ಕಾನ್ಪುರ: ಹಣದಾಸೆ ಮತ್ತು ಅನೈತಿಕ ಸಂಬಂಧಕ್ಕಾಗಿ ತಾಯಿಯೊಬ್ಬಳು ತನ್ನ ಪ್ರೀತಿಯ ಮಗನನ್ನೇ ಪ್ರಿಯಕರನೊಂದಿಗೆ ಸೇರಿ ಬರ್ಬರವಾಗಿ ಹತ್ಯೆ ಮಾಡಿರುವ ಆಘಾತಕಾರಿ ಘಟನೆ ಉತ್ತರ ಪ್ರದೇಶದ ಕಾನ್ಪುರ ದೆಹತ್‌ನಲ್ಲಿ ನಡೆದಿದೆ. ಈ ಘಟನೆಯು ಇಡೀ ಜಿಲ್ಲೆಯನ್ನೇ ಬೆಚ್ಚಿ ಬೀಳಿಸಿದ್ದು, ಮಗನ ಹೆಸರಿನಲ್ಲಿದ್ದ 1 ಕೋಟಿ ರೂಪಾಯಿಗೂ ಅಧಿಕ ಮೌಲ್ಯದ ವಿಮಾ ಹಣಕ್ಕಾಗಿ ಈ ಕೃತ್ಯ ಎಸಗಿರುವುದು ಪೊಲೀಸ್ ತನಿಖೆಯಿಂದ ಬಯಲಾಗಿದೆ.
ಅಕ್ರಮ ಸಂಬಂಧ ಮತ್ತು ವಿಮೆಯ ಹಣವೇ ಕೊಲೆಗೆ ಕಾರಣ
ಕಾನ್ಪುರ ದೆಹತ್‌ನ ಅಂಗದಪುರ ನಿವಾಸಿ ಮಮತಾ ಸಿಂಗ್ ಎಂಬ ಮಹಿಳೆಯೇ ಈ ಕೃತ್ಯದ ಪ್ರಮುಖ ಆರೋಪಿ. ಪತಿಯ ಮರಣದ ನಂತರ, ಮಮತಾ ತನ್ನ ಪ್ರಿಯಕರ ಮಯಾಂಕ್ ಕಟಿಯಾರ್ ಜೊತೆ ಅನೈತಿಕ ಸಂಬಂಧ ಹೊಂದಿದ್ದಳು. ತಾಯಿಯ ಈ ಸಂಬಂಧವನ್ನು 25 ವರ್ಷದ ಮಗ ಪ್ರದೀಪ್ ಸಿಂಗ್ ತೀವ್ರವಾಗಿ ವಿರೋಧಿಸುತ್ತಿದ್ದ. ಈ ಸಂಬಂಧವನ್ನು ನಿಲ್ಲಿಸುವಂತೆ ಪದೇ ಪದೇ ತಾಯಿಗೆ ಬುದ್ಧಿ ಹೇಳುತ್ತಿದ್ದ. ಆದರೆ, ಪ್ರಿಯಕರನೊಂದಿಗೆ ಸೇರಲು ನಿರ್ಧರಿಸಿದ್ದ ಮಮತಾ, ತನ್ನ ಮಗನನ್ನೇ ನಿವಾಳಿಸಲು ನಿರ್ಧರಿಸಿದ್ದಳು. ಇದಕ್ಕಾಗಿ, ಮಗನ ಹೆಸರಿನಲ್ಲಿ 1 ಕೋಟಿ ರೂಪಾಯಿಗೂ ಅಧಿಕ ಮೌಲ್ಯದ ನಾಲ್ಕು ಜೀವ ವಿಮಾ ಪಾಲಿಸಿಗಳನ್ನು ಮಾಡಿಸಿದ್ದಳು. ಈ ವಿಮಾ ಹಣವನ್ನು ಪಡೆದು, ಪ್ರಿಯಕರನೊಂದಿಗೆ ನೆಮ್ಮದಿಯಾಗಿರಲು ಈ ಕೊಲೆ ಸಂಚು ರೂಪಿಸಿದ್ದಾಳೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಅಪಘಾತವೆಂದು ಬಿಂಬಿಸಲು ಯತ್ನ
ಘಟನೆ ನಡೆದ ದಿನ, ಮಮತಾ ಮತ್ತು ಆಕೆಯ ಪ್ರಿಯಕರ ಮಯಾಂಕ್, ಊಟದ ನೆಪದಲ್ಲಿ ಪ್ರದೀಪ್‌ನನ್ನು ಮನೆಗೆ ಕರೆಸಿಕೊಂಡಿದ್ದಾರೆ. ಊಟ ಮುಗಿಸಿ ವಾಪಸ್ ತೆರಳುತ್ತಿದ್ದಾಗ, ಮಾರ್ಗಮಧ್ಯೆ ಮಯಾಂಕ್ ಮತ್ತು ಆತನ ಸಹೋದರ ರಿಷಿ, ಪ್ರದೀಪ್‌ನ ಮೇಲೆ ಸುತ್ತಿಗೆಯಿಂದ ಮಾರಣಾಂತಿಕ ಹಲ್ಲೆ ನಡೆಸಿದ್ದಾರೆ. ತೀವ್ರ ರಕ್ತಸ್ರಾವದಿಂದ ಪ್ರದೀಪ್ ಸ್ಥಳದಲ್ಲೇ ಸಾವನ್ನಪ್ಪಿದ್ದಾನೆ. ನಂತರ, ಈ ಕೊಲೆಯನ್ನು ರಸ್ತೆ ಅಪಘಾತವೆಂದು ಬಿಂಬಿಸಲು, ಶವವನ್ನು ಹೆದ್ದಾರಿಯ ಬದಿಯಲ್ಲಿ ಎಸೆದು ಪರಾರಿಯಾಗಿದ್ದರು.
ತನಿಖೆ ಮತ್ತು ಬಂಧನ
ಆದರೆ, ಮರಣೋತ್ತರ ಪರೀಕ್ಷೆಯಲ್ಲಿ ಪ್ರದೀಪ್‌ನ ದೇಹದ ಮೇಲೆ ಹಲವು ಮೂಳೆ ಮುರಿತಗಳು ಮತ್ತು ತಲೆಗೆ ತೀವ್ರವಾದ ಗಾಯಗಳಾಗಿರುವುದು ಪತ್ತೆಯಾಗಿದೆ. ಇದು ಅಪಘಾತವಲ್ಲ, ಬದಲಿಗೆ ಕೊಲೆ ಎಂದು ದೃಢಪಟ್ಟಿದೆ. ತನಿಖೆ ಚುರುಕುಗೊಳಿಸಿದ ಪೊಲೀಸರು, ಮೊಬೈಲ್ ಲೊಕೇಶನ್ ಡೇಟಾ ಆಧರಿಸಿ, ಕೊಲೆಯ ಸಮಯದಲ್ಲಿ ಮಮತಾ ಮತ್ತು ಆಕೆಯ ಪ್ರಿಯಕರ ಮಯಾಂಕ್ ಒಂದೇ ಸ್ಥಳದಲ್ಲಿದ್ದರು ಎಂಬುದನ್ನು ಪತ್ತೆಹಚ್ಚಿದ್ದಾರೆ.
ವಿಚಾರಣೆ ವೇಳೆ, ಮಯಾಂಕ್ ತನ್ನ ತಪ್ಪೊಪ್ಪಿಕೊಂಡಿದ್ದು, ವಿಮಾ ಹಣಕ್ಕಾಗಿ ಮಮತಾಳೇ ಈ ಕೊಲೆಗೆ ಸಂಚು ರೂಪಿಸಿದ್ದಳು ಎಂದು ಬಾಯ್ಬಿಟ್ಟಿದ್ದಾನೆ. ಪೊಲೀಸರು ಮಯಾಂಕ್‌ನನ್ನು ಬಂಧಿಸಿದ್ದು, ಮತ್ತೊಬ್ಬ ಆರೋಪಿ ರಿಷಿ ಕಟಿಯಾರ್‌ನನ್ನು ಎನ್‌ಕೌಂಟರ್ ನಡೆಸಿ ಬಂಧಿಸಿದ್ದಾರೆ. ಈ ವೇಳೆ ರಿಷಿ ಕಾಲಿಗೆ ಗುಂಡೇಟು ತಗುಲಿದೆ. ಕೃತ್ಯಕ್ಕೆ ಬಳಸಿದ್ದ ಸುತ್ತಿಗೆ, ನಾಡ ಪಿಸ್ತೂಲ್ ಹಾಗೂ ಕಾರನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ. ಆದರೆ, ಪ್ರಕರಣದ ಪ್ರಮುಖ ಆರೋಪಿ, ‘ಕಟುಕ ತಾಯಿ’ ಮಮತಾ ಸಿಂಗ್ ಇನ್ನೂ ತಲೆಮರೆಸಿಕೊಂಡಿದ್ದು, ಆಕೆಯ ಪತ್ತೆಗಾಗಿ ಹಲವು ಪೊಲೀಸ್ ತಂಡಗಳನ್ನು ರಚಿಸಲಾಗಿದೆ.
ಊರಿಗೆ ಊರೇ ಬೆಚ್ಚಿಬಿದ್ದಿದೆ
ಈ ಘಟನೆಯಿಂದ ಇಡೀ ಗ್ರಾಮವೇ ಆಘಾತಕ್ಕೆ ಒಳಗಾಗಿದೆ. ಪ್ರದೀಪ್ ಅತ್ಯಂತ ಸಭ್ಯ ಯುವಕನಾಗಿದ್ದು, ತನ್ನ ತಾಯಿಯನ್ನು ಚೆನ್ನಾಗಿ ನೋಡಿಕೊಳ್ಳುತ್ತಿದ್ದ ಎಂದು ಸ್ಥಳೀಯರು ಕಂಬನಿ ಮಿಡಿದಿದ್ದಾರೆ. “ಹಣಕ್ಕಾಗಿ ಮಮತಾ ಇಂತಹ ಹೀನ ಕೃತ್ಯಕ್ಕೆ ಇಳಿಯುತ್ತಾಳೆಂದು ನಾವು ಕನಸಲ್ಲೂ ಊಹಿಸಿರಲಿಲ್ಲ” ಎಂದು ಪ್ರದೀಪ್‌ನ ಅಜ್ಜ ಜಗದೀಶ್ ನಾರಾಯಣ್ ಕಣ್ಣೀರು ಹಾಕಿದ್ದಾರೆ. ಮಮತಾಳ ಬಂಧನದ ನಂತರವಷ್ಟೇ ಕೊಲೆಯ ಸಂಚು ಮತ್ತು ವಿಮಾ ಪ್ರಕ್ರಿಯೆಗಳ ಬಗ್ಗೆ ಇನ್ನಷ್ಟು ವಿವರಗಳು ಲಭ್ಯವಾಗಲಿವೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಇದನ್ನೂ ಓದಿ: ಸ್ನೇಹಿತರ ಜೊತೆ ಸೇರಿ ತಾಯಿಯನ್ನೇ ಹತ್ಯೆಗೈದ ಅಪ್ರಾಪ್ತ ಮಗಳು
