ಒಂದೊಳ್ಳೆ ಕಾಲೇಜು ಅಥವಾ ವಿಶ್ವವಿದ್ಯಾಲಯದಲ್ಲಿ ಪದವಿ ಪಡೆಯಬೇಕು, ದೊಡ್ಡ ಕಂಪನಿಯಲ್ಲಿ ಐದಂಕಿ ಸಂಬಳದ ಕೆಲಸ ಹಿಡಿಯಬೇಕು, ತಂದೆ-ತಾಯಿಯನ್ನು ಚೆನ್ನಾಗಿ ನೋಡಿಕೊಳ್ಳಬೇಕು ಎಂಬ ಕನಸು ಎಲ್ಲರದ್ದಾಗಿರುತ್ತದೆ. ಆದ್ರೆ, 21ನೇ ವಯಸ್ಸಿಗೇ ನೂರಾರು ಜನರಿಗೆ ಕೆಲಸ ಕೊಡಬೇಕು ಎಂಬ ಕನಸು ಎಷ್ಟು ಜನರಿಗೆ ಇರುತ್ತದೆ ಹೇಳಿ? ಆದ್ರೆ, ಇಂತಹ ದೊಡ್ಡ ಕನಸು ಕಂಡು, ಅದನ್ನು ಸಾಕಾರಗೊಳಿಸಿದ್ದಾರೆ ಆಂಧ್ರಪ್ರದೇಶದ ರಾಮ್ ಪ್ರಿಯಾಂಕಾ. ಪ್ರತಿಯೊಬ್ಬರಿಗೂ ಮಾದರಿ ಎನಿಸುವ ಶತಮಾನದ ಮಾದರಿ ಹೆಣ್ಣಿನ ಕತೆಯೇ ಈ ದಿನದ ಸ್ಪೆಷಲ್ ಸ್ಟೋರಿ.
21ನೇ ವಯಸ್ಸಿಗೇ ಎರಡು ಕಂಪನಿ ಸ್ಥಾಪನೆ
400 ಮಂದಿಗೆ ಉದ್ಯೋಗ ನೀಡಿದ ಮಾದರಿ ಹೆಣ್ಣು
ಇದು ಪ್ರಿಯಾಂಕಾ ರಾಮ್ ಸಕ್ಸೆಸ್ ಸ್ಟೋರಿ
ಹೌದು, ಆಂಧ್ರಪ್ರದೇಶದ ಪಶ್ಚಿಮ ಗೋದಾವರಿಯ ಪ್ರಿಯಾಂಕಾ ರಾಮ್ ಅವರು ಕೇವಲ 21ನೇ ವಯಸ್ಸಿಗೆ ಹಾರ್ವೆಸ್ಟ್ ಹಾಗೂ ಬ್ರಿವೋಕ್ಸ್ ಎಂಬ ಎರಡು ಕಂಪನಿ ಸ್ಥಾಪಿಸಿದ್ದಾರೆ. ಎರಡೂ ಕಂಪನಿಗಳಿಗೆ ಇವರೇ ಸಿಇಒ ಆಗಿದ್ದು, ಸುಮಾರು 400 ಜನರಿಗೆ ಇವರು ಕೆಲಸ ನೀಡಿದ್ದಾರೆ. ಇಷ್ಟು ಸಣ್ಣ ವಯಸ್ಸಿಗೇ ಇಷ್ಟೊಂದು ಸಾಧನೆ ಮಾಡೋದು ಸುಲಭವೇ? ನಾನು ಮಾಡಿ ತೋರಿಸಿದ್ದೇನೆಲ್ಲ, ಸುಲಭವೇ ಎನ್ನುತ್ತಾರೆ ಈ ದಿಟ್ಟ ಹೆಣ್ಣು.
ಅರ್ಥಶಾಸ್ತ್ರದಲ್ಲಿ ಪದವಿ ಪಡೆದ ನಿಪುಣೆ
ವಿದೇಶಿ ವ್ಯಾಪಾರ ಬಿಟ್ಟು ದೇಶದಲ್ಲೇ ಸಕ್ಸೆಸ್
ಇಂಟರ್ನ್ ಶಿಪ್ ಮಾಡುವಾಗಲೇ ಉದ್ಯಮ ಕನಸು
ಮಣಿಪಾಲ್ ವಿಶ್ವವಿದ್ಯಾಲಯದಲ್ಲಿ ಅರ್ಥಶಾಸ್ತ್ರದಲ್ಲಿ ಪದವಿ ಪಡೆದ ಪ್ರಿಯಾಂಕಾ ರಾಮ್ ಅವರಿಗೆ ನೂರಾರು ಅವಕಾಶಗಳಿದ್ದವು. ವಿದೇಶದಲ್ಲೂ ಅವರಿಗೆ ಉದ್ಯಮ ಸ್ಥಾಪಿಸುವ ಅವಕಾಶವಿತ್ತು. ಕೈತುಂಬ ಹಣ ನೀಡಿ, ಜಾಬ್ ಕೊಡುವ ಕಂಪನಿಗಳಿದ್ದವು. ಆದ್ರೆ, ಹೈದರಾಬಾದಿನಲ್ಲಿರೋ ಇಂಡಿಯನ್ ಸ್ಕೂಲ್ ಆಫ್ ಬಿಸಿನೆಸ್ ಸ್ಕೂಲ್ ನಲ್ಲಿ ರಿಸರ್ಚ್ ಇಂಟರ್ ಶಿಪ್ ಮಾಡುವಾಗಲೇ ಪ್ರಿಯಾಂಕಾ ಅವರಿಗೆ ಬಿಸಿನೆಸ್ ಕನಸು ಹುಟ್ಟಿತು. ಇದು ಅವರ ಜೀವನದ ದಿಕ್ಕನ್ನೇ ಬದಲಾಯಿಸ್ತು ಅಂದ್ರೆ ತಪ್ಪಾಗಲ್ಲ.
ಇಂಟರ್ನ್ ಶಿಪ್ ಮುಗಿದ ಬಳಿಕ ಬಿಸಿನೆಸ್
ಹಾರ್ವೆಸ್ಟ್ ಎಂಬ ಕಂಪನಿ ಸ್ಥಾಪನೆ
ಸಾವಯವ ಜ್ಯೂಸ್ ಕಂಪನಿ ಸ್ಥಾಪಿಸಿ ಯಶಸ್ವಿ
ಇಂಟರ್ನ್ ಶಿಪ್ ಮುಗಿದ ಕೂಡಲೇ ಉದ್ಯೋಗದ ಆಸೆ ಬಿಟ್ಟ ಪ್ರಿಯಾಂಕಾ ರಾಮ್, ಹಾರ್ವೆಸ್ಟ್ ಎಂಬ ಕಂಪನಿ ಸ್ಥಾಪಿಸಿದರು. ಅಡ್ಡಪರಿಣಾಮಗಳು ಇಲ್ಲದ ಸಕ್ಕರೆ ಮಿಶ್ರಿತ ಸಾವಯವ ಜ್ಯೂಸ್ ತಯಾರಿಸುವ ಕಂಪನಿ ಆರಂಭಿಸಿದರು. ಒಂದು ವರ್ಷ ಜ್ಯೂಸ್ ಬಗ್ಗೆ ಸಂಶೋಧನೆ ನಡೆಸಲಾಗಿದ್ದು, ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಸಂಸ್ಥೆಯ ಅನುಮತಿ ಸಿಕ್ಕ ಕೂಡಲೇ ಮಾರುಕಟ್ಟೆಗೆ ಬಿಡುಗಡೆ ಮಾಡೋದಾಗಿ ತಿಳಿಸಿದ್ದಾರೆ. ಉದ್ಯಮದ ಜತೆಗೆ ಜನರ ಆರೋಗ್ಯ ಕಾಪಾಡುವುದು ಇವರ ಗುರಿಯಾಗಿದೆ.
ಸುಮ್ಮನಿರದ ಪ್ರಿಯಾಂಕಾ ಮತ್ತೊಂದು ಬಿಸಿನೆಸ್ ಸ್ಥಾಪನೆ
ಮಕ್ಕಳಲ್ಲಿ ಡಿಜಿಟಲ್ ಅಡಿಕ್ಷನ್ ಬಿಡಿಸಲು ಸಾಹಸ
ಬ್ರಿವೋಕ್ಸ್ ಕಂಪನಿ ಮೂಲಕ ಸಾರ್ಥಕ ಬಿಸಿನೆಸ್
ಹಾರ್ವೆರ್ಸ್ಟ್ ಕಂಪನಿ ಜತೆಗೆ ಬ್ರಿವೋಕ್ಸ್ ಎಂಬ ಕಂಪನಿಯನ್ನೂ ಸ್ಥಾಪಿಸಿದ ಪ್ರಿಯಾಂಕಾ, ಮಕ್ಕಳಲ್ಲಿ ಹೆಚ್ಚಾಗಿರುವ ಡಿಜಿಟಲ್ ಅಡಿಕ್ಷನ್ ಬಿಡಿಸಲು ಮುಂದಾಗಿದ್ದಾರೆ. ಮಕ್ಕಳಲ್ಲಿ ಕೌಶಲ ವೃದ್ಧಿಸುವುದು, ಅವರಿಗೆ ಪ್ರಾಯೋಗಿಕ ಶಿಕ್ಷಣ ನೀಡುವುದು ಇವರ ಗುರಿಯಾಗಿದೆ. ಇದಕ್ಕಾಗಿ 400 ಪರಿಣತರನ್ನೂ ಇವರು ನೇಮಿಸಿದ್ದಾರೆ. ಆ ಮೂಲಕ ಮಕ್ಕಳ ಡಿಜಿಟಲ್, ಮೊಬೈಲ್ ಗೀಳನ್ನು ಬಿಡಿಸುವ ಮಹೋನ್ನತ ಕೆಲಸ ಮಾಡುತ್ತಿದ್ದಾರೆ.
ಬಿಸಿನೆಸ್ ಮಾತ್ರವಲ್ಲ ಪ್ರಿಯಾಂಕಾ ಲೇಖಕಿಯೂ ಹೌದು
15ನೇ ವಯಸ್ಸಿಗೆ ಪುಸ್ತಕ ಬರೆದ ಮಾದರಿ ಲೇಖಕಿ
ಈಗ ಎರಡು ಪುಸ್ತಕಗಳ ಒಡತಿ
ಬಿಸಿನೆಸ್ ನಲ್ಲಿ ಮಾತ್ರವಲ್ಲದೆ, ಸಾಹಿತ್ಯದಲ್ಲೂ ಪ್ರಿಯಾಂಕಾ ರಾಮ್ ಸೈ ಎನಿಸಿಕೊಂಡಿದ್ದಾರೆ. ಇವರು 15ನೇ ವಯಸ್ಸಿನಲ್ಲೇ ಸಣ್ಣ ಕತೆಗಳ ಪುಸ್ತಕ ಬರೆದಿದ್ದಾರೆ. ಅಲ್ಲದೆ, ಸ್ವಯಂ ಅರಿವಿನ ಕುರಿತ ಬ್ಯಾಲೆನ್ಸ್ ವಿತಿನ್ ಎಂಬ ವ್ಯಕ್ತಿತ್ವ ವಿಸಕನ ಪುಸ್ತಕವನ್ನೂ ಬರೆದಿದ್ದಾರೆ. ಇವರಿಗೆ ಭಾಷಾ ಪ್ರೌಢಿಮೆಯೂ ಇದ್ದು, 10 ಭಾಷೆಗಳನ್ನು ಬಲ್ಲವರಾಗಿದ್ದಾರೆ. ಕೇವಲ 21ನೇ ವಯಸ್ಸಿಗೆ ಇಷ್ಟೆಲ್ಲ ಸಾಧನೆ ಮಾಡಿರುವ, ದೊಡ್ಡ ಕನಸು ಹೊಂದಿರುವ ಪ್ರಿಯಾಂಕಾ ರಾಮ್ ಅವರಿಗೆ ನೀವೂ ಆಲ್ ದಿ ಬೆಸ್ಟ್ ಹೇಳಿ.
