ನವದೆಹಲಿ: ಕೇಂದ್ರ ಸರ್ಕಾರವು ವಾಹನ ಸವಾರರಿಗೆ ಸಿಹಿಸುದ್ದಿ ನೀಡಿದ್ದು, ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಸುಗಮ ಮತ್ತು ಅಗ್ಗದ ಪ್ರಯಾಣವನ್ನು ಖಾತರಿಪಡಿಸಲು ಫಾಸ್ಟ್‌ಟ್ಯಾಗ್ ಆಧಾರಿತ ವಾರ್ಷಿಕ ಪಾಸ್ ಅನ್ನು ಪರಿಚಯಿಸಿದೆ. ವರ್ಷಕ್ಕೆ 3,000 ರೂಪಾಯಿಗಳನ್ನು ಪಾವತಿಸಿ ಪಾಸ್ ಪಡೆಯಬಹುದು ಎಂದು ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್ ಗಡ್ಕರಿ ಘೋಷಿಸಿದ್ದಾರೆ.
ಈ ಪಾಸ್ ಆಗಸ್ಟ್ 15, 2025 ರಿಂದ ಜಾರಿಗೆ ಬರಲಿದ್ದು, ಕೇವಲ ವಾಣಿಜ್ಯೇತರ ಖಾಸಗಿ ವಾಹನಗಳಿಗೆ ಅಂದರೆ ಕಾರು, ಜೀಪ್, ವ್ಯಾನ್‌ಗಳು ಇತ್ಯಾದಿಗಳಿಗೆ ಮಾತ್ರ ಲಭ್ಯವಿರುತ್ತದೆ. ಇದು ಸಕ್ರಿಯಗೊಂಡ ದಿನಾಂಕದಿಂದ ಒಂದು ವರ್ಷಕ್ಕೆ ಅಥವಾ 200 ಪ್ರಯಾಣಗಳವರೆಗೆ ಮಾನ್ಯವಾಗಿರುತ್ತದೆ(ಯಾವುದು ಮೊದಲು ಮುಗಿಯುತ್ತದೆಯೋ ಅದರ ಆಧಾರದ ಮೇಲೆ).
ಗಡ್ಕರಿ ಅವರು ಈ ಕುರಿತು ಟ್ವೀಟ್ ಮಾಡಿದ್ದು “ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಸುಗಮ ಪ್ರಯಾಣಕ್ಕೆ ಅನುವು ಮಾಡಿಕೊಡುವ ಮಹತ್ವದ ಹೆಜ್ಜೆಯಾಗಿ, 3,000 ರೂಪಾಯಿಗಳ ಫಾಸ್ಟ್‌ಟ್ಯಾಗ್ ಆಧಾರಿತ ವಾರ್ಷಿಕ ಪಾಸ್ ಅನ್ನು ಆಗಸ್ಟ್ 15, 2025ರಿಂದ ಪರಿಚಯಿಸಲಾಗುತ್ತಿದೆ. ಈ ಪಾಸ್ ಖಾಸಗಿ ವಾಹನ ಮಾಲೀಕರಿಗೆ ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಸುಗಮ ಮತ್ತು ಕೈಗೆಟುಕುವ ಪ್ರಯಾಣವನ್ನು ಒದಗಿಸುತ್ತದೆ” ಎಂದಿದ್ದಾರೆ.
ಪಾಸ್‌ನ ವಿಶೇಷತೆಗಳು:
ವೆಚ್ಚ: 3,000 ರೂಪಾಯಿಗಳು. ಒಂದೇ ಬಾರಿಗೆ ಪಾವತಿಸಿದರೆ ಆಯ್ತು.
ಮಾನ್ಯತೆ: ಸಕ್ರಿಯಗೊಂಡ ದಿನಾಂಕದಿಂದ ಒಂದು ವರ್ಷ ಅಥವಾ 200 ಪ್ರಯಾಣಗಳವರೆಗೆ (ಯಾವುದು ಮೊದಲು ಮುಗಿಯುತ್ತದೆಯೋ ಅದು).
ಲಭ್ಯತೆ: ಕೇವಲ ವಾಣಿಜ್ಯೇತರ ಖಾಸಗಿ ವಾಹನಗಳಾದ ಕಾರು, ಜೀಪ್ ಮತ್ತು ವ್ಯಾನ್‌ಗಳಿಗೆ.
ಉದ್ದೇಶ: ಟೋಲ್ ಪ್ಲಾಜಾಗಳಲ್ಲಿ ಪಾವತಿಯನ್ನು ಸರಳಗೊಳಿಸುವುದು, ಕಾಯುವ ಸಮಯವನ್ನು ಕಡಿಮೆ ಮಾಡುವುದು ಮತ್ತು ಟೋಲ್‌ನಲ್ಲಿ ಉಂಟಾಗುವ ಜಗಳಗಳನ್ನು ತಗ್ಗಿಸುವುದು.
ಟೋಲ್ ವೆಚ್ಚದಲ್ಲಿ ಉಳಿತಾಯ:
ಸರಾಸರಿ ಟೋಲ್ ಶುಲ್ಕವು ಪ್ರತಿ ಪ್ರಯಾಣಕ್ಕೆ 80-100 ರೂಪಾಯಿಗಳಷ್ಟಿದೆ. ಈ ವಾರ್ಷಿಕ ಪಾಸ್‌ನೊಂದಿಗೆ, ಪ್ರತಿ ಪ್ರಯಾಣದ ವೆಚ್ಚವು ಸರಾಸರಿ 15 ರೂಪಾಯಿಗಳಿಗೆ ಇಳಿಯುತ್ತದೆ, ಇದರಿಂದ ಪ್ರಯಾಣಿಕರು 7,000 ರೂಪಾಯಿಗಳವರೆಗೆ ಉಳಿತಾಯ ಮಾಡಬಹುದು ಎಂದು ಸಚಿವ ಗಡ್ಕರಿ ಹೇಳಿದ್ದಾರೆ.
ಫಾಸ್ಟ್‌ಟ್ಯಾಗ್ ಪಾಸ್ ಪಡೆಯುವುದು ಹೇಗೆ?
ವಾಹನ ಮಾಲೀಕರು ರಾಜ್‌ಮಾರ್ಗ್ ಯಾತ್ರಾ ಆಪ್ ಅಥವಾ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (NHAI) ಮತ್ತು ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯದ (MoRTH) ಅಧಿಕೃತ ವೆಬ್‌ಸೈಟ್‌ಗಳ ಮೂಲಕ ಪಾಸ್ ಅನ್ನು ಪಡೆದು ಸಕ್ರಿಯಗೊಳಿಸಬಹುದು ಅಥವಾ ನವೀಕರಿಸಬಹುದು ಎಂದೂ ಅವರು ಮಾಹಿತಿ ನೀಡಿದ್ದಾರೆ.
ಪಾವತಿಯನ್ನು ಯುಪಿಐ, ಕ್ರೆಡಿಟ್/ಡೆಬಿಟ್ ಕಾರ್ಡ್ ಅಥವಾ ನೆಟ್ ಬ್ಯಾಂಕಿಂಗ್ ಮೂಲಕ ಮಾಡಬಹುದು.
ಪಾವತಿಯ ನಂತರ, ಫಾಸ್ಟ್‌ಟ್ಯಾಗ್ ಸ್ವಯಂಚಾಲಿತವಾಗಿ ವಾರ್ಷಿಕ ಪಾಸ್‌ಗೆ ಲಿಂಕ್ ಆಗುತ್ತದೆ ಮತ್ತು 24 ಗಂಟೆಗಳ ಒಳಗೆ ಅದು ಸಕ್ರಿಯಗೊಳ್ಳುತ್ತದೆ.
ಫಾಸ್ಟ್‌ಟ್ಯಾಗ್ ಎನ್ನುವುದು ರಾಷ್ಟ್ರೀಯ ಪಾವತಿ ನಿಗಮ (NPCI) ಮತ್ತು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (NHAI) ನಿರ್ವಹಿಸುವ ಎಲೆಕ್ಟ್ರಾನಿಕ್ ಟೋಲ್ ಸಂಗ್ರಹ ವ್ಯವಸ್ಥೆಯಾಗಿದೆ. ಇದನ್ನು 2014ರಲ್ಲಿ ಪರಿಚಯಿಸಲಾಯಿತು. ಈಗ ಪರಿಚಯಿಸಲಾಗಿರುವ ವಾರ್ಷಿಕ ಟೋಲ್ ಪಾಸ್ ವ್ಯವಸ್ಥೆಯು ಡಿಜಿಟಲ್ ಟೋಲ್ ಸಂಗ್ರಹವನ್ನು ಇನ್ನಷ್ಟು ಸರಳಗೊಳಿಸುವ ಗುರಿಯನ್ನು ಹೊಂದಿದೆ ಎಂದಿದ್ದಾರೆ ಗಡ್ಕರಿ.
