ವಾಷಿಂಗ್ಟನ್: ಹಲವು ದೇಶಗಳಿಗೆ ಸುಂಕದ ಬೆದರಿಕೆ ಹಾಕಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ (Donald Trump ) ಈಗ ಅಮೆರಿಕ ಆಮದು ಮಾಡುವ ಎಲ್ಲ ಉಕ್ಕು ಮತ್ತು ಅಲ್ಯುಮಿನಿಯಂಗಳಿಗೆ ಶೇ.25ರಷ್ಟು ಸುಂಕ ವಿಧಿಸುವುದಾಗಿ ಘೋಷಿಸಿದ್ದಾರೆ. ಸದ್ಯದಲ್ಲೇ ಹೆಚ್ಚುವರಿ ತೆರಿಗೆ ನೀತಿ ಪ್ರಕಟವಾಗಲಿದ್ದು, ಅದರಲ್ಲಿ ಈ ಬಗ್ಗೆ ಹೆಚ್ಚಿನ ವಿವರಗಳು ಇರಲಿವೆ ಎಂದಿದ್ದಾರೆ. ಜೊತೆಗೆ, ಸದ್ಯದಲ್ಲೇ ನಮ್ಮ ಸರಕುಗಳಿಗೆ ಸುಂಕ ವಿಧಿಸುತ್ತಿರುವ ದೇಶಗಳಿಗೆ ನಾವು ಪ್ರತಿ ಸುಂಕ ವಿಧಿಸುತ್ತೇವೆ ಎಂದಿರುವ ಅವರು, ಮಂಗಳವಾರವೇ ಈ ಬಗ್ಗೆ ತೀರ್ಮಾನ ಪ್ರಕಟಿಸಿ, ತತ್‌ಕ್ಷಣದಿಂದಲೇ ಜಾರಿ ಮಾಡುತ್ತೇವೆ ಎಂದೂ ಹೇಳಿದ್ದಾರೆ.
ಅಮೆರಿಕಕ್ಕೆ ಉಕ್ಕು ರಫ್ತು ಮಾಡುವ ದೇಶಗಳ ಪೈಕಿ ಭಾರತವೂ ಒಂದು. ಹೀಗಾಗಿ ಇದರ ಟ್ರಂಪ್ ತೆರಿಗೆಯ ಬಿಸಿ ಭಾರತಕ್ಕೂ ತಟ್ಟಲಿದೆಯೇ ಎಂಬ ಪ್ರಶ್ನೆ ಎದುರಾಗಿದೆ. ಆದರೆ, ಭಾರತದ ಮೇಲೆ ಇದು ದೊಡ್ಡಮಟ್ಟಿಗೆ ಪರಿಣಾಮ ಬೀರುವ ಸಾಧ್ಯತೆ ಕಡಿಮೆ. ಏಕೆಂದರೆ ಅಮೆರಿಕಗೆ ಹೆಚ್ಚು ಪ್ರಮಾಣದಲ್ಲಿ ಉಕ್ಕು ಅಥವಾ ಅದರ ಉತ್ಪನ್ನಗಳನ್ನು ರಫ್ತು ಮಾಡುತ್ತಿಲ್ಲ ಎಂದೂ ಕೆಲವರು ಅಭಿಪ್ರಾಯಪಟ್ಟಿದ್ದಾರೆ. “ಯಾವುದೇ ಉಕ್ಕು ಅಥವಾ ಅಲ್ಯುಮಿನಿಯಂ ಅಮೆರಿಕದೊಳಗೆ ಬಂದರೆ ಶೇಕಡಾ 25 ತೆರಿಗೆ ವಿಧಿಸಲಾಗುವುದು,” ಎಂದು ಟ್ರಂಪ್ ಫ್ಲೊರಿಡಾದಿಂದ ನ್ಯೂ ಓರ್ಲೀನ್ಸ್ ಗೆ ಪ್ರಯಾಣಿಸುವಾಗ ಪತ್ರಕರ್ತರಿಗೆ ತಿಳಿಸಿದ್ದಾರೆ.
ಎಲ್ಲರಿಗೂ ಅನ್ವಯ
ಮೆಕ್ಸಿಕೋ ಮತ್ತು ಕೆನಡಾ ಕೂಡ ಈ ತೆರಿಗೆಗಳ ವ್ಯಾಪ್ತಿಗೆ ಒಳಗಾಗುತ್ತವೆಯಾ ಎಂಬ ಪ್ರಶ್ನೆಗೆ, “ಎಲ್ಲರಿಗೂ ಅನ್ವಯವಾಗಲಿದೆ” ಎಂದು ಹೇಳಿದ್ದಾರೆ. ಆದರೆ, ಈ ತೆರಿಗೆಗಳು ಯಾವಾಗ ಜಾರಿಗೆ ಬರಲಿವೆ, ಯಾವ್ಯಾವ ದೇಶಗಳ ಮೇಲೆ ಪರಿಣಾಮ ಬೀರಲಿವೆ ಎಂಬುದರ ಬಗ್ಗೆ ವಿವರ ನೀಡಿಲ್ಲ.
ಇದನ್ನೂ ಓದಿ: Donald Trump : ಡೊನಾಲ್ಡ್ ಟ್ರಂಪ್ ಪದಗ್ರಹಣದಲ್ಲಿ ಮುಖೇಶ್‌ ಅಂಬಾನಿ ದಂಪತಿ ಭಾಗಿ
ಅಮೆರಿಕ ತನ್ನ ಅಲ್ಯೂಮಿನಿಯಂ ಆಮದುಗಳಿಗೆ ಕೆನಡಾ, ಚೀನಾ ಮತ್ತು ಯುನೈಟೆಡ್ ಅರಬ್ ಎಮಿರೇಟ್ಸ್ ಮೇಲೆ ಅವಲಂಬಿತವಾಗಿದೆ. ಅಮೆರಿಕದ ಉಕ್ಕು ಉದ್ಯಮವು ಕಳೆದ ವರ್ಷದಿಂದಷ್ಟೇ ಚೇತರಿಸಿಕೊಳ್ಳುತ್ತಿದೆ. ಕೆಲವು ಉದ್ಯಮಿಗಳು ಉಕ್ಕಿನ ಆಮದು ಹೆಚ್ಚಾಗಿರುವುದರಿಂದ ತಮ್ಮ ಆದಾಯ ಕುಸಿತವಾಗಿದೆ ಎಂದು ಹೇಳಲಾರಂಭಿಸಿದ್ದಾರೆ. ಈ ಹಿನ್ನೆಲೆಯಲ್ಲಿ ಟ್ರಂಪ್ ಶೇ.25 ತೆರಿಗೆಯ ನಿರ್ಧಾರ ಕೈಗೊಂಡಿರುವ ಸಾಧ್ಯತೆ ಇದೆ.
