ಮದ್ಯದ ದೊರೆ ವಿಜಯ್ ಮಲ್ಯ ಇತ್ತೀಚೆಗೆ ಆರ್ ಸಿಬಿ ಕಪ್ ಗೆಲ್ಲುತ್ತಿದ್ದಂತೆ ರಂಗು ರಂಗಿನಲ್ಲಿ ಮಾತನಾಡಿದ್ದರು. ಇಡೀ ವಿಶ್ವ ಕೂಡ ಇದು ಸತ್ಯವಾ? ಎಂದು ಮಾತನಾಡಿಕೊಳ್ಳುವಂತೆ ಅವರ ಮಾತುಗಳಿದ್ದವು. ಭಾರತ ಸರ್ಕಾರ ಹಾಗೂ ಭಾರತೀಯ ಬ್ಯಾಂಕುಗಳೇ ಅಪರಾಧಿಗಳೇನು ಎಂಬಂತೆ ಕಥೆಗಳನ್ನು ಅನಭಿಷಿಕ್ತ ದೊರೆ ಹೆಣೆದಿದ್ದರು. ಸದ್ಯ ಅವರ ಆರೋಪಕ್ಕೆ ಸರ್ಕಾರ ಹಾಗೂ ಬ್ಯಾಂಕುಗಳು ತಿರುಗೇಟು ನೀಡಿವೆ.
ಮಲ್ಯ ಬಾಕಿ ಇಟ್ಟುಕೊಂಡಿದ್ದೇಷ್ಟು?
ಇನ್ನೂ ಪಾವತಿ ಮಾಡಬೇಕಾಗಿರುವ ಹಣವೆಷ್ಟು?
ಮಲ್ಯ ಸಂದರ್ಶನದಲ್ಲಿ ಹೇಳಿದ್ದೆಲ್ಲ ಸತ್ಯವಾ?
ಮಲ್ಯ ವಿರುದ್ಧ 2013ರ ಜೂನ್ ನಲ್ಲಿ ಸಾಲ ವಸೂಲಾತಿ ನ್ಯಾಯಮಂಡಳಿಯಲ್ಲಿ ಪ್ರಕರಣ ದಾಖಲಿಸಿದಾಗ ಅವರ ಕಿಂಗ್ ಫಿಷರ್ ಏರ್ ಲೈನ್ಸ್ ಕ್ರೋಡೀಕೃತ ಬಾಕಿ 6,848 ಕೋಟಿ ರೂ. ಆಗಿತ್ತು. ಅದು ಏಪ್ರಿಲ್ ವೇಳೆಗೆ ಬಡ್ಡಿ ಸೇರಿದಂತೆ ಒಟ್ಟು 10,933 ಕೋಟಿ ರೂ. ಆಗಿತ್ತು. ಅಂದರೆ, ಅವರ ಒಟ್ಟು ಸಾಲ 17,781 ಕೋಟಿ ರೂ. ಆಗಿತ್ತು. ಆದರೆ, ಮಲ್ಯ ಹೇಳುವ ಪ್ರಕಾರ ಅವರು ಹೇಳಿದ್ದು, 14 ಸಾವಿರ ಕೋಟಿ ರೂ. ನನ್ನಿಂದ ಪಾವತಿ ಆಗಿದೆ ಅಂತಾ. ಬ್ಯಾಂಕ್ ಗಳು ಮತ್ತು ಕೇಂದ್ರ ಸರ್ಕಾರದ ಮಾಹಿತಿಯಂತೆ ವಸೂಲಿಯಾಗಿರುವುದು 10,815 ಕೋಟಿ ರೂ. ಮಾತ್ರ. ಹಾಗಾದರೆ, ಬ್ಯಾಂಕ್ ಗಳು ಹಾಗೂ ಸರ್ಕಾರದ ಮಾಹಿತಿಯಂತೆ ಮಲ್ಯ ಇನ್ನೂ 6,997 ಕೋಟಿ ರೂ. ಸಾಲ ಪಾವತಿಸಬೇಕಿದೆ.
ಆದರೆ, ಸಂದರ್ಶನದಲ್ಲಿ ಮಾತನಾಡಿರುವ ವಿಜಯ್ ಮಲ್ಯ, ನಾನು ಮಾಡಿದ 6,200 ಕೋಟಿ ಸಾಲಕ್ಕೆ ಪ್ರತಿಯಾಗಿ ನನ್ನಿಂದ 14 ಸಾವಿರ ಕೋಟಿ ಕಟ್ಟಿಸಿಕೊಂಡಿದ್ದಾರೆ. ಹಾಗಾದರೆ, ನಾನು ಸಾಲ ಮಾಡಿ ದೇಶದಿಂದ ಪರಾರಿಯಾದವ ಅಂತಾರೆ. ನಾನು ಸಾಲಗಾರ, ಅಂತಾರೆ. ಹಾಗಾದರೆ ನಾನು ಸಾಲಗಾರನೇ? ಎಂದು ಪ್ರಶ್ನಿಸಿದ್ದರು. ಅದಕ್ಕೂ ಒಂದು ಹೆಜ್ಜೆ ಮುಂದೆ ಹೋಗಿ ನನ್ನಿಂದ ಹೆಚ್ಚು ಕಟ್ಟಿಸಿಕೊಂಡಿರುವ ಸರ್ಕಾರ ಹಾಗೂ ಬ್ಯಾಂಕುಗಳೇ ನನಗೆ ಹಣ ಪಾವತಿಸಬೇಕು ಎಂದು ಹೇಳಿದ್ದರು.
ಮಲ್ಯ ಹೇಳಿಕೆಗೆ ತಿರುಗೇಟು ನೀಡಿರುವ ಬ್ಯಾಂಕುಗಳು ಈಗ ಉತ್ತರ ನೀಡಿವೆ. ಯಾವುದೇ ವ್ಯಕ್ತಿ ಸಾಲ ಮಾಡಿದರೆ ಅದನ್ನು ಸಂಪೂರ್ಣವಾಗಿ ತೀರಿಸುವವರೆಗೂ ಬಡ್ಡಿ ಸೇರುತ್ತಲೇ ಇರುತ್ತದೆ. ಮಲ್ಯ ಅವರಂತಹ ಕೇಸ್ ಗಳಲ್ಲಿ ದಂಡ ಸಹಿತ ಬಡ್ಡಿಯೂ ಇರುತ್ತದೆ. ಅವರೀಗ ಅಸಲು ತೀರಿಸಿದ್ದರ ಬಗ್ಗೆ ಮಾತ್ರ ಹೇಳುತ್ತಿದ್ದಾರೆ. ಬಾಕಿ ಮೊತ್ತ ಇನ್ನೂ ಬಾಕಿ ಇದೆ. ಭಾರತಕ್ಕೆ ಹಸ್ತಾಂತರವಾಗುವುದರಿಂದ ತಪ್ಪಿಸಿಕೊಳ್ಳುವುದಕ್ಕಾಗಿ ಈ ರೀತಿ ವರ್ತಿಸುತ್ತಿದ್ದಾರೆಂದು ಅವರ ವಿರುದ್ದ ಆರೋಪಗಳು ಕೇಳಿ ಬರುತ್ತಿವೆ.
ಮಲ್ಯ ದೇಶದಿಂದ ಪಾರಿಯಾದ ನಂತರ ಬ್ಯಾಂಕುಗಳು ಕೋರ್ಟ್ ನಿಂದ ಅನುಮತಿ ಪಡೆದು ಗೋವಾದಲ್ಲಿನ ಕಿಂಗ್ ಫಿಷರ್ ವಿಲ್ಲಾ ಮಾರಾಟ ಮಾಡಿದರು. ಇದರಿಂದ 10,815 ಕೋಟಿ ಬಂದಿತ್ತು. ಆದರೆ, ಮಲ್ಯ ಘಟಾನುಘಟಿ ನಾಯಕರು ಹಾಗೂ ಭಾರತ ಸರ್ಕಾರದ ವಿರುದ್ಧ ಗಂಭೀರ ಆರೋಪ ಮಾಡುತ್ತಲೇ ಇದ್ದಾರೆ. ಹಿಂದೆ ಕೂಡ ಇದೇ ರೀತಿ ಆರೋಪ ಮಾಡಿದ್ದರು.
ಮಲ್ಯ ಯಾವ ಬ್ಯಾಂಕ್ ಗೆ ಎಷ್ಟು ಪಾವತಿಸಬೇಕು?
ಒಟ್ಟು ಇನ್ನೂ ಎಷ್ಟು ಸಾಲ ಪಾವತಿಸಬೇಕು?
ಮಲ್ಯ ಪಾವತಿಸಬೇಕಾಗಿರುವ ಬಡ್ಡಿ ಎಷ್ಟು?
ಉದ್ಯಮಿ ವಿಜಯ್ ಮಲ್ಯ 2025ರ ಏಪ್ರಿಲ್ 10ರ ವರೆಗೆ 10,814 ಕೋಟಿ ರೂ. ಬಾಕಿ ಪಾವತಿಸಬೇಕಿದೆ. ಎಸ್ ಬಿಐ ಬ್ಯಾಂಕ್ ಗೆ ಸಾಲ, ಬಡ್ಡಿ, ಇನ್ನಿತರ ಶುಲ್ಕ ಸೇರಿದಂತೆ 1,939 ಕೋಟಿ ರೂ. ಪಾಲತಿಸಬೇಕಿದೆ. ಪಿಎನ್ ಬಿ ಬ್ಯಾಂಕ್ ಗೆ 1,197 ಕೋಟಿ ರೂ., ಐಡಿಬಿಐ ಬ್ಯಾಂಕ್ ಗೆ 939 ಕೋಟಿ ರೂ., ಬಿಒಐ ಬ್ಯಾಂಕ್ ಗೆ 708 ಕೋಟಿ ರೂ., ಬಿಒಬಿ ಬ್ಯಾಂಕ್ ಗೆ 605 ಕೋಟಿ ರೂ. ಪಾವತಿಸಬೇಕಿದೆ. ಅಂದರೆ ಅವರು ಒಟ್ಟು 6,848 ಕೋಟಿ ರೂ. ಹಣವನ್ನು ಮಲ್ಯ ಇನ್ನೂ ಪಾವತಿಸಬೇಕಿದೆ. ಅನಭಿಷಿಕ್ತ ದೊರೆ ಇದಕ್ಕೆ ಯಾವ ಉತ್ತರ ನೀಡುತ್ತಾರೆ ಎಂಬುವುದನ್ನು ಕಾಯ್ದು ನೋಡಬೇಕಿದೆ.
