ಬೆಂಗಳೂರು: ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆಯು (ಇಪಿಎಫ್ಒ) ಇತ್ತೀಚೆಗೆ ಹಲವು ಸುಧಾರಣೆಗಳನ್ನು ಜಾರಿಗೆ ತಂದಿದೆ. ಸುಲಭವಾಗಿ ಪಿಎಫ್ ಮೊತ್ತದ ವಿತ್ ಡ್ರಾ, ಕ್ಲೇಮ್ ಅರ್ಜಿ ಸಲ್ಲಿಕೆ ಪ್ರಕ್ರಿಯೆ ಸರಳೀಕರಣ ಸೇರಿ ವಿವಿಧ ಸುಧಾರಣೆಗಳನ್ನು ಜಾರಿಗೆ ತಂದು ಜನಸ್ನೇಹಿಯನ್ನಾಗಿಸಿದೆ. ಈಗ ಇಪಿಎಫ್ಒ ಮತ್ತೊಂದು ಸುಧಾರಣೆ ಜಾರಿಗೆ ತಂದಿದ್ದು, ಸದಸ್ಯರು ಮನೆ ನವೀಕರಣ ಸೇರಿ ಹಲವು ಸಂದರ್ಭಗಳಲ್ಲಿ ದಾಖಲೆ ಒದಗಿಸುವ ಅವಶ್ಯಕತೆ ಇಲ್ಲ ಎಂದು ತಿಳಿಸಿದೆ.
ಹೌದು, ಇಪಿಎಫ್ಒ ಸದಸ್ಯರು ಮನೆ ನವೀಕರಣ ಮಾಡುವಾಗ, ಮನೆ ಬದಲಿಸುವಾಗ ಕೂಡ ಈಗ ಪಿಎಫ್ ಮೊತ್ತವನ್ನು ವಿತ್ ಡ್ರಾ ಮಾಡಬಹುದಾಗಿದೆ. ಆದರೆ, ಇದಕ್ಕೆ ಇಪಿಎಫ್ಒಗೆ ಯಾವುದೇ ದಾಖಲೆಗಳನ್ನು ಕೂಡ ಸಲ್ಲಿಸುವ ಅವಶ್ಯಕತೆ ಇಲ್ಲ ಎಂದು ಸಂಸ್ಥೆಯು ತಿಳಿಸಿದೆ. ಇದರಿಂದಾಗಿ ಇಪಿಎಫ್ಒ ಸದಸ್ಯರು ಮನೆ ನವೀಕರಣ ಮಾಡುವಾಗ, ಬದಲಾವಣೆ ಮಾಡುವಾಗ ಸುಲಭವಾಗಿ ಪಿಎಫ್ ಮೊತ್ತವನ್ನು ಸುಲಭವಾಗಿ ವಿತ್ ಡ್ರಾ ಮಾಡಬಹುದಾಗಿದೆ.
ಇಪಿಎಫ್ಒ ಸದಸ್ಯರು ಪ್ಯಾರಾ 68 ಬಿ (7) ಅಡಿಯಲ್ಲಿ ಮನೆ ಸೇರ್ಪಡೆ ಅಥವಾ ಬದಲಾವಣೆಗಳಿಗೆ ಹಣವನ್ನು ಪಡೆಯಲು ಅವಕಾಶವನ್ನು ನೀಡುತ್ತಿದೆ. ಸದಸ್ಯರು ಮನೆ ಪೂರ್ಣಗೊಂಡ ನಂತರ ಐದು ವರ್ಷಗಳು ಕಳೆದಿವೆ ಎಂದು ಮಾತ್ರ ಘೋಷಿಸಬೇಕಾಗುತ್ತದೆ. ಯಾವುದೇ ಹಿಂದಿನ ಪಿಎಫ್ ಮುಂಗಡದ ಪುರಾವೆ ಅವಶ್ಯಕತೆ ಇಲ್ಲ ಎಂದು ತಿಳಿಸಲಾಗಿದೆ. ಆದ್ದರಿಂದ, ಇದು ಯಾವುದೇ ಪುರಾವೆ ಅಥವಾ ದಾಖಲೆಗಳನ್ನು ಸಲ್ಲಿಸುವ ಅಗತ್ಯವನ್ನು ನಿವಾರಿಸುತ್ತದೆ, ಕಾಗದಪತ್ರಗಳ ಹೊರೆಯನ್ನು ಕಡಿಮೆ ಮಾಡುತ್ತದೆ.
ಅಷ್ಟೇ ಅಲ್ಲ, ಯುಎಎನ್ ನೊಂದಿಗೆ ಬ್ಯಾಂಕ್ ಖಾತೆಗಳನ್ನು ಸೀಡಿಂಗ್ ಮಾಡಲು ಬ್ಯಾಂಕ್ ದಾಖಲೆಗಳನ್ನು ಅಪ್ ಲೋಡ್ ಮಾಡುವ ಅಥವಾ ಉದ್ಯೋಗದಾತರ ಅನುಮೋದನೆ ಪಡೆಯುವ ಅಗತ್ಯವಿಲ್ಲ.ಈಗ, ನೌಕರರು ತಮ್ಮ ಬ್ಯಾಂಕ್ ಖಾತೆಗಳನ್ನು ಯುಎಎನ್ ಸಂಖ್ಯೆಯೊಂದಿಗೆ ಲಿಂಕ್ ಮಾಡುವ ಪ್ರಕ್ರಿಯೆಯಲ್ಲಿರುವಾಗ ಸ್ಕ್ಯಾನ್ ಮಾಡಿದ ಚೆಕ್ ಹಾಳೆಗಳನ್ನು ಅಪ್ಲೋಡ್ ಮಾಡುವ ಅಥವಾ ಪಾಸ್ಬುಕ್ ಪ್ರತಿಗಳನ್ನು ದೃಢೀಕರಿಸುವ ಅಗತ್ಯವಿಲ್ಲ ಅಷ್ಟೇ ಇದರ ಜತೆಗೆ, ಉದ್ಯೋಗದಾತರ ಅನುಮೋದನೆಯೂ ಇನ್ನು ಮುಂದೆ ಅಗತ್ಯವಿಲ್ಲ ಎಂದು ಇಪಿಎಫ್ಒ ತಿಳಿಸಿದೆ.
