ನಾಳೆಯಿಂದ ಮತ್ತೊಂದು ಬೆಲೆ ಏರಿಕೆಯ ಬರೆ!

ಬೆಂಗಳೂರು: ಬೆಲೆ ಏರಿಕೆಗಳ ಮಧ್ಯೆ ಈಗ ನೀರಿನ ದರ ಏರಿಸಲು ಸರ್ಕಾರ ಮುಂದಾಗಿದೆ. ಕಳೆದ ಎರಡು ತಿಂಗಳುಗಳಿಂದ ನೀರಿನ ಬೆಲೆ ಏರಿಕೆ ಮಾಡುವ ಬಗ್ಗೆ ಸರ್ಕಾರ ಚರ್ಚೆ ನಡೆಸುತ್ತಿತ್ತು. ಈಗ ನಾಳೆಯಿಂದ ಅಧಿಕೃತವಾಗಿ ನೀರಿನ ಬೆಲೆ ಏರಿಕೆ ಮಾಡಲಾಗುತ್ತಿದೆ ಎಂದು ತಿಳಿದು ಬಂದಿದೆ.

ನಾಳೆ ಅಧಿಕೃತವಾಗಿ ನೀರಿನ ಬೆಲೆ ಹೆಚ್ಚಳದ ಅದೇಶ ಬರುವ ಸಾಧ್ಯತೆ ಇದೆ ಎನ್ನಲಾಗುತ್ತಿದೆ. ವಸತಿ ಬಳಕೆಯ ಪ್ರತಿ ಲೀಟರ್ ಗೆ ಒಂದು ಪೈಸೆ ದರ ಏರಿಕೆ ಮಾಡುವುದು ಬಹುತೇಕ ನಿಶ್ಚಿತ ಎನ್ನಲಾಗಿದೆ.

ಬಿಬಿಎಂಪಿ ವ್ಯಾಪ್ತಿಯಲ್ಲಿ ಕಳೆದ 11 ವರ್ಷಗಳಿಂದ ನೀರಿನ ಬೆಲೆ ಪರಿಷ್ಕರಣೆ ಮಾಡಿರಲಿಲ್ಲ. ಹೀಗಾಗಿ ಜಲ ಮಂಡಳಿಯು ಲೀಟರ್ ಗೆ 8 ಪೈಸೆ ಬೆಲೆ ಏರಿಕೆ ಮಾಡಬೇಕೆಂದು ಸರ್ಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಿತ್ತು. ಈಗ ಸರ್ಕಾರ ಕೂಡ ಬೆಲೆ ಏರಿಕೆಯ ನಿರ್ಧಾರ ಕೈಗೊಂಡಿದ್ದು, ಈ ತಿಂಗಳಿಂದಲೇ ಬೆಲೆ ಏರಿಕೆಯಾಗುವ ಸಾಧ್ಯತೆ ಇದೆ ಎನ್ನಲಾಗಿದೆ.

ಹೀಗಾಗಿ ಮತ್ತೊಂದು ಬೆಲೆ ಏರಿಕೆಯ ಬಿಸಿ ಸಿಲಿಕಾನ್ ಸಿಟಿ ಮಂದಿಗೆ ತಟ್ಟಲಿದೆ. ಆರ್ಥಿಕ ವರ್ಷ ಆರಂಭದ ಹಿನ್ನೆಲೆಯಲ್ಲಿ ಪರಿಷ್ಕೃತ ನೀರಿನ ದರವನ್ನು ಏಪ್ರಿಲ್‌ನಿಂದಲೇ ಜಾರಿ ಮಾಡಬಹುದು ಎನ್ನಲಾಗುತ್ತಿದೆ. ಸದ್ಯ ವಸತಿ ಕಟ್ಟಡಗಳಿಗೆ ಪೂರೈಕೆ ಮಾಡುವ ನೀರಿಗೆ ಒಟ್ಟು ನಾಲ್ಕು ಸ್ಲ್ಯಾಬ್‌ ನಲ್ಲಿ ದರ ನಿಗದಿ ಪಡಿಸಲಾಗಿದೆ.

ಪ್ರತಿ ಲೀಟರ್‌ ದರವನ್ನು 1 ಪೈಸೆ ಹೆಚ್ಚಳ ಮಾಡುವುದಕ್ಕೆ ಈಗಾಗಲೇ ರಾಜ್ಯ ಸರ್ಕಾರ ಅನುಮೋದನೆ ನೀಡಿದೆ. ಅಪಾರ್ಟ್‌ಮೆಂಟ್‌, ವಸತಿಯೇತರ ಬಳಕೆಯ ನೀರಿನ ದರ ಸಹ ವಿವಿಧ ಸ್ಲ್ಯಾಬ್‌ ಆಧಾರದ ಮೇಲೆ ಪರಿಷ್ಕರಣೆ ಮಾಡಲಾಗಿದೆ. .

ಸಂಭವನೀಯ ಸ್ಲ್ಯಾಬ್‌ ದರ ಹೇಗಿದೆ?
ಮೊದಲ ಸ್ಯಾಬ್‌

ತಿಂಗಳಿಗೆ 8 ಸಾವಿರ ಲೀಟರ್‌ ಬಳಕೆ ಮಾಡುವವರಿಗೆ ಪ್ರತಿ ಸಾವಿರ ಲೀಟರ್‌ ಗೆ 7 ರೂ. ದರ ನಿಗದಿ.
ಪ್ರತಿ ಲೀಟರ್‌ಗೆ 1 ಪೈಸೆ ಹೆಚ್ಚಳ ಮಾಡಿದರೆ ಸಾವಿರ ಲೀಟರ್‌ಗೆ 17 ರೂ. ಪಾವತಿಸಬೇಕು.
ಮಾಸಿಕ ಪಾವತಿ ದರವು 56 ರೂ. ನಿಂದ 136 ರೂ.ಗೆ ಹೆಚ್ಚಳ

2ನೇ ಸ್ಲ್ಯಾಬ್‌:
8,001 ಲೀಟರ್‌ ನಿಂದ 25 ಸಾವಿರ ಲೀಟರ್‌ ಗೆ ಸದ್ಯ ಪ್ರತಿ ಸಾವಿರ ಲೀಟರ್‌ಗೆ 11 ರೂ..
ಪರಿಷ್ಕೃತ ದರ ಜಾರಿಗೊಂಡರೆ 21 ರೂ. ಪಾವತಿಸಬೇಕು
ಕನಿಷ್ಠ 168 ರೂ. ನಿಂದ ಗರಿಷ್ಠ 525 ರೂ.ಗೆ ದರ ಹೆಚ್ಚಳ

3ನೇ ಸ್ಲ್ಯಾಬ್‌:
25,001 ಲೀಟರ್‌ನಿಂದ 50 ಸಾವಿರ ಲೀಟರ್‌ಗೆ ಸದ್ಯ ಪ್ರತಿ ಸಾವಿರ ಲೀಟರ್‌ಗೆ 25 ರೂ.
ಪರಿಷ್ಕೃತ ದರ ಜಾರಿಗೊಂಡರೆ 35 ರೂ. ಆಗಲಿದೆ.
ಕನಿಷ್ಠ 875 ರೂ. ನಿಂದ 1,750 ರೂ. ವರೆಗೆ ಪಾವತಿಸಬೇಕು

4ನೇ ಸ್ಲ್ಯಾಬ್‌:
50,001 ಲೀಟರ್‌ಗಿಂತ ಹೆಚ್ಚಿನ ನೀರು ಬಳಕೆದಾರರಿಗೆ ಪ್ರತಿ ಸಾವಿರ ಲೀಟರ್‌ಗೆ 45 ರೂ.
ಪರಿಷ್ಕೃತ ದರ ಜಾರಿಗೆ ಬಂದರೆ 55 ರೂ. ಪಾವತಿಸಬೇಕು.
2,250 ರೂ.ನಿಂದ ನೀರಿನ ಬಳಕೆಯಂತೆ ಪಾವತಿ ಮಾಡಬೇಕು.