ಭಾರತದ ಜನಸಂಖ್ಯೆಯ ಓಟ ಹೇಗಿದೆ? ಮಕ್ಕಳನ್ನು ಹೆರುವ ಸಾಮರ್ಥ್ಯ ಕಡಿಮೆಯಾಗುತ್ತಿದೆಯೇ?

ಒಂದು ಮಾತಿದೆ….ಬಡಿಯೋ ಕೈಯಲ್ಲಿ ಎರಡು ರೊಟ್ಟಿ ಹೆಚ್ಚಿಗೆ ಬಡಿ, ಹಡಿಯೋ ಕೈಯಲ್ಲಿ ಎರಡು ಮಕ್ಕಳನ್ನು ಹೆಚ್ಚಿಗೆ ಹಡಿ ಅಂತಾ… ಮನೆಗೆ ಯಾವಾಗ ಅತಿಥಿಗಳು ಬರುತ್ತಾರೋ ಗೊತ್ತಿಲ್ಲ. ಹೀಗಾಗಿ ಮನೆಯಲ್ಲಿ ಊಟ ಹೆಚ್ಚಿಗೆ ಇರಲಿ. ಪರಿಸ್ಥಿತಿ ಯಾವ ರೀತಿ ಬರುತ್ತದೆಯೋ ಗೊತ್ತಿಲ್ಲ, ಎರಡು ಮಕ್ಕಳನ್ನು ಹೆಚ್ಚಾಗಿಯೇ ಹೆರಬೇಕು ಅಂತಾ ಇದರ ಅರ್ಥ. ಹೀಗಾಗಿಯೇ ಭಾರತ ವಿಶ್ವದಲ್ಲೇ ಅತೀ ಹೆಚ್ಚು ಜನ ಸಂಖ್ಯೆ ಹೊಂದಿರುವ ರಾಷ್ಟ್ರ. ಆದರೆ, ಈಗ ಭಾರತದಲ್ಲಿನ ಮಹಿಳೆಯರ ಫಲವತ್ತತೆಯ ಸರಾಸರಿ ಕಡಿಮೆಯಾಗುತ್ತಿದ್ದು, ಮುಂದೆ ಜನಸಂಖ್ಯೆ ಇಳಿಮುಖದತ್ತ ಹೋಗಬಹುದು ಎಂದು ವರದಿಯೊಂದು ಹೇಳುತ್ತಿದೆ.

ಮಹಿಳೆಯರ ಸಂತಾನೋತ್ಪತ್ತಿ ಸರಾಸರಿ ಎಷ್ಟಿದೆ?
ಜನ್ಮ ನೀಡುವ ಸಾಮರ್ಥ್ಯ ಕುಸಿತ!
ಅಗತ್ಯವಿರುವಷ್ಟು ಜನ್ಮ ನೀಡುವ ಸಾಮರ್ಥ್ಯ ಇಲ್ಲವಾಗುತ್ತಿದಯೇ?

ಸದ್ಯ 140 ಕೋಟಿ ಆಸುಪಾಸಿನಲ್ಲಿರುವ ಭಾರತೀಯರ ಜನಸಂಖ್ಯೆ 2025ರ ವೇಳೆ 146 ಕೋಟಿ ತಲುಪಲಿದೆ ಎಂದು ವಿಶ್ವ ಸಂಸ್ಥೆಯ ಜನಸಂಖ್ಯೆಯ ವರದಿ ಹೇಳುತ್ತಿದೆ. ಈ ಕುರಿತು ಯುನೈಟೆಡ್ ನೇಷನ್ಸ್ ಪಾಪ್ಯೂಲೇಷನ್ ಫಂಡ್(United Nations Population Fund) ವರದಿಯೊಂದನ್ನು ಬಿಡುಗಡೆ ಮಾಡಿದೆ. ಈ ವರದಿಯಲ್ಲಿ ಭಾರತದ ಜನಸಂಖ್ಯೆ ಇನ್ನು ಮುಂದೆ ಕಡಿಮೆ ವೇಗ ಪಡೆಯಲಿದೆ. ಏಕೆಂದರೆ ಭಾರತದ ಮಹಿಳೆಯರ ಸಂತಾನೋತ್ಪತ್ತಿಯ ಸರಾಸರಿ ಫಲವತ್ತತೆ ದರ (Fertility Rate ) ಕುಸಿಯುತ್ತಿದೆ. ಈ ಹಿಂದೆ ಭಾರತೀಯ ಮಹಿಳೆಯರ ಸಂತಾನೋತ್ಪತ್ತಿ ಸರಾಸರಿ ಫಲವತ್ತತೆ 2.1ರಷ್ಟಿತ್ತು. ಆದರೆ, ಈಗ ಅದು 1.9ಕ್ಕೆ ಕುಸಿದಿದೆ. ಈ ಮೂಲಕ ಭಾರತೀಯ ಮಹಿಳೆಯರು ಮಕ್ಕಳಿಗೆ ಜನ್ಮ ನೀಡುವ ಸಾಮರ್ಥ್ಯವನ್ನು ಕಳೆದುಕೊಳುತ್ತಿದ್ದಾರೆ. ಈ ಸಾಮರ್ಥ್ಯದ ಕುಸಿತ ಜನಸಂಖ್ಯೆಯ ಮೇಲೆಯೂ ಪರಿಣಾಮ ಬೀರುತ್ತಿದೆ. ತಲೆಮಾರಿನಿಂದ ತಲೆಮಾರಿಗೆ ಅಗತ್ಯವಿರುವಷ್ಟು ಜನಸಂಖ್ಯೆ ಗಾತ್ರ ಕಾಪಾಡಲು ಇದು ಹೊಡೆತ ನೀಡುತ್ತಿದೆ ಎಂದು ವರದಿ ಹೇಳಿದೆ. 1960ರಲ್ಲಿ ಭಾರತದ ಜನಸಂಖ್ಯೆಯು ಸುಮಾರು 43.6 ಕೋಟಿ ಇದ್ದಾಗ ಸರಾಸರಿ ಮಹಿಳೆ ಸುಮಾರು ಆರು ಮಕ್ಕಳನ್ನು ಹೆರುತ್ತಿದ್ದರು. ಆಗ ಮಹಿಳೆ ಸರಾಸರಿಯಾಗಿ ಇಬ್ಬರು ಮಕ್ಕಳನ್ನು ಹೊಂದಿದ್ದರು. ಆದರೆ, ಈಗ ಪ್ರಮಾಣ ಕ್ಷೀಣಿಸುತ್ತಾ ಸಾಗುತ್ತಿದೆ. ಫಲವತ್ತತೆಯು ಒಂದು ಕಾರಣವಾದರೆ, ಹೆಚ್ಚು ಮಕ್ಕಳು ಬೇಡ ಎನ್ನುವ ಅಸಡ್ಡೆ ಮತ್ತೊಂದು ಕಾರಣವಾಗುತ್ತಿದೆ.

ಹಾಗಾದರೆ ಮುಂದೆ ಭಾರತದ ಜನಸಂಖ್ಯೆ ಹೇಗಿರಲಿದೆ?
ಜನಸಂಖ್ಯೆ ಏರುತ್ತ ಸಾಗಲಿದೆಯೇ?
ಅಥವಾ ಜನಸಂಖ್ಯೆ ಇಳಿಮುಖವಾಗಲಿದೆಯೇ?

ವರದಿಯಂತೆ ಭಾರತೀಯ ಜನಸಂಖ್ಯೆ ಮುಂದಿನ ದಿನಗಳಲ್ಲೂ ಏರುತ್ತಲೇ ಸಾಗುತ್ತದೆ. ಏಕೆಂದರೆ ದೇಶದಲ್ಲಿ ಯುವ ಪೀಳಿಗೆ ಹೆಚ್ಚಾಗಿದೆ. ಭಾರತ ಯುವಕರ ನಾಡು. ಹೀಗಾಗಿ 150ರ ಆಸುಪಾಸಿನಲ್ಲಿರುವ ಜನಸಂಖ್ಯೆ 170ರ ಗಡಿಯವರೆಗೂ ಸಾಗಲಿದೆ. ಆದರೆ, ಆನಂತರ ದೇಶದ ಜನಸಂಖ್ಯೆ ಕುಸಿಯುತ್ತ ಸಾಗಲಿದೆ. ಕಾರಣ ಫಲವತ್ತತೆಯ ದರ ಕಡಿಮೆಯಾಗುತ್ತಿರುವುದು. ಮುಂದಿನ ದಿನಗಳಲ್ಲಿ ಆ ಫಲವತ್ತತೆಯ ದರ ಮತ್ತಷ್ಟು ಕ್ಷೀಣವಾಗಲಿದೆ ಎಂದು ಅಂದಾಜಿಸಲಾಗುತ್ತಿದೆಯಾದರೂ ಈ ಕ್ಷೀಣಿಸುವ ಕುರಿತು ವರದಿ ಹೇಳಿಲ್ಲ. ಭಾರತೀಯ ಜನಸಂಖ್ಯೆ 170 ಕೋಟಿಯ ಗಡಿಗೆ ತಲುಪಿದ ನಂತರ ನಿಧಾನವಾಗಿ ಭಾರತೀಯ ಜನಸಂಖ್ಯೆ ಕ್ಷೀಣಿಸುತ್ತ ಸಾಗುತ್ತದೆ. ನಂತರ 40 ವರ್ಷಗಳ ಬಳಿಕ ಇಳಿಮುಖವಾಗಲಿದೆ. ಜನನ ದರ ನಿಧಾನವಾದರೂ ಸದ್ಯ ಯುವ ಜನಸಂಖ್ಯೆ ಹೆಚ್ಚಾಗಿರುವುದು ಸಂತಸದ ಸಂಗತಿ.

ದೇಶದಲ್ಲಿ ಪ್ರಸ್ತುತ ಜನಸಂಖ್ಯೆಯ ಮಾನದಂಡ ಹೇಗಿದೆ?
ಭಾರತದಲ್ಲಿ ಯುವ ಪೀಳಿಗೆಯ ಸಂಖ್ಯೆ ಹೇಗಿದೆ?
ಯಾವ ವಯೋಮಾನದವರು ಎಷ್ಟಿದ್ದಾರೆ?

ದೇಶವು ಈಗಲೂ ಯಂಗ್ ಇಂಡಿಯಾ ಆಗಿದೆ. ದೇಶದಲ್ಲಿ 14ರೊಳಗಿನ ವಯೋಮಾನದವರ ಸಂಖ್ಯೆ ಶೇ.24ರಷ್ಟಿದ್ದರೆ, 10 ರಿಂದ 19ರ ವಯೋಮಾನದವರ ಸಂಖ್ಯೆ ಶೇ.17ರಷ್ಟಿದೆ. 15ರಿಂದ 64ರೊಳಗೆ ದುಡಿಯುವ ವಯೋಮಾನದವರ ವರ್ಗ ಶೇ. 68ರಷ್ಟಿದೆ. ದೇಶದ ಜನರ ಜೀವಿತಾವಧಿ ಪುರುಷರದ್ದು 71 ವರ್ಷವಾಗಿದ್ದರೆ, ಮಹಿಳೆಯರದ್ದು 74ರಷ್ಟಿದೆ ಎಂದು ವರದಿ ಹೇಳುತ್ತಿದೆ.