ಭಾರತೀಯ ಷೇರುಪೇಟೆ ಪಾಲಿಗಿಂದು ನಿಜಕ್ಕೂ ಶುಭ ಸೋಮವಾರ. ವಾರದ ಮೊದಲ ದಿನವೇ ವಹಿವಾಟು ಉತ್ತುಂಗಕ್ಕೇರುವ ಮೂಲಕ ದಾಖಲೆ ಬರೆದಿದೆ. ಮುಂಬೈ ಷೇರುಪೇಟೆಯಲ್ಲಿ ಆರಂಭಿಕ ವಹಿವಾಟು ಉತ್ತಮವಾಗಿದ್ದು, ಸೂಚ್ಯಂಕ 850 ಅಂಕಗಳ ಏರಿಕೆಯೊಂದಿಗೆ ದಾಖಲೆಯ 80089 ಅಂಕಗಳ ವಹಿವಾಟು ದಾಖಲಿಸಿತು.
ನಿಫ್ಟಿ ಕೂಡ ಉತ್ತಮ ವಹಿವಾಟು ಕಂಡು 24,283 ಅಂಕಗಳನ್ನು ದಾಖಲಿಸಿತು. ಅಷ್ಟಕ್ಕೂ ಮಾರುಕಟ್ಟೆಯ ಈ ದಾಖಲೆ ವಹಿವಾಟಿನ ಹಿಂದೆ ಹಲವು ಬೆಳವಣಿಗೆಗಳು ಅಡಗಿವೆ. ಒಂದೆಡೆ ಚೀನಾ ಮಾರುಕಟ್ಟೆ ಮೇಲೆ ಟ್ರಂಪ್ ವಕ್ರದೃಷ್ಟಿ ಇನ್ನೂ ಮುಂದುವರಿದಿದೆ. ಯಾವುದೇ ಕಾರಣಕ್ಕೂ ತೆರಿಗೆ ಪರಿಷ್ಕರಿಸುವ ಪ್ರಶ್ನೆಯೇ ಇಲ್ಲ ಅಂತಾ ಟ್ರಂಪ್ ಸ್ಪಷ್ಟಪಡಿಸಿದ್ದಾರೆ.
ಹೀಗಾಗಿ ಹೂಡಿಕೆದಾರರಿಗೆ ಭಾರತ ಸೇಫ್ ಮಾರುಕಟ್ಟೆಯಾಗಿದೆ. ಇನ್ನೊಂದೆಡೆ, ಪಹಲ್ಗಾಮ್ ಹತ್ಯಾಕಾಂಡವನ್ನು ಭಾರತ ನಿಭಾಯಿಸಿದ ರೀತಿ ಹೂಡಿಕೆದಾರ ಭರವಸೆ ಹೆಚ್ಚಿಸಿದೆ. ಉಳಿದಂತೆ ಭಾರತದ ಪ್ರಮುಖ ಉದ್ದಿಮೆಗಳಾದ ರಿಲಯನ್ಸ್, ಐಸಿಐಸಿಐ, ಹೆಚ್ ಡಿಎಫ್ ಸಿ ಷೇರುಗಳು ಉತ್ತಮ ಬೆಳವಣಿಗೆ ಕಂಡಿರುವುದು ಹೂಡಿಕೆದಾರರ ಉತ್ಸಾಹವನ್ನು ಇಮ್ಮಡಿಗೊಳಿಸಿದೆ. ಹೀಗಾಗಿಯೇ ಮುಂಬೈ ಮಾರುಕಟ್ಟೆಯಲ್ಲಿ ಹೂಡಿಕೆ ಉತ್ತುಂಗಕ್ಕೇರುವ ಮೂಲಕ ಮಾರುಕಟ್ಟೆಯಲ್ಲಿ ಗೂಳಿ ಆರ್ಭಟಿಸುವಂತೆ ಮಾಡಿದೆ.
