ಅಂದು ಸ್ವರ್ಗವನ್ನೇ ಧರೆಗಿಳಿಸಿ ತಮ್ಮ ಮಗನಿಗೆ ಅದ್ಧೂರಿಯಾಗಿ ಮದುವೆ ಮಾಡಿದ್ದರು ಮುಖೇಶ್ ಅಂಬಾನಿ. ಸಾವಿರಾರು ಕೋಟಿ ವೆಚ್ಚದಲ್ಲಿ ನಡೆದಹೋದ ಮದುವೆಗೆ, ಇಡೀ ದೇಶವೇ ಹುಬ್ಬೇರಿಸಿ ನೋಡಿತ್ತು! “ಇದು ಕುಬೇರನ ಮದುವೆ” ಎಂಬೆಲ್ಲಾ ಅಂಬೋಣದೊಂದಿಗೆ ನಡೆದ ಆ ಐಷಾರಾಮಿ ಮದುವೆಗೆ ದಿಗ್ಗಜರುಗಳ ದಂಡೇ ನೆರೆದುಬಂದಿತ್ತು. ಅಂದು ವಿಶೇಷ ಆಹ್ವಾನದಡಿ ಬಂದ ಸೆಲೆಬ್ರಿಟಿಗಳಿಗೆ ಕೋಟಿ-ಕೋಟಿ ಬೆಲೆಯ ಬಳುವಳಿ ಸಂದಾಯವಾಗಿತ್ತು!. ನಿಜಕ್ಕೂ ಅದು ಸ್ವರ್ಗದಲ್ಲೇ ನಡೆದುಹೋದ ಮದುವೆ ಎಂಬಂತೆ ಅದ್ಧೂರಿಯ ತುತ್ತತುದಿ ತಲುಪಿತ್ತು ಆ ವಿಜೃಂಭಣೆಯ ಕಾರ್ಯಕ್ರಮ. ಇಂಥ ವೈಭವದ ಕುಬೇರನ ಮದುವೆಯಲ್ಲಿ ಅಂದು ನಮ್ಮ ಬೆಂಗಳೂರಿನ ಹೋಳಿಗೆಯೂ ಸದ್ದು ಮಾಡಿ ಸವಿ ಹಂಚಿದ್ದು ವಿಶೇಷವಾಗಿತ್ತು.
ಹೌದು, ಅಂಬಾನಿ ಮಗನ ಮದುವೆಯ ನಾನಾ ಥರದ ಭಕ್ಷ್ಯಗಳಲ್ಲಿ ಬೆಂಗಳೂರಿನ ಹೋಳಿಗೆಯೂ ಪಾಲು ಪಡೆದಿತ್ತು. ಹೋಳಿಗೆ ಸ್ಪೆಷಲ್ ಅಂದಾಗಲೆಲ್ಲಾ ಮುನ್ನೆಲೆಯಲ್ಲಿ ಬಂದು ನಿಲ್ಲುವ ನಮ್ಮ ಬೆಂಗಳೂರಿನ ಖ್ಯಾತ ಹೋಳಿಗೆ ತಯಾರಕ ಸಂಸ್ಥೆಯಾದ “ಭಾಸ್ಕರ್ಸ್ ಮನೆ ಹೋಳಿಗೆ” ಯು ಅಂದು ಅಂಬಾನಿ ಮಗನ ಮದುವೆಯೂಟದಲ್ಲಿ ತನ್ನ ಸವಿರುಚಿ ತೋರಿಸಿದೆ. ಆ ಮದುವೆ ದಿನದ ಸಂಜೆ ‘ಲೈವ್’ನಲ್ಲಿ ಹೋಳಿಗೆ ತಿಂದ ತಾರೆಯರು ಸೇರಿದಂತೆ ಅನೇಕ ಅತಿಥಿಗಳು “ಭಾಸ್ಕರ್ಸ್ ಮನೆ ಹೋಳಿಗೆಯ ವಿಶೇಷ ಸ್ವಾದ”ದಲ್ಲಿ ಕಳೆದುಹೋದರು.
ಏನೇ ಹೇಳಿ, ವಿಶೇಷ ಉಣ ಬಡಿಸುವುದಕ್ಕೆ ಬೆಂಗಳೂರು ಸದಾ ಮುಂದು. ಊಟ-ತಿಂಡಿಯ ವಿಚಾರದಲ್ಲಿ ನಮ್ಮ ಬೆಂಗಳೂರಿನ ಸ್ವಾದ ಬಲು ಮೋಡಿ ಮಾಡುವಂಥದ್ದು. ಇಲ್ಲಿ ನೂರಾರು ವಿಶೇಷಗಳು ಆಹಾರಪ್ರಿಯರನ್ನು ಆಕರ್ಷಿಸುತ್ತೆ. ಅಂಥ ವಿಶೇಷಗಳಲ್ಲಿ ಬೆಂಗಳೂರಿನ ಭಾಸ್ಕರ್ ಮನೆ ಹೋಳಿಗೆಯೂ ತನ್ನ ಸಾಟಿ ಇಲ್ಲದ ರುಚಿಯೊಂದಿಗೆ ಹೆಸರು ಮಾಡಿಕೊಂಡಿದೆ. ಬೆಂಗಳೂರಿನ ಡಿವಿಜಿ ರಸ್ತೆಯಲ್ಲಿ ಪ್ರಾರಂಭವಾದ ಈ “ಭಾಸ್ಕರ್ಸ್ ಮನೆ ಹೋಳಿಗೆ” ಸಂಸ್ಥೆಯು ಜಯನಗರ, ಕತ್ರಿಗುಪ್ಪೆ, ರಾಜರಾಜೇಶ್ವರಿ ನಗರ, ಮಲ್ಲೇಶ್ವರಂ, ಮಂಗಳೂರು, ಹುಬ್ಬಳ್ಳಿ, ಮೈಸೂರು, ಶಿವಮೊಗ್ಗ, ಧಾರವಾಡಗಳಲ್ಲಿ ಸಿಹಿಪ್ರಿಯರಿಗೆ ಹೋಳಿಗೆ ಸವಿ ಮಾಡಿ ಉಣಬಡಿಸುತ್ತಿದೆ. ಇನ್ನು ಬಾಂಬೆ, ಪುಣೆಯಲ್ಲೂ ಇವರ ಹೋಳಿಗೆ ಮಳಿಗೆ ಡಿಮಾಂಡಿನಲ್ಲಿದೆ. ಜೊತೆಗೆ ಅಮೇರಿಕಾ ಹಾಗೂ ಆಸ್ಟ್ರೇಲಿಯಾದಲ್ಲೂ ಈ “ಭಾಸ್ಕರ್ಸ್ ಮನೆ ಹೋಳಿಗೆ”ಯ ಪ್ರಾಂಚೈಸಿ ಪಡೆಯಲು ಮುಂದಾಗಿದ್ದು, ಅಲ್ಲೂ ಸಹ ಸದ್ಯದಲ್ಲೇ ಹೋಳಿಗೆ ರುಚಿ ಹತ್ತಲಿದೆ.
ವಿಶೇಷವಾಗಿ ಇಪ್ಪತ್ತೆರಡು(22) ಬಗೆಯ ಹೋಳಿಗೆಗಳನ್ನು ಇಲ್ಲಿ ತಯಾರಿಸಲಾಗುತ್ತಿದ್ದು, ಇದರ ಜೊತೆಯಲ್ಲಿ ಕುರುಕ್ ತಿಂಡಿಗಳಿಗೂ ಈ ಸಂಸ್ಥೆ ಹೆಸರು ಮಾಡಿಕೊಂಡಿದೆ. ಕುಂದಾಪುರ ಮೂಲದ ಬಡ ಕುಟುಂಬದಿಂದ ಬಂದಿದ್ದ “ಭಾಸ್ಕರ್” ತಾನು ಬಡತನದಲ್ಲಿ ಬೆಂದು ಬಂದು, ಬೆಂಗಳೂರಲ್ಲಿ ಹೋಳಿಗೆ ಬೇಯಿಸಿ ಈ ಮಟ್ಟಿಗಿನ ಸಂಸ್ಥೆಯ ಮಾಲೀಕರಾಗಿದ್ಡು ನಿಜಕ್ಕೂ ಶಹಬ್ಬಾಶ್ ಎನ್ನುವ ಸಂಗತಿ!. ಈ ಸಂಸ್ಥೆಯ ಬ್ರಾಂಚು, ಪ್ರಾಂಚೈಸಿಯ ಹೆಸರಲ್ಲಿ ಐನೂರರಿಂದ ಆರುನೂರು ಮಂದಿ ಬದುಕು ಕಟ್ಟಿಕೊಂಡಿದ್ದಾರೆ ಎಂದರೆ ಅದು ಸಾಮಾನ್ಯದ ಮಾತಲ್ಲ!. ಇವರುಗಳು ಕೊಡುವ ಹೋಳಿಗೆಯ ರುಚಿಯೇ ಅಂಥದ್ದು! ಅದೊಂದು ಹೊಸ ರುಚಿ. ಹಾಗಾಗಿ ಜನ ಅಲ್ಲಿ ಮುಗಿಬೀಳೋದು. ಆ ರುಚಿಯೇ ಇವರನ್ನು ಅಂಬಾನಿಯಂಥ ಅಂಬಾನಿಯ ಮದುವೆ ಮನೆಗೆ ಹೋಳಿಗೆ ಹೊತ್ತೊಯ್ಯುವಂತೆ ಮಾಡಿದ್ದು!.
