ಬೆಂಗಳೂರು: ಬ್ಯಾಂಕುಗಳಲ್ಲಿ ಖಾತೆ ತೆರೆಯುವುದು ಸುಲಭ. ಆದರೆ, ಆ ಖಾತೆಯಲ್ಲಿ ಮಿನಿಮಮ್ ಬ್ಯಾಲೆನ್ಸ್ ಕಾಪಾಡಿಕೊಳ್ಳುವುದು ಕಷ್ಟ. ಕನಿಷ್ಠ ನಿಗದಿತ ಮೊತ್ತವು ಬ್ಯಾಂಕ್ ಖಾತೆಯಲ್ಲಿ ಇರದಿದ್ದರೆ ಬ್ಯಾಂಕುಗಳು ದಂಡ ವಿಧಿಸುವ ಕಾರಣ ಹೆಚ್ಚಿನ ಬ್ಯಾಂಕ್ ಖಾತೆ ತೆರೆಯಲು ಗ್ರಾಹಕರು ಹಿಂದೇಟು ಹಾಕುವಂತಾಗಿದೆ. ಆದರೆ, ಈ ತಲೆನೋವನ್ನು ಕೆನರಾ ಬ್ಯಾಂಕ್ ತೊಲಗಿಸಿದೆ. ಹೌದು, ಬ್ಯಾಂಕ್ ಖಾತೆಯಲ್ಲಿ ಮಿನಿಮಮ್ ಬ್ಯಾಲೆನ್ಸ್ ಇರಬೇಕು ಎಂಬ ನಿಯಮವನ್ನು ಕೆನರಾ ಬ್ಯಾಂಕ್ ತೆಗೆದುಹಾಕಿದೆ.
ಹಿಂದಿನ ನಿಯಮಗಳ ಪ್ರಕಾರ, ನಗರ ಪ್ರದೇಶದ ಶಾಖೆಗಳಲ್ಲಿ ಖಾತೆದಾರರು ಸರಾಸರಿ ಮಾಸಿಕ ಬ್ಯಾಲೆನ್ಸ್ 2,000 ರೂ., ಅರೆ ನಗರ ಪ್ರದೇಶದ ಶಾಖೆಗಳಲ್ಲಿ 1,000 ರೂ. ಮತ್ತು ಗ್ರಾಮೀಣ ಪ್ರದೇಶದ ಶಾಖೆಗಳಲ್ಲಿ 500 ರೂ. ಇರಿಸಬೇಕಿತ್ತು. ಈ ಮಿತಿಯನ್ನು ತಲುಪಲು ವಿಫಲವಾದರೆ ಬ್ಯಾಂಕ್ ದಂಡ ವಿಧಿಸುತ್ತಿತ್ತು. ಆದರೆ, ಬ್ಯಾಂಕ್ ನಲ್ಲಿ ಉಳಿತಾಯ ಖಾತೆ ಹೊಂದಿರುವ ಗ್ರಾಹಕರಿಗೆ ಮಿನಿಮಮ್ ಬ್ಯಾಲೆನ್ಸ್ ಇಲ್ಲದಿದ್ದರೆ ವಿಧಿಸುತ್ತಿದ್ದ ದಂಡವನ್ನೂ ಕೂಡಾ ರದ್ದುಪಡಿಸುವ ಮಹತ್ವದ ನಿರ್ಧಾರ ಕೈಗೊಂಡಿರುವುದಾಗಿ ಕೆನರಾ ಬ್ಯಾಂಕ್ ಪ್ರಕಟಣೆ ತಿಳಿಸಿದೆ.
ಈ ಹಿಂದೆ ಇದ್ದ ಕನಿಷ್ಠ ಬ್ಯಾಲೆನ್ಸ್ ನಿರ್ವಹಣೆಯ ನಿಯಮದಿಂದ ಅನೇಕ ಬಡ ಮತ್ತು ಮಧ್ಯಮ ವರ್ಗದ ಜನರು ತೊಂದರೆ ಅನುಭವಿಸುತ್ತಿದ್ದರು. ಹಲವರು ಕಡಿಮೆ ಬ್ಯಾಲೆನ್ಸ್ ನಿರ್ವಹಿಸಿದ ಕಾರಣಕ್ಕೇ ವರ್ಷಕ್ಕೆ 500 ರೂ.ವರೆಗೆ ದಂಡ ಪಾವತಿಸಿದ್ದೂ ಇದೆ. ಇದೀಗ ಈ ನಿಯಮವನ್ನು ತೆಗೆದು ಹಾಕುವ ಮೂಲಕ ತನ್ನ ಗ್ರಾಹಕರಿಗೆ ಬ್ಯಾಂಕ್ ರಿಲೀಫ್ ನೀಡಿದೆ. ದೇಶದ ಅತಿ ದೊಡ್ಡ ಬ್ಯಾಂಕ್ ಆಗಿರುವ ಸಾರ್ವಜನಿಕ ರಂಗದ ಎಸ್ ಬಿ ಐನಲ್ಲಿಯೂ ಈ ರೀತಿಯ ಶುಲ್ಕ ಇಲ್ಲ.
ಈ ನಿಟ್ಟಿನಲ್ಲಿ ಇನ್ಮುಂದೆ ಕೆನರಾ ಬ್ಯಾಂಕ್ ಉಳಿತಾಯ ಖಾತೆ ಹೊಂದಿರುವ ಗ್ರಾಹಕರು ಖಾತೆಯಲ್ಲಿ ಕನಿಷ್ಠ ಮೊತ್ತ ಹೊಂದಿಲ್ಲದಿದ್ದರೂ ಯಾವುದೇ ದಂಡ ತೆರಬೇಕಾದ ಅಗತ್ಯವಿಲ್ಲ ಎಂದು ಸ್ಪಷ್ಟಪಡಿಸಿದೆ. ಒಂದು ವೇಳೆ ಗ್ರಾಹಕರು ತಮ್ಮ ಖಾತೆಯಲ್ಲಿ ಮಿನಿಮಮ್ ಬ್ಯಾಲೆನ್ಸ್ ಇಡದಿದ್ದಲ್ಲಿ ಅದಕ್ಕೆ ಬ್ಯಾಂಕ್ ದಂಡ ವಿಧಿಸುತ್ತಿತ್ತು. ಆದರೆ ಇದೀಗ ಕೆನರಾ ಬ್ಯಾಂಕ್ ನ ಹೊಸ ನಿಯಮದಿಂದ ಗ್ರಾಹಕರು ಇನ್ಮುಂದೆ ಮಿನಿಮಮ್ ಬ್ಯಾಲೆನ್ಸ್ ಇಡಬೇಕಾದ ಅಗತ್ಯವಿಲ್ಲ.
