ಇವುಗಳನ್ನು ತಿಳಿಯದೆ ಹೆಲ್ತ್ ಇನ್ಶುರೆನ್ಸ್ ಖರೀದಿಸದಿರಿ

!

ಸಣ್ಣ ವ್ಯಾಪಾರಿಗಳು, ಉದ್ಯೋಗಿಗಳು ಸೇರಿ ಪ್ರತಿಯೊಬ್ಬರೂ ಈಗ ಹೆಲ್ತ್ ಇನ್ಶುರೆನ್ಸ್ ಖರೀದಿಸುತ್ತಿದ್ದಾರೆ. ಇನ್ಶುರೆನ್ಸ್ ಕಂಪನಿಗಳು ಕೂಡ ಮುಗಿಬಿದ್ದು ಗ್ರಾಹಕರಿಗೆ ವಿಮೆ ಮಾಡಿಸುತ್ತಿವೆ. ಆದರೆ, ಇತ್ತೀಚೆಗೆ ವಿಮಾ ಕ್ಲೇಮ್ ಗಳು ಹೆಚ್ಚಾಗಿ ರಿಜೆಕ್ಟ್ ಆಗುತ್ತಿವೆ. ನಿರೀಕ್ಷೆ ಇಟ್ಟುಕೊಂಡು ಆಸ್ಪತ್ರೆಗೆ ಹೋದವರಿಗೆ ನಿರಾಸೆಯಾಗುತ್ತಿದೆ. ಹಾಗಾದ್ರೆ, ಇನ್ಶುರೆನ್ಸ್ ಖರೀದಿ ಮಾಡೋದಕ್ಕಿಂತ ಮುಂಚೆ ಏನೆಲ್ಲ ಗೊತ್ತಿರಬೇಕು? ಯಾವ ನಿಯಮಗಳನ್ನ ತಿಳ್ಕೊಂಡಿರ್ಬೇಕು? ಇದೇ ಈ ಹೊತ್ತಿನ ವಿಶೇಷ ಸ್ಟೋರಿ.

ಹೆಲ್ತ್ ಇನ್ಶುರೆನ್ಸ್ ಖರೀದಿಸುತ್ತಿದ್ದೀರಾ?
ಹಾಗಾದ್ರೆ, ಕೆಲ ನಿಯಮಗಳಾದರೂ ಗೊತ್ತಿರಲಿ
ಇಲ್ಲದಿದ್ದರೆ ಕ್ಲೇಮ್ ಸಿಗೋದಿಲ್ಲ ಹುಷಾರ್!

ಹೆಲ್ತ್ ಇನ್ಶುರೆನ್ಸ್ ಖರೀದಿಸೋ ಮುನ್ನ, ಆ ಕಂಪನಿಯಿಂದ ಸಿಗುವ ಸೌಲಭ್ಯಗಳು, ನಿಯಮಗಳು ಗೊತ್ತಿರಬೇಕು. ಅದರಲ್ಲೂ, ಐಸಿಯು ಕೋಣೆಗಳ ಬೆಲೆ, ಗಂಭೀರ ಕಾಯಿಲೆಗಳಿಗೆ ವಿಮಾ ಕವರ್ ಇದೆಯೋ, ಇಲ್ಲವೋ, ಕ್ಯಾಶ್ ಲೆಸ್ ಟ್ರೀಟ್ ಮೆಂಟ್ ಸೌಲಭ್ಯ ಸೇರಿ ಪ್ರತಿಯೊಂದು ನಿಯಮಗಳನ್ನೂ ಓದಿಕೊಂಡಿರಬೇಕು. ಇನ್ಶುರೆನ್ಸ್ ಏಜೆಂಟ್ ಇವೆಲ್ಲವುಗಳನ್ನೂ ನಿಮಗೆ ಹೇಳುವುದಿಲ್ಲ. ಅವರಿಂದ ಕೇಳಿ ತಿಳಿದುಕೊಳ್ಳಬೇಕು.

2023ರಲ್ಲಿ 7,500 ಕೋಟಿ ರೂ. ಮೌಲ್ಯದ ಕ್ಲೇಮ್ ರಿಜೆಕ್ಟ್
ದೇಶದಲ್ಲಿ ಶೇ.55ರಷ್ಟು ಮಂದಿಗೆ ಮಾತ್ರ ತಿಳಿದಿವೆ ರೂಲ್ಸ್
ಹಾಗಾಗಿ, ಪ್ರತಿಯೊಂದು ನಿಯಮ ತಿಳಿಯೋದು ಅಗತ್ಯ

ವರದಿಯೊಂದರ ಪ್ರಕಾರ, ದೇಶದಲ್ಲಿ 2023ರಲ್ಲಿ ಸುಮಾರು 7,500 ಕೋಟಿ ರೂಪಾಯಿ ಮೌಲ್ಯದ ಕ್ಲೇಮ್ ಅರ್ಜಿಗಳನ್ನು ಕಂಪನಿಗಳು ರಿಜೆಕ್ಟ್ ಮಾಡಿವೆ. ಇನ್ನು, ದೇಶದಲ್ಲಿ ಶೇ.55ರಷ್ಟು ಮಂದಿಗೆ ಮಾತ್ರ ಇನ್ಶುರೆನ್ಸ್ ನಿಯಮಗಳು ಗೊತ್ತಿವೆ ಎಂದು ವರದಿಯಿಂದ ತಿಳಿದುಬಂದಿದೆ. ಹಾಗಾಗಿ, ಇನ್ಶುರೆನ್ಸ್ ನಿಯಮಗಳನ್ನು ತಿಳಿದುಕೊಳ್ಳಬೇಕು. ವೇಟಿಂಗ್ ಪೀರಿಯಡ್ ನಿಂದ ಹಿಡಿದು, ಪ್ರತಿಯೊಂದು ನಿಯಮಗಳನ್ನು ಓದಿಕೊಂಡ ಬಳಿಕವೇ ಖರೀದಿ ಮಾಡಬೇಕು.

ಹೆಚ್ಚು ಕ್ಲೇಮ್ ರೇಶಿಯೋ ಇರೋ ಕಂಪನಿಗಳು ಇರಲಿ
ಇವುಗಳನ್ನು ಮಾತ್ರ ಆಯ್ಕೆ ಮಾಡಿಕೊಳ್ಳಿ
ಇಲ್ಲದಿದ್ದರೆ ಆಸ್ಪತ್ರೆಯಲ್ಲಿ ಪರದಾಟ ತಪ್ಪಿದ್ದಲ್ಲ

ಹೆಲ್ತ್ ಇನ್ಶುರೆನ್ಸ್ ಖರೀದಿ ಮಾಡೋ ಮುನ್ನ ಹೆಚ್ಚು ಕ್ಲೇಮ್ ರೇಶಿಯೊ ಇರುವ ಕಂಪನಿಗಳನ್ನು ಆಯ್ಕೆ ಮಾಡಿಕೊಳ್ಳಿ. ಇನ್ಶುರೆನ್ಸ್ ಖರೀದಿ ಮಾಡುವ ಮುನ್ನ ಯಾವ ಕಂಪನಿಗಳು ಉತ್ತಮ ಕ್ಲೇಮ್ ರೇಶಿಯೊ ಹೊಂದಿವೆ ಎಂಬುದನ್ನು ಇಂಟರ್ ನೆಟ್ ನಲ್ಲಿ ಚೆಕ್ ಮಾಡಿ. ಶೇ.90ಕ್ಕಿಂತ ಅಧಿಕ ರೇಶಿಯೊ ಇರುವ ಕಂಪನಿಗಳಲ್ಲಿ ಮಾತ್ರ ವಿಮೆಗಳನ್ನು ಖರೀದಿಸಿ. ಇಲ್ಲದಿದ್ದರೆ, ಆಸ್ಪತ್ರೆಯಲ್ಲಿ ನೀವು ಪರದಾಡಬೇಕಾಗುತ್ತದೆ.

ಎಷ್ಟು ಮೊತ್ತದ ಇನ್ಶುರೆನ್ಸ್ ಇರಬೇಕು?
ಕಂಪನಿ ಇನ್ಶುರೆನ್ಸ್ ಒಂದೇ ಸಾಕಾಗುತ್ತದಾ?
ನಾವೂ ನಿಮಗೆ ಕೊಡ್ತೀವಿ ಕಂಪ್ಲೀಟ್ ಡಿಟೇಲ್ಸ್

ಒಂದು ಕುಟುಂಬದಲ್ಲಿ ಗಂಡ-ಹೆಂಡತಿ ಮಾತ್ರವೇ ಇದ್ದರೆ 5 ಲಕ್ಷ ರೂಪಾಯಿ ಕವರ್ ಇರುವ ಇನ್ಶುರೆನ್ಸ್ ಖರೀದಿಸಿದರೆ ಸಾಕು. ಇನ್ನು ಮನೆಯಲ್ಲಿ ಗಂಡ-ಹೆಂಡತಿ, ತಂದೆ-ತಾಯಿ, ಮಗು ಇದ್ದರೆ ಕನಿಷ್ಠ 10 ಲಕ್ಷ ರೂಪಾಯಿ ಕವರ್ ಇರುವ ಇನ್ಶುರೆನ್ಸ್ ಖರೀದಿಸಬೇಕಾಗುತ್ತದೆ. ಇನ್ನು, ಈಗಾಗಲೇ ಕೆಲಸ ಮಾಡುತ್ತಿರುವ ಕಂಪನಿಯಲ್ಲಿ ಇನ್ಶುರೆನ್ಸ್ ಇದ್ದರೂ, ಕನಿಷ್ಠ 5 ಲಕ್ಷ ರೂ. ಕವರ್ ಇರುವ ವಿಮೆ ಖರೀದಿಸುವುದು ಸೂಕ್ತ. ಇಲ್ಲದಿದ್ದರೆ, ಕಂಪನಿ ಬದಲಾಯಿಸಿದಾಗ, ಉದ್ಯೋಗ ಕಳೆದುಕೊಂಡಾಗ ವಿಮೆ ಮಾಡಿಸಲು ಹೋದರೆ ಹೆಚ್ಚಿನ ಪ್ರೀಮಿಯಂ ಕಟ್ಟಬೇಕಾಗುತ್ತದೆ.

ಒಟ್ನಲ್ಲಿ, ಅನಿರೀಕ್ಷಿತ ಕಾಯಿಲೆಗಳು, ಅಪಘಾತಗಳು ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ಪ್ರತಿಯೊಂದು ಕುಟುಂಬವೂ ಹೆಲ್ತ್ ಇನ್ಶುರೆನ್ಸ್ ಖರೀದಿಸುವುದು ಅಗತ್ಯವಾಗಿದೆ. ಹೀಗೆ ಖರೀದಿ ಮಾಡೋ ಮುನ್ನ ಒಂದಷ್ಟು ನಿಯಮಗಳನ್ನು ತಿಳಿದಿಕೊಳ್ಳೋದು ಕೂಡ ಅತ್ಯಗತ್ಯವಾಗಿದೆ.