ತಿರುವನಂತಪುರಂ: ಭಾರತದ ವಿಕೆಟ್‌ಕೀಪರ್ ಬ್ಯಾಟರ್ ಸಂಜು ಸ್ಯಾಮ್ಸನ್ ಅವರು 2025-26ರ ರಣಜಿ ಟ್ರೋಫಿ ಋತುವಿನಲ್ಲಿ ಕೇರಳ ತಂಡಕ್ಕೆ ಮರಳಿದ್ದಾರೆ. ಅಕ್ಟೋಬರ್ 15 ರಿಂದ ತಿರುವನಂತಪುರಂನಲ್ಲಿ ಮಹಾರಾಷ್ಟ್ರ ವಿರುದ್ಧ ನಡೆಯಲಿರುವ ಆರಂಭಿಕ ಪಂದ್ಯದಲ್ಲಿ ಅವರು ಆಡಲಿದ್ದಾರೆ.
ಕಳೆದ ವರ್ಷ ಅಕ್ಟೋಬರ್‌ನಲ್ಲಿ ಕರ್ನಾಟಕ ವಿರುದ್ಧ ತಮ್ಮ ಕೊನೆಯ ಪ್ರಥಮ ದರ್ಜೆ ಪಂದ್ಯವನ್ನಾಡಿದ್ದ 30 ವರ್ಷದ ಸ್ಯಾಮ್ಸನ್, ಈ ಋತುವಿನಲ್ಲಿ ದುಲೀಪ್ ಟ್ರೋಫಿ ಅಥವಾ ಇರಾನಿ ಕಪ್‌ಗಳಲ್ಲಿ ಭಾಗವಹಿಸಿರಲಿಲ್ಲ. ಇದೀಗ ಅವರು ರಣಜಿ ಟ್ರೋಫಿಯ ಮೂಲಕ ಕೆಂಪು ಚೆಂಡಿನ ಕ್ರಿಕೆಟ್‌ಗೆ ಮರಳುತ್ತಿದ್ದಾರೆ.
“ಕೇರಳಕ್ಕೆ ಹೊಸ ನಾಯಕ:”
ಈ ಋತುವಿನಲ್ಲಿ ಕೇರಳ ತಂಡವನ್ನು ವಿಕೆಟ್‌ಕೀಪರ್ ಬ್ಯಾಟರ್ ಮೊಹಮ್ಮದ್ ಅಝರುದ್ದೀನ್ ಮುನ್ನಡೆಸಲಿದ್ದಾರೆ. ಕಳೆದ ಋತುವಿನಲ್ಲಿ ಸಚಿನ್ ಬೇಬಿ ನಾಯಕತ್ವದಲ್ಲಿ ತಂಡವು ಫೈನಲ್‌ಗೆ ತಲುಪಿತ್ತು. ಇತ್ತೀಚೆಗೆ ದುಲೀಪ್ ಟ್ರೋಫಿಯಲ್ಲಿ ದಕ್ಷಿಣ ವಲಯವನ್ನು ಮುನ್ನಡೆಸಿದ್ದ ಅಝರುದ್ದೀನ್, ಈಗ ಸಚಿನ್ ಬೇಬಿ ಅವರಿಂದ ನಾಯಕತ್ವವನ್ನು ವಹಿಸಿಕೊಂಡಿದ್ದಾರೆ.
“ಸಂಜು ಸ್ಯಾಮ್ಸನ್ ಅವರು ಆಸ್ಟ್ರೇಲಿಯಾ ಪ್ರವಾಸ ಕೈಗೊಳ್ಳುವುದರಿಂದ, ಭವಿಷ್ಯವನ್ನು ಗಮನದಲ್ಲಿಟ್ಟುಕೊಂಡು ಅಝರುದ್ದೀನ್‌ರನ್ನು ನಾಯಕರನ್ನಾಗಿ ನೇಮಿಸಿದ್ದೇವೆ. ನಾಯಕತ್ವದಲ್ಲಿ ಸ್ಥಿರತೆಯನ್ನು ನಾವು ಬಯಸುತ್ತಿದ್ದೇವೆ” ಎಂದು ಕೇರಳ ಕ್ರಿಕೆಟ್ ಸಂಸ್ಥೆಯ (KCA) ಮೂಲಗಳು ತಿಳಿಸಿವೆ. ಭಾರತ ತಂಡವು ಅಕ್ಟೋಬರ್ 29 ರಿಂದ ನವೆಂಬರ್ 8 ರವರೆಗೆ ಆಸ್ಟ್ರೇಲಿಯಾದಲ್ಲಿ ಐದು ಟಿ20 ಪಂದ್ಯಗಳನ್ನು ಆಡಲಿದ್ದು, ಈ ಅವಧಿಯಲ್ಲಿ ರಣಜಿ ಟ್ರೋಫಿಯ ಎರಡು, ಮೂರು ಮತ್ತು ನಾಲ್ಕನೇ ಸುತ್ತಿನ ಪಂದ್ಯಗಳು ನಡೆಯಲಿವೆ.
ಕಳೆದ ಋತುವಿನಲ್ಲಿ ತಮಿಳುನಾಡಿನಿಂದ ಕೇರಳಕ್ಕೆ ಸೇರ್ಪಡೆಗೊಂಡಿದ್ದ ಬಾಬಾ ಅಪರಾಜಿತ್ ಅವರನ್ನು ಉಪನಾಯಕರನ್ನಾಗಿ ನೇಮಿಸಲಾಗಿದೆ. ಕೇರಳ ತಂಡವು ಕರ್ನಾಟಕ, ಪಂಜಾಬ್, ಸೌರಾಷ್ಟ್ರ, ಮಹಾರಾಷ್ಟ್ರ, ಮಧ್ಯಪ್ರದೇಶ, ಚಂಡೀಗಢ ಮತ್ತು ಗೋವಾ ತಂಡಗಳೊಂದಿಗೆ ಎಲೈಟ್ ‘ಬಿ’ ಗುಂಪಿನಲ್ಲಿದೆ.
“ಕೇರಳ ರಣಜಿ ತಂಡ:”
ಮೊಹಮ್ಮದ್ ಅಝರುದ್ದೀನ್ (ನಾಯಕ), ಬಾಬಾ ಅಪರಾಜಿತ್ (ಉಪನಾಯಕ), ಸಂಜು ಸ್ಯಾಮ್ಸನ್, ಸಚಿನ್ ಬೇಬಿ, ರೋಹನ್ ಎಸ್. ಕುನ್ನುಮ್ಮಾಳ್, ವತ್ಸಲ್ ಗೋವಿಂದ್, ಅಕ್ಷಯ್ ಚಂದ್ರನ್, ಸಲ್ಮಾನ್ ನಿಝಾರ್, ಅಂಕಿತ್ ಶರ್ಮಾ, ಎಂಡಿ ನಿಧೀಶ್, ಬಾಸಿಲ್ ಎನ್‌ಪಿ, ಏಡೆನ್ ಆ್ಯಪಲ್ ಟಾಮ್, ಅಹಮ್ಮದ್ ಇಮ್ರಾನ್, ಶೌನ್ ರೋಜರ್, ಅಭಿಷೇಕ್ ಪಿ. ನಾಯರ್.
ಮುಖ್ಯ ಕೋಚ್: ಅಮಯ್ ಖುರಾಸಿಯಾ.
