದುರ್ದೈವವೇ ಸರಿ. ಹೆಚ್ಚು ಪ್ರಜ್ಞಾವಂತರು, ಬುದ್ಧಿ ಜೀವಿಗಳು, ಕಾಯಕ ಯೋಗಿಗಳನ್ನು ಹೊಂದಿರುವ ಬೆಂಗಳೂರಿನಲ್ಲಿ ಇಂತಹ ಹೀನ ಕೃತ್ಯಗಳು ಹೆಚ್ಚು ನಡೆಯುತ್ತಿರುವುದು ಆತಂಕದ ವಿಷಯವೇ ಸರಿ. ಬೆಂಗಳೂರಿನಲ್ಲಿ ಕಳೆದ ನಾಲ್ಕು ತಿಂಗಳಲ್ಲಿ 114 ಬಾಲಕಿಯರ ಮೇಲೆ ಅತ್ಯಾಚಾರ ನಡೆದಿದೆ.
ಯಾವ ಜಿಲ್ಲೆಯಲ್ಲ ಎಷ್ಟು ಪ್ರಕರಣ ದಾಖಲು?
ಕಮಿಷನರೇಟ್ ವಲಯವಾರು ಸಂಖ್ಯೆ ಹೇಗಿದೆ?
ಬೆಂಗಳೂರು ಹೊರತು ಪಡಿಸಿದರೆ ಕಮಿಷನರೇಟ್ ವಲಯವಾರು ನೋಡುವುದಾದರೆ ಬೆಂಗಳೂರು ನಗರದಲ್ಲಿ 114, ಮೈಸೂರು ನಗರದಲ್ಲಿ 13, ಹುಬ್ಬಳ್ಳಿ ಧಾರವಾಡದಲ್ಲಿ 9, ಮಂಗಳೂರು ನಗರದಲ್ಲಿ 15, ಬೆಳಗಾವಿ ನಗರದಲ್ಲಿ 8, ಕಲಬುರಗಿ ನಗರದಲ್ಲಿ 5 ಪ್ರಕರಣಗಳು ದಾಖಲಾಗಿವೆ. ಇದಕ್ಕೂ ಹೆಚ್ಚಿನ ನೋವಿನ ಸಂಗತಿ ಅಂದ್ರೆ ಕಳೆದ 10 ತಿಂಗಳಲ್ಲಿ 26 ಸಾವಿರಕ್ಕೂ ಅಧಿಕ ಅಪ್ರಾಪ್ತ ಬಾಲಕಿಯರು ಗರ್ಭಿಣಿಯರಾಗಿರುವುದು.
ಈ ಸಂಖ್ಯೆ ಕಡಿಮೆಯಾಗಬೇಕಾದರೆ, ಪೋಕ್ಸೋ ಕಾಯ್ದೆಯಡಿ ಪ್ರಕರಣ ದಾಖಲಾಗಬೇಕು. ಕಾಮುಕರಿಗೆ ಕಠಿಣ ಶಿಕ್ಷೆಯಾಗಬೇಕು. ಇಲ್ಲವಾದರೆ ಈ ಸಂಖ್ಯೆ ಕಡಿಮೆಯಾಗುವುದೇ ಇಲ್ಲ ಎಂದು ರಾಜ್ಯ ಮಕ್ಕಳ ಆಯೋಗದ ಸದಸ್ಯ ಶಶಿಕುಮಾರ್ ಕೊಸಂಬೆ ಹೇಳಿದ್ದಾರೆ.
