ಚಂಡೀಗಢ: ಪ್ರೀತಿಸಿ ಮದುವೆಯಾಗಲು ನಿರಾಕರಿಸಿದ ವ್ಯಕ್ತಿಯ ಮೇಲೆ ಮಹಿಳೆಯ ಸಂಬಂಧಿಕರು ಹಲ್ಲೆ ನಡೆಸಿದ್ದು, ವ್ಯಕ್ತಿಯ 13 ಮೂಳೆಗಳನ್ನು ಮುರಿದಿದ್ದಾರೆ. ಹರಿಯಾಣದ ಫರೀದಾಬಾದ್ ನಲ್ಲಿ ಇಂತಹದ್ದೊಂದು ಭೀಕರ ಘಟನೆ ನಡೆದಿದ್ದು, ವ್ಯಕ್ತಿಯು ಕಳೆದ 18 ದಿನಗಳಿಂದ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾನೆ.
ಫರೀದಾಬಾದ್ ನಲ್ಲಿ ಗುಲ್ಶನ್ ಎಂಬ ವ್ಯಕ್ತಿಯು ಮೊಬೈಲ್ ಅಂಗಡಿ ಇಟ್ಟುಕೊಂಡಿದ್ದಾನೆ. 2019ರಲ್ಲಿ ಈತನ ಅಂಗಡಿಗೆ ತೆರಳಿದ್ದಾಗ ಮಹಿಳೆ ಹಾಗೂ ವ್ಯಕ್ತಿಯ ಪರಿಚಯವಾಗಿದೆ. ಇಬ್ಬರ ನಡುವಿನ ಸ್ನೇಹವು ಪ್ರೀತಿಗೆ ತಿರುಗಿದೆ. ಮಹಿಳೆಗೆ ಈಗಾಗಲೇ 10 ವರ್ಷದ ಮಗನಿದ್ದಾನೆ. ಇವರಿಬ್ಬರ ಪ್ರೀತಿಯು ಮನೆಯಲ್ಲಿ ಗೊತ್ತಾಗಿದ್ದು, ಮದುವೆಯಾಗು ಎಂದು ಮಹಿಳೆಯ ಕಡೆಯವರು ಹೇಳಿದ್ದಾರೆ. ಇದಕ್ಕೆ ಗುಲ್ಶನ್ ಒಪ್ಪದ ಕಾರಣ ಹಲ್ಲೆ ನಡೆಸಿದ್ದಾರೆ ಎನ್ನಲಾಗಿದೆ. ಮಾರ್ಚ್ 29ರಂದು ಘಟನೆ ನಡೆದಿದೆ.
ಆದರೆ, ಗುಲ್ಶನ್ ಹೇಳುವುದೇ ಬೇರೆ. ನಾನು ಮಹಿಳೆಗೆ ಸುಮಾರು 21.5 ಲಕ್ಷ ರೂಪಾಯಿ ಕೊಟ್ಟಿದ್ದೇನೆ. ಇದನ್ನು ವಾಪಸ್ ಕೊಡುತ್ತೇವೆ ಮನೆಗೆ ಬಾ ಎಂದು ಮಹಿಳೆಯ ಕುಟುಂಬಸ್ಥರು ಕರೆದಿದ್ದರು. ನಾನು ಅಲ್ಲಿಗೆ ಹೋದಾಗ ಹಣವೂ ಕೊಡದೆ, ನನ್ನ ಮೇಲೆ ಹಲ್ಲೆ ನಡೆಸಿದರು. ನಾನು ಜೀವ ಉಳಿಸಿಕೊಳ್ಳಲು ಅಲ್ಲಿಂದ ಓಡಿ ಬಂದೆ. ನನ್ನ ದೇಹದ 13 ಮೂಳೆಗಳು ಮುರಿದಿವೆ. 18 ದಿನಗಳಿಂದ ಆಸ್ಪತ್ರೆಯಲ್ಲೇ ಚಿಕಿತ್ಸೆ ಪಡೆಯುತ್ತಿದ್ದೇನೆ ಎಂದು ಗುಲ್ಶನ್ ಹೇಳಿದ್ದಾನೆ.
ಮೂಲಗಳ ಪ್ರಕಾರ, ಗುಲ್ಶನ್ ಗೂ ಮದುವೆಯಾಗಿದ್ದು, ಮೂವರು ಮಕ್ಕಳಿದ್ದಾರೆ ಎನ್ನಲಾಗಿದೆ. ಗುಲ್ಶನ್ ನೀಡಿದ ದೂರಿನ ಮೇರೆಗೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ. ಮತ್ತೊಂದಿಷ್ಟು ಮೂಲಗಳ ಪ್ರಕಾರ, ಮಹಿಳೆಯನ್ನು ಮದುವೆಯಾಗಲು ಗುಲ್ಶನ್ ನಿರಾಕರಿಸಿದ ಕಾರಣ ಮಹಿಳೆಯ ಕುಟುಂಬಸ್ಥರು ಹಲ್ಲೆ ನಡೆಸಿದ್ದಾರೆ ಎನ್ನಲಾಗಿದೆ.
