ವಿಶ್ವ ಸುಂದರಿ ಸ್ಪರ್ಧೆಯಲ್ಲಿ ಭಾರತಕ್ಕೆ ಈ ಬಾರಿಯೂ ನಿರಾಸೆಯಾಗಿದೆ.
ಭಾರತದಲ್ಲೇ ಈ ಬಾರಿ ಸ್ಪರ್ಧೆ ನಡೆದರೂ ಕಿರೀಟ ಮಾತ್ರ ದೇಶದ ಪಾಲಾಗಲಿಲ್ಲ. ಹೈದರಾಬಾದ್ ನಲ್ಲಿ ನಡೆದ 72ನೇ ವಿಶ್ವ ಸುಂದರಿ (Miss World 2025) ಸ್ಪರ್ಧೆಯಲ್ಲಿ ಥಾಯ್ಲೆಂಡ್ ಚೆಲುವೆ ಓಪಲ್ ಸುಚಾತ ವಿಶ್ವ ಸುಂದರಿಯಾಗಿ ಆಯ್ಕೆಯಾಗಿದ್ದಾರೆ.
ಕಳೆದ ಬಾರಿಯ ವಿಶ್ವ ಸುಂದರಿ ಜೆಕ್ ರಿಪಬ್ಲಿಕ್ನ ಕ್ರಿಸ್ಟಿಯಾನಾ ಅವರು ಥಾಯ್ಲೆಂಡ್ ನ ಸುಂದರಿ ಓಪಲ್ ಸುಚಾತಗೆ ಕಿರೀಟ ತೊಡಿಸಿದ್ದಾರೆ. ಈ ಸ್ಪರ್ಧೆಯಲ್ಲಿ ವಿವಿಧ ದೇಶಗಳ 108 ಜನ ಸುಂದರಿಯರು ಭಾಗವಹಿಸಿದ್ದರು. ಒಂದು ವಾರ ಈ ಸ್ಪರ್ಧೆ ನಡೆದು ಇಂದು ಫಲಿತಾಂಶ ಹೊರ ಬಿದ್ದಿದೆ. ಥಾಯ್ಲೆಂಡ್ನ ಓಪಲ್ ಸುಚಾತ ತಮ್ಮ ಅದ್ಭುತ ಸೌಂದರ್ಯದ ಜೊತೆಗೆ ಮಾತುಗಾರಿಕೆ, ಆದರ್ಶ, ವ್ಯಕ್ತಿತ್ವಗಳಿಂದಲೂ ಗಮನ ಸೆಳೆದು 2025ರ ವಿಶ್ವ ಸುಂದರಿ ಪಟ್ಟಕ್ಕೆ ಏರಿದ್ದಾರೆ.
ಭಾರತದ ಪ್ರತಿನಿಧಿಯಾಗಿ ನಂದಿನಿ ಗುಪ್ತಾ ಅಂತಿಮ 40ರ ಹಂತಕ್ಕೂ ಬಾರದೆ ನಿರಾಸೆ ಅನುಭವಿಸಿದ್ದಾರೆ. ಥಾಯ್ಲೆಂಡ್ನ ಓಪಲ್ ಸುಚಾತ ವಿಶ್ವ ಸುಂದರಿ ಎನಿಸಿಕೊಂಡರೆ, ಇಥಿಯೋಫಿಯಾದ ಹಸೆಟ್ ಡೆರೆಜೆ, ಪೋಲಂಡ್ನ ಮೇಜ್ ಕ್ಲಾಡ್ಜ್, ಮಾರ್ಟಿನಿಕ್ಯೂನ ಔರೈಲ್ ಜೋಶಿಮ್ ಕ್ರಮವಾಗಿ ಮೊದಲ, ದ್ವಿತೀಯ, ತೃತೀಯ ರನ್ನರ್ ಅಪ್ ಆಗಿದ್ದಾರೆ.
