ಮಧ್ಯಪ್ರಾಚ್ಯ ಸಂಘರ್ಷ ತೀವ್ರ: ತೈಲ ಬೆಲೆ ಏರಿಕೆ, ಏಷ್ಯಾ ಮಾರುಕಟ್ಟೆಗಳು ಪತನ

ನವದೆಹಲಿ: ಮಧ್ಯಪ್ರಾಚ್ಯದಲ್ಲಿ ಇಸ್ರೇಲ್ ಮತ್ತು ಇರಾನ್ ನಡುವಿನ ಸಂಘರ್ಷ ತೀವ್ರಗೊಂಡಿರುವಂತೆಯೇ ಜಾಗತಿಕ ತೈಲ ಬೆಲೆಗಳು ಗಗನಕ್ಕೇರತೊಡಗಿವೆ. ಸೋಮವಾರ ತೈಲ ದರ ಶೇ.2ಕ್ಕಿಂತ ಹೆಚ್ಚು ಏರಿಕೆ ಕಂಡಿದ್ದು, ಏಷ್ಯಾದ ಷೇರು ಮಾರುಕಟ್ಟೆಗಳು ಭಾರೀ ಕುಸಿತಕ್ಕೆ ಸಾಕ್ಷಿಯಾಗಿವೆ.

ಇರಾನ್‌ನ ಆರು ವಿಮಾನ ನಿಲ್ದಾಣಗಳ ಮೇಲೆ ದಾಳಿ ನಡೆಸಿ 15 ವಿಮಾನಗಳನ್ನು ಧ್ವಂಸಗೊಳಿಸಿದೆ ಎಂದು ಒಂದೆಡೆ ಇಸ್ರೇಲ್ ಹೇಳಿಕೊಂಡಿದೆ, ಇರಾನ್‌ನ ಮೂರು ಪರಮಾಣು ಸೌಲಭ್ಯಗಳಾದ ಫೊರ್ಡೊ, ನತಾಂಜ್ ಮತ್ತು ಇಸ್ಫಹಾನ್ ಮೇಲೆ ಅಮೆರಿಕ ಬಾಂಬ್ ದಾಳಿ ನಡೆಸಿದೆ, ಇವೆಲ್ಲವೂ ಈ ಪ್ರದೇಶದಲ್ಲಿನ ಶಾಂತಿಯನ್ನು ಕದಡಿದ್ದು, ಘೋರ ಯುದ್ಧಕ್ಕೆ ಮುನ್ನುಡಿಯಾಗುವ ಲಕ್ಷಣಗಳು ಗೋಚರಿಸುತ್ತಿವೆ. ಈ ಎಲ್ಲ ಬೆಳವಣಿಗೆಯ ಪರಿಣಾಮವು ಅಂತಾರಾಷ್ಟ್ರೀಯ ಮಟ್ಟದ ಆರ್ಥಿಕತೆಯ ಮೇಲೆ ಬೀಳತೊಡಗಿದೆ.

ತೈಲ ಬೆಲೆಗಳು ಐದು ತಿಂಗಳ ಗರಿಷ್ಠ ಮಟ್ಟವನ್ನು ತಲುಪಿದ್ದು, ಬ್ರೆಂಟ್ ಕಚ್ಚಾ ತೈಲದ ಬೆಲೆ ಶೇ.2.7 ಏರಿಕೆಯೊಂದಿಗೆ $90 ಗಡಿ ದಾಟಿದೆ. ವೆಸ್ಟ್ ಟೆಕ್ಸಾಸ್ ಇಂಟರ್ಮೀಡಿಯೇಟ್ (WTI) ಕಚ್ಚಾ ತೈಲ ಸಹ 4% ಏರಿಕೆ ಕಂಡಿದೆ. ಇರಾನ್‌ ಏನಾದರೂ ಪ್ರತೀಕಾರದ ದಾಳಿಗಳನ್ನು ನಡೆಸಿದರೆ ಜಾಗತಿಕ ತೈಲ ಪೂರೈಕೆ ತೊಂದರೆಗೆ ಸಿಲುಕಬಹುದು, ವಿಶೇಷವಾಗಿ ಹೊರ್ಮುಜ್‌ ಜಲಸಂಧಿಯಂತಹ ತೈಲ ಮಾರ್ಗವನ್ನು ಇರಾನ್ ಮುಚ್ಚಿದರೆ, ಸಮಸ್ಯೆ ಮತ್ತಷ್ಟು ಬಿಗಡಾಯಿಸಬಹುದು ಎಂದು ವಿಶ್ಲೇಷಕರು ಎಚ್ಚರಿಕೆ ನೀಡಿದ್ದಾರೆ. ಆಕ್ಸ್‌ಫರ್ಡ್ ಎಕನಾಮಿಕ್ಸ್ ವರದಿಯ ಪ್ರಕಾರ, ಇಂತಹ ತೀವ್ರ ಸನ್ನಿವೇಶದಲ್ಲಿ ತೈಲ ಬೆಲೆ ಬ್ಯಾರೆಲ್‌ಗೆ $130 ತಲುಪಿ, ಜಾಗತಿಕ ಹಣದುಬ್ಬರವನ್ನು ತೀವ್ರಗೊಳಿಸುವ ಸಾಧ್ಯತೆಯೂ ಇದೆ.

ಏಷ್ಯಾ ಮಾರುಕಟ್ಟೆ ಪತನ
ಏಷ್ಯಾದ ಪ್ರಮುಖ ಷೇರು ಮಾರುಕಟ್ಟೆಗಳು ತೀವ್ರ ಕುಸಿತಕ್ಕೊಳಗಾಗಿವೆ. ಜಪಾನ್‌ನ ನಿಕ್ಕಿ ಸೂಚ್ಯಂಕವು 2% ಕುಸಿದರೆ, ಭಾರತದ ಬಿಎಸ್ಇ ಸೆನ್ಸೆಕ್ಸ್ 840 ಅಂಕಗಳಷ್ಟು ಕುಸಿತದೊಂದಿಗೆ 81,567ಕ್ಕೆ ತಲುಪಿದೆ, ಮತ್ತು ನಿಫ್ಟಿ 253 ಅಂಕಗಳ ಕುಸಿತದೊಂದಿಗೆ 24,858ಕ್ಕೆ ಇಳಿದಿದೆ. ತೈಲ ಆಧಾರಿತ ಕ್ಷೇತ್ರಗಳಾದ ವಿಮಾನಯಾನ, ತೈಲ ಮಾರುಕಟ್ಟೆ ಕಂಪನಿಗಳು ಮತ್ತು ಪೇಂಟ್ ಉದ್ಯಮಗಳ ಷೇರುಗಳು ಗಮನಾರ್ಹ ಇಳಿಕೆ ಕಂಡಿವೆ.

ಜಾಗತಿಕ ಆರ್ಥಿಕತೆಯ ಮೇಲೆ ಪರಿಣಾಮ
ಈ ಸಂಘರ್ಷವು ಜಾಗತಿಕ ಆರ್ಥಿಕತೆಯ ಮೇಲೆ ಗಂಭೀರ ಪರಿಣಾಮ ಬೀರಬಹುದು ಎಂದು ತಜ್ಞರು ಎಚ್ಚರಿಸಿದ್ದಾರೆ. ತೈಲ ಬೆಲೆ ಏರಿಕೆಯಿಂದಾಗಿ ಅಮೆರಿಕದಲ್ಲಿ ಹಣದುಬ್ಬರ ಶೇ.6ಕ್ಕೆ ಏರಬಹುದು ಎಂದು ಆಕ್ಸ್‌ಫರ್ಡ್ ಎಕನಾಮಿಕ್ಸ್ ಅಂದಾಜಿಸಿದೆ. ಆದರೆ, ಕೆಲವು ವಿಶ್ಲೇಷಕರು ಸೌದಿ ಅರೇಬಿಯಾದಂತಹ ಒಪೆಕ್ ರಾಷ್ಟ್ರಗಳು ಮತ್ತು ಅಮೆರಿಕವು ತೈಲ ಪೂರೈಕೆಯ ಕೊರತೆಯನ್ನು ಸರಿದೂಗಿಸಬಹುದು ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಇರಾನ್‌ನ ಪ್ರತಿಕ್ರಿಯೆಯೇ ಕುತೂಹಲ
ಇರಾನ್ ಈ ದಾಳಿಗಳಿಗೆ ಹೇಗೆ ಪ್ರತಿಕ್ರಿಯಿಸುತ್ತದೆ ಎಂಬುದನ್ನು ಜಾಗತಿಕ ಮಾರುಕಟ್ಟೆಗಳು ಕಾತರದಿಂದ ಕಾಯುತ್ತಿವೆ. ಇರಾನ್ ತೈಲ ರಫ್ತು ಸ್ಥಗಿತಗೊಳಿಸಿದರೆ ಅಥವಾ ಹೊರ್ಮುಜ್‌ ಕಾಲುವೆಯಲ್ಲಿ ತೊಂದರೆ ಸೃಷ್ಟಿಸಿದರೆ, ತೈಲ ಬೆಲೆಗಳು ಇನ್ನಷ್ಟು ಏರಿಕೆಯಾಗುವ ಭೀತಿಯಿದೆ.

ಭಾರತದ ಮೇಲಿನ ಪರಿಣಾಮ
ತೈಲ ಬೆಲೆ ಏರಿಕೆ ಭಾರತದ ಆರ್ಥಿಕತೆಯ ಮೇಲೂ ಗಂಭೀರ ಪರಿಣಾಮ ಬೀರಬಹುದು. ಏಕೆಂದರೆ ದೇಶ ತನ್ನ ತೈಲದ ಅವಶ್ಯಕತೆಯ ಶೇ.85%ರಷ್ಟನ್ನು ಆಮದು ಮಾಡಿಕೊಳ್ಳುತ್ತದೆ. ಈ ಏರಿಕೆಯಿಂದ ಇಂಧನ ಬೆಲೆ, ಸಾರಿಗೆ ವೆಚ್ಚ ಮತ್ತು ಒಟ್ಟಾರೆ ಗ್ರಾಹಕ ಬೆಲೆಗಳು ಏರಿಕೆಯಾಗುವ ಸಾಧ್ಯತೆಯಿದೆ. ಭಾರತೀಯ ಷೇರು ಮಾರುಕಟ್ಟೆಯ ದಿಕ್ಕು ಈ ವಾರ ಕಚ್ಚಾ ತೈಲದ ದರ ಮತ್ತು ಮಧ್ಯಪಾಚರ ರಾಜಕೀಯ ಬೆಳವಣಿಗೆಗಳ ಮೇಲೆ ಅವಲಂಬಿತವಾಗಿರುತ್ತದೆ ಎಂದು ತಜ್ಞ್ಞರು ತಿಳಿಸಿದ್ದಾರೆ.