ವಾಷಿಂಗ್ಟನ್: ಮಂಗಳ ಗ್ರಹದಲ್ಲಿ ಸಂಚರಿಸುತ್ತಿರುವ ನಾಸಾದ ಕ್ಯೂರಿಯಾಸಿಟಿ ರೋವರ್ ತೆಗೆದ ಚಿತ್ರವೊಂದರಲ್ಲಿ ಮಂಗಳ ಗ್ರಹದ ಮೇಲ್ಮೈಯಲ್ಲಿ ಅಣಬೆಯಂತೆ ಕಾಣುವ ವಸ್ತುವೊಂದು ಪತ್ತೆಯಾಗಿದೆ. ಇದು ವಿಜ್ಞಾನಿಗಳ ಗಮನ ಸೆಳೆದಿದ್ದು, ಈ ಚಿತ್ರವು ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿದೆ. ಜೊತೆಗೆ, ಮಂಗಳ ಗ್ರಹದಲ್ಲಿ ಜೀವದ ಅಸ್ತಿತ್ವದ ಬಗ್ಗೆ ಊಹಾಪೋಹಗಳಿಗೂ ಕಾರಣವಾಗಿದೆ. ಮಂಗಳ ಗ್ರಹವು ಮಾನವ ವಾಸಯೋಗ್ಯವೇ ಎಂಬ ಬಗ್ಗೆ ಅಧ್ಯಯನಗಳು ನಡೆಯುತ್ತಿರುವಂತೆಯೇ ಈ ಅಣಬೆ ರೀತಿಯ ವಸ್ತು ಪತ್ತೆಯಾಗಿರುವುದು ಪ್ರಾಮುಖ್ಯತೆ ಪಡೆದಿದೆ.
ಈ ಚಿತ್ರದಲ್ಲಿ ಕಾಣುವ ವಸ್ತುವು ಭೂಮಿಯಲ್ಲಿ ಕಾಣಸಿಗುವ ಅಣಬೆಯನ್ನು ಹೋಲುತ್ತದೆ. ಆದರೆ ವಿಜ್ಞಾನಿಗಳು ಇದು ಕೇವಲ ಒಂದು ಶಿಲೆಯೂ (ರಾಕ್ ಫಾರ್ಮೇಷನ್) ಆಗಿರಬಹುದು ಎಂದು ಅಂದಾಜಿಸಿದ್ದಾರೆ. ಮಂಗಳ ಗ್ರಹದ ಕಠಿಣ ವಾತಾವರಣದಲ್ಲಿ ಜೀವಿಗಳು ಬದುಕುವ ಸಾಧ್ಯತೆ ಕಡಿಮೆ ಇದೆ ಎಂದು ತಜ್ಞರು ಒಪ್ಪಿಕೊಂಡಿದ್ದಾರೆ. ಏಕೆಂದರೆ ಅಲ್ಲಿ ನೀರು, ಆಮ್ಲಜನಕ ಮತ್ತು ಇತರ ಅಗತ್ಯ ಅಂಶಗಳ ಕೊರತೆಯಿದೆ.
ಆದರೂ, ಈ ಚಿತ್ರವು ಮಂಗಳ ಗ್ರಹದಲ್ಲಿ ಸೂಕ್ಷ್ಮ ಜೀವಿಗಳ ಸಾಧ್ಯತೆಯ ಬಗ್ಗೆ ಚರ್ಚೆಗೆ ಒತ್ತು ನೀಡಿದೆ.
ನಾಸಾದ ವಿಜ್ಞಾನಿಗಳು ಈ ವಸ್ತುವನ್ನು ಎಚ್ಚರಿಕೆಯಿಂದ ಅಧ್ಯಯನ ಮಾಡುತ್ತಿದ್ದಾರೆ. ಇದು ಜೀವರಾಶಿಯ ಸಂಕೇತವಾಗಿದ್ದರೆ, ಅದು ಬಾಹ್ಯಾಕಾಶ ವಿಜ್ಞಾನದ ಇತಿಹಾಸದಲ್ಲಿ ಒಂದು ದೊಡ್ಡ ಆವಿಷ್ಕಾರವಾಗಲಿದೆ. ಆದರೆ, ಪ್ರಸ್ತುತ ಇದು ಕೇವಲ ಒಂದು ಭ್ರಮೆಯಾಗಿರಬಹುದು ಎಂದೂ ಅವರು ಹೇಳಿದ್ದಾರೆ.
ಈ ಚಿತ್ರವು ಜನರ ಕುತೂಹಲವನ್ನು ಕೆರಳಿಸಿದ್ದು, ಮಂಗಳ ಗ್ರಹದ ರಹಸ್ಯಗಳನ್ನು ಇನ್ನಷ್ಟು ಅನ್ವೇಷಿಸಲು ವಿಜ್ಞಾನಿಗಳಿಗೆ ಸ್ಫೂರ್ತಿಯಾಗಿದೆ.
ನಾಸಾದ ಕ್ಯೂರಿಯಾಸಿಟಿ ರೋವರ್ 2012ರಿಂದಲೇ ಮಂಗಳನ ಅಂಗಳದಲ್ಲಿ ಸಂಚರಿಸುತ್ತಾ, ಅಲ್ಲಿನ ಫೋಟೋಗಳನ್ನು ಭೂಮಿಗೆ ರವಾನಿಸುತ್ತಿದೆ. ಮಂಗಳ ಗ್ರಹದಲ್ಲಿ ನೀರಿನ ಕುರುಹುಗಳಿವೆಯೇ ಎಂಬುವುದೂ ಸೇರಿದಂತೆ ಅನೇಕ ಆವಿಷ್ಕಾರದಲ್ಲಿ ಅದು ತನ್ನನ್ನು ತಾನು ತೊಡಗಿಸಿಕೊಂಡಿದೆ. ಅಲ್ಲಿರುವ ಕಲ್ಲುಗಳಲ್ಲಿ ಆರ್ಗ್ಯಾನಿಕ್ ಕಣಗಳನ್ನು ಹಾಗೂ ವಾತಾವರಣದಲ್ಲಿ ಮೀಥೇನ್ ಅನ್ನೂ ರೋವರ್ ಪತ್ತೆಹಚ್ಚಿದ್ದು, ಇವೆಲ್ಲವೂ ಅಲ್ಲಿ ಸೂಕ್ಷ್ಮಾಣುಜೀವಿಗಳ ಸುಳಿವನ್ನೂ ನೀಡಿವೆ.
