ಬೆಂಗಳೂರು: ಸ್ವಂತದ್ದೊಂದು ಸೂರು, ಮಗಳ ಮದುವೆ, ಮಗನ ಉನ್ನತ ಶಿಕ್ಷಣ, ಓಡಾಡಲು ಕಾರು… ಹೀಗೆ ಜೀವನ ಪೂರ್ತಿ ಕುಟುಂಬಕ್ಕಾಗಿ ದುಡಿಯುವ ಅಪ್ಪ, ಇಂತಹ ಕಾರಣಗಳಿಗಾಗಿ ಸಾಲ ಮಾಡುತ್ತಾನೆ. ಆದರೆ, ಸಾಲ ಮಾಡಿದ ಅಪ್ಪನು ತೀರಿಸುವ ಮೊದಲೇ ಮೃತಪಟ್ಟರೆ ಆ ಸಾಲವನ್ನು ಯಾರು ತೀರಿಸುತ್ತಾರೆ? ಮಗನೇ ಆ ಸಾಲವನ್ನು ತೀರಿಸಬೇಕಾ? ಕಾನೂನು ಏನು ಹೇಳುತ್ತದೆ? ಇಲ್ಲಿದೆ ಮಾಹಿತಿ.
ಸಂದರ್ಭಗಳು ಮುಖ್ಯ
ತಂದೆಯು ಸಾಲ ತೆಗೆದುಕೊಂಡು ಅದನ್ನು ಪಾವತಿಸುವ ಮೊದಲೇ ತೀರಿ ಹೋದರೆ ಕೆಲವು ಸಂದರ್ಭಗಳಲ್ಲಿ ಮಾತ್ರ ಮಗನು ತನ್ನ ತಂದೆಯ ಸಾಲವನ್ನು ತೀರಿಸಬೇಕಾಗಬಹುದು. ಆದರೆ ಅದು ಸಂಪೂರ್ಣವಾಗಿ ಸಂದರ್ಭಗಳನ್ನು ಅವಲಂಬಿಸಿರುತ್ತದೆ. ಭಾರತೀಯ ಉತ್ತರಾಧಿಕಾರ ಕಾಯ್ದೆ 1925ರ ಪ್ರಕಾರ, ಒಬ್ಬ ವ್ಯಕ್ತಿ ಮರಣ ಹೊಂದಿದ್ದು, ಆತ ಮಾಡಿದ ಸಾಲ ಸಂದಾಯವಾಗಿರದೇ ಇದ್ದರೆ, ಅಂತಹ ಸಂದರ್ಭದಲ್ಲಿ ಬ್ಯಾಂಕುಗಳು ಮಗನ ಆಸ್ತಿಯಿಂದ ಸಾಲವನ್ನು ರಿಕವರಿ ಮಾಡಿಕೊಳ್ಳುತ್ತವೆ.
ಇದರ ಜತೆಗೆ ಸಿಪಿಸಿ ಸೆಕ್ಷನ್ 50 ರ ಪ್ರಕಾರ ಉತ್ತರಾಧಿಕಾರಿಯು ತನ್ನ ತಂದೆಯ ಸಾಲವನ್ನು ಮರು ಪಾವತಿಸಲು ಹೊಣೆಗಾರನಾಗಿರುತ್ತಾನೆ. ಇದು ಯಾವಾಗ ಅನ್ವಯವಾಗುತ್ತದೆ ಎಂದರೆ, ಮಗನು ತಂದೆಯಿಂದ ಆಸ್ತಿ ಪಡೆದಿದ್ದಾಗ ಮಾತ್ರ. ಒಂದು ವೇಳೆ ಉತ್ತರಾಧಿಕಾರಿ ಅಂದರೆ ಮಗ ಮೃತ ತಂದೆಯಿಂದ ಪಿತ್ರಾರ್ಜಿತ ಆಸ್ತಿಯನ್ನು ಪಡೆದಿಲ್ಲದಿದ್ದರೆ, ಅಂತಹ ಸಂದರ್ಭದಲ್ಲಿ ಆ ಸಾಲದ ಹೊರೆ ಮಗನ ತಲೆಯ ಮೇಲೆ ಬೀಳುವುದಿಲ್ಲ.
ಭಾರತೀಯ ಒಪ್ಪಂದ ಕಾಯ್ದೆ 1872ರ ಪ್ರಕಾರ, ಯಾವುದೇ ಸಾಲಕ್ಕೆ ಕಾನೂನುಬದ್ಧ ಹೊಣೆಗಾರಿಕೆಯು ಒಪ್ಪಂದ ಮಾಡಿಕೊಂಡ ವ್ಯಕ್ತಿಗೆ ಮಾತ್ರ ಅನ್ವಯಿಸುತ್ತದೆ. ಮಗ ಯಾವುದೇ ರೀತಿಯಲ್ಲಿ ತಂದೆ ಪಡೆದ ಸಾಲಕ್ಕೆ ಜಾಮೀನುದಾರನಾಗದಿದ್ದರೆ, ಅವನು ವೈಯಕ್ತಿಕವಾಗಿ ಇದಕ್ಕೆ ಹೊಣೆಗಾರನಾಗಿರುವುದಿಲ್ಲ. ಮಗ ಏನಾದರೂ ಜಾಮೀನುದಾರನಾಗಿದ್ದರೆ ಸಂಪೂರ್ಣವಾಗಿ ಸಾಲ ತೀರಿಸುವ ಜವಾಬ್ದಾರಿ ಮಗನ ಮೇಲೆ ಬೀಳುತ್ತದೆ.
