ಭಾರತದ ಶಫಾಲಿ-ಸ್ಮೃತಿ ಜೋಡಿಯಿಂದ ವಿಶ್ವದಾಖಲೆ ಆರಂಭಿಕರ ಸಾಧನೆಯೇನು?

ನಾಟಿಂಗ್‌ಹ್ಯಾಮ್‌: ಇಂಗ್ಲೆಂಡ್‌ ವಿರುದ್ಧದ ಮಹಿಳಾ ಟಿ20ಐ ಸರಣಿಯ ಮೊದಲ ಪಂದ್ಯದಲ್ಲಿ ಭಾರತ ತಂಡದ ಆರಂಭಿಕ ಆಟಗಾರ್ತಿಯರಾದ ಶಫಾಲಿ ವರ್ಮಾ ಹಾಗೂ ಸ್ಮೃತಿ ಮಂಧಾನಾ ಇತಿಹಾಸ ನಿರ್ಮಿಸಿದ್ದಾರೆ. ಟ್ರೆಂಟ್‌ ಬ್ರಿಡ್ಜ್‌ನಲ್ಲಿ ನಡೆದ ಈ ಪಂದ್ಯದಲ್ಲಿ ಇಬ್ಬರೂ ಬ್ಯಾಟರ್‌ಗಳು ಮುರಿಯದ ಮೊದಲ ವಿಕೆಟ್‌ಗೆ 77 ರನ್‌ಗಳ ಅಮೂಲ್ಯ ಜೊತೆಯಾಟವಾಡುವ ಮೂಲಕ, ಮಹಿಳಾ ಟಿ20 ಕ್ರಿಕೆಟ್‌ನಲ್ಲಿ ಹೊಸ ವಿಶ್ವದಾಖಲೆ ಬರೆದಿದ್ದಾರೆ.

ಶನಿವಾರ ನಡೆದ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟ್ ಮಾಡುವ ಅವಕಾಶ ಪಡೆದ ಭಾರತ ತಂಡದ ಪರ ಸ್ಮೃತಿ ಮಂಧಾನಾ ಹಾಗೂ ಶಫಾಲಿ ವರ್ಮಾ ಜೋಡಿ ಆರಂಭದಿಂದಲೇ ಸಿಡಿಲಬ್ಬರದ ಬ್ಯಾಟಿಂಗ್ ಪ್ರದರ್ಶನ ನೀಡಿತು. ಈ ಜೊತೆಯಾಟದ ಮೂಲಕ ಶಫಾಲಿ ವರ್ಮಾ ಹಾಗೂ ಸ್ಮೃತಿ ಮಂಧಾನಾ ಟಿ20ಐ ಕ್ರಿಕೆಟ್‌ನಲ್ಲಿ ಮುರಿಯದ ಮೊದಲ ವಿಕೆಟ್‌ಗೆ 21ನೇ ಬಾರಿ 50ಕ್ಕಿಂತ ಹೆಚ್ಚು ರನ್‌ಗಳ ಜೊತೆಯಾಟವನ್ನು ಆಡಿದ್ದಾರೆ.

ಆ ಮೂಲಕ, ಈ ಹಿಂದೆ 20 ಬಾರಿ 50ಕ್ಕೂ ಹೆಚ್ಚು ಜೊತೆಯಾಟಗಳನ್ನು ಆಡಿದ್ದ ಆಸ್ಟ್ರೇಲಿಯಾದ ದೈತ್ಯ ಜೋಡಿ ಅಲೀಸಾ ಹೀಲಿ ಹಾಗೂ ಬೆಥ್ ಮೂನಿ ಅವರ ದಾಖಲೆಯನ್ನು ಭಾರತದ ಈ ಆರಂಭಿಕ ಜೋಡಿ ಮುರಿದು ಹಾಕಿದೆ. ಮಹಿಳಾ ಟಿ20ಐ ಕ್ರಿಕೆಟ್‌ನಲ್ಲಿ ಆರಂಭಿಕ ವಿಕೆಟ್‌ಗೆ ಅತಿ ಹೆಚ್ಚು ರನ್‌ ದಾಖಲಿಸಿದ ಮೊದಲ ಜೋಡಿ ಎಂಬ ವಿಶ್ವ ದಾಖಲೆಯನ್ನು ಮಂಧಾನಾ ಹಾಗೂ ಶಫಾಲಿ ಜೋಡಿ ಬರೆದಿದೆ. ಇದುವರೆಗೂ ಭಾರತದ ಈ ಜೋಡಿ 78 ಟಿ20ಐ ಇನ್ನಿಂಗ್ಸ್‌ಗಳಿಂದ 36.17ರ ಸರಾಸರಿಯಲ್ಲಿ ಮೂರು ಶತಕಗಳು ಹಾಗೂ 15 ಅರ್ಧಶತಕಗಳ ಮೂಲಕ ಒಟ್ಟು 2713 ರನ್‌ಗಳನ್ನು ಬಾರಿಸಿದೆ.

ಪಂದ್ಯದಲ್ಲಿ ಸ್ಫೋಟಕ ಆರಂಭ: ಸ್ಮೃತಿ ಮಂಧಾನಾ ಶತಕದ ಸಿಂಚನ!
ಭಾರತದ ಪರ ಇನ್ನಿಂಗ್ಸ್‌ ಆರಂಭಿಸಿದ ಶಫಾಲಿ ಹಾಗೂ ಮಂಧಾನಾ ಜೋಡಿ ಆರಂಭದಿಂದಲೇ ಸ್ಫೋಟಕ ಬ್ಯಾಟಿಂಗ್‌ ಪ್ರದರ್ಶನವನ್ನು ತೋರಿತು. ಪಂದ್ಯದ ಎರಡನೇ ಎಸೆತದಲ್ಲಿಯೇ ಸ್ಮೃತಿ ಮಂಧಾನಾ ಲೌರೆನ್ ಬೆಲ್‌ ಅವರಿಗೆ ಕವರ್‌ ಡ್ರೈವ್‌ ಮೂಲಕ ಬೌಂಡರಿ ಬಾರಿಸಿ ಶುಭಾರಂಭ ಮಾಡಿದರು. ಎರಡನೇ ಓವರ್‌ನಲ್ಲಿ ಹಂಗಾಮಿ ನಾಯಕಿ ಇನ್ನೂ ಎರಡು ಬೌಂಡರಿಗಳನ್ನು ಸಿಡಿಸಿ ತಮ್ಮ ಲಯ ಕಂಡುಕೊಂಡರು.

ಇನ್ನು ಎಂಟು ತಿಂಗಳ ಬಳಿಕ ಭಾರತ ತಂಡಕ್ಕೆ ಮರಳಿದ್ದ ಶಫಾಲಿ ವರ್ಮಾ ಲೌರೆನ್‌ ಫಿಲರ್‌ಗೆ ಮೊದಲ ಬೌಂಡರಿ ಬಾರಿಸಿ ತಮ್ಮ ಆಗಮನವನ್ನು ಗುರುತಿಸಿದರು. ಆರಂಭಿಕ ಬ್ಯಾಟ್ಸ್‌ವುಮೆನ್‌ ಶಫಾಲಿ ವರ್ಮಾ ಒಂದು ಜೀವದಾನ ಕೂಡ ಪಡೆದರು. ಇದೇ ಓವರ್‌ನ ಕೊನೆಯ ಎಸೆತದಲ್ಲಿ ಅವರು ಚೆಂಡನ್ನು ತಮ್ಮ ಹೆಲ್ಮೆಟ್‌ಗೆ ಹೊಡೆಸಿಕೊಂಡಿದ್ದರು. ಈ ವೇಳೆ ಅಂಪೈರ್‌ ಬ್ಯಾಟ್‌ಗೆ ತಾಗಿರಬಹುದೆಂದು ಔಟ್‌ ಕೊಟ್ಟರೂ, ಡಿಆರ್‌ಎಸ್ ಪಡೆದ ಶಫಾಲಿ ನಾಟ್‌ಔಟ್‌ ಆಗಿ ಉಳಿದರು. ಈ ಬಳಿಕ ಮತ್ತೊಂದು ಬೌಂಡರಿ ಬಾರಿಸಿ ಆತ್ಮವಿಶ್ವಾಸ ಹೆಚ್ಚಿಸಿಕೊಂಡರು.

ನಂತರ ಇಬ್ಬರೂ ಬ್ಯಾಟರ್‌ಗಳು ಇಂಗ್ಲೆಂಡ್‌ ಬೌಲರ್‌ಗಳ ಮೇಲೆ ನಿರ್ದಯಿ ದಾಳಿ ನಡೆಸಿದರು. ಸ್ಮೃತಿ ಮಂಧಾನಾ ಕೇವಲ 37 ಎಸೆತಗಳಲ್ಲಿ ಅರ್ಧಶತಕವನ್ನು ಪೂರ್ಣಗೊಳಿಸಿದರು. ಸೋಫಿ ಎಕ್ಲೆಸ್ಟೋನ್ ಅವರ ಓವರ್‌ನಲ್ಲಿ ಮಂಧಾನಾ ಒಂದು ಬೌಂಡರಿ ಹಾಗೂ ಎರಡು ಸಿಕ್ಸರ್‌ ಸೇರಿದಂತೆ 19 ರನ್‌ಗಳನ್ನು ಬಾರಿಸಿ ಅಬ್ಬರಿಸಿದರು.

ಅರ್ಧಶತಕ ಬಾರಿಸಿದ ಬಳಿಕವೂ ಸ್ಮೃತಿ ಮಂಧಾನಾ ತಮ್ಮ ಬ್ಯಾಟಿಂಗ್‌ ವೇಗವನ್ನು ಹೆಚ್ಚಿಸಿಕೊಂಡರು. ಕೇವಲ 62 ಎಸೆತಗಳಲ್ಲಿ ಮೂರು ಸಿಕ್ಸರ್‌ ಹಾಗೂ 15 ಬೌಂಡರಿಗಳೊಂದಿಗೆ 112 ರನ್‌ಗಳನ್ನು ಸಿಡಿಸಿ ಶತಕವನ್ನು ಪೂರ್ಣಗೊಳಿಸಿದರು. ಇದರೊಂದಿಗೆ ಮೂರು ಸ್ವರೂಪದಲ್ಲಿ (ಟೆಸ್ಟ್, ಏಕದಿನ, ಟಿ20ಐ) ಶತಕಗಳನ್ನು ಬಾರಿಸಿದ ಭಾರತದ ಮೊದಲ ಆಟಗಾರ್ತಿ ಎಂಬ ನೂತನ ದಾಖಲೆಯನ್ನು ಸ್ಮೃತಿ ಮಂಧಾನಾ ಬರೆದರು. ಈ ಜೋಡಿಯ ಅಬ್ಬರದ ಪ್ರದರ್ಶನವು ಮುಂದಿನ ಪಂದ್ಯಗಳಲ್ಲಿ ಭಾರತದ ಗೆಲುವಿಗೆ ಪ್ರಮುಖ ಪಾತ್ರ ವಹಿಸುವ ಭರವಸೆ ಮೂಡಿಸಿದೆ.