ಶಿವಮೊಗ್ಗ: ಕಲಿಯುವುದಕ್ಕೆ ವಯಸ್ಸಿನ ನಿರ್ಬಂಧ ಇಲ್ಲ ಎನ್ನುತ್ತಾರೆ. ವೃದ್ಧೆಯೊಬ್ಬರು ಇದನ್ನು ಸಾಬೀತು ಮಾಡಿದ್ದಾರೆ. ಇಂದು ಎಸ್ಸೆಸ್ಸೆಲ್ಸಿ ಫಲಿತಾಂಶ ಪ್ರಕಟವಾಗಿದ್ದು, 63 ವರ್ಷದ ವೃದ್ಧೆಯೊಬ್ಬರು ಪರೀಕ್ಷೆಯಲ್ಲಿ ತೇರ್ಗಡೆಯಾಗಿದ್ದಾರೆ.
ತೀರ್ಥಹಳ್ಳಿ (Tirthahalli) ಪಟ್ಟಣದ ನಿವಾಸಿ 63 ವರ್ಷದ ಪ್ರಮೀಳಾ ನಾಯಕ್ ಎಂಬುವರು ಎಸ್ಸೆಸ್ಸೆಲ್ಸಿ ಪರೀಕ್ಷೆ ಬರೆದು ತೇರ್ಗಡೆ ಹೊಂದಿದ್ದಾರೆ. ಪ್ರಮೀಳಾ ನಾಯಕ್ ಅವರ ಸಾಧನೆಗೆ ಕುಟುಂಬಸ್ಥರು ಮತ್ತು ಸ್ನೇಹಿತರು ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ.
ಪ್ರಮೀಳಾ ನಾಯಕ್ ಅವರ ಪತಿ ನಿವೃತ್ತ ಸಿಂಡಿಕೇಟ್ ಉದ್ಯೋಗಿಯಾಗಿದ್ದಾರೆ. ಪ್ರಮೀಳಾ ನಾಯಕ್ ಮದುವೆ ನಂತರ ವಿದ್ಯಾಭ್ಯಾಸ ನಿಲ್ಲಿಸಿದ್ದರು. ಆದರೂ ಅವರಿಗೆ ಎಸ್ಸೆಸ್ಸೆಲ್ಸಿ ಪರೀಕ್ಷೆ ಬರೆಯಬೇಕೆಂಬ ಆಸೆ ಇತ್ತು. ಆದರೆ, ಸಂಸಾರ ಜಂಜಾಟ ಇದಕ್ಕೆ ಅವಕಾಶ ನೀಡಿರಲಿಲ್ಲ. ಇರುವ ಓರ್ವ ಮಗನನ್ನು ಬೆಳೆಸುವುದರಲ್ಲೇ ಕಾಲ ಕಳೆದಿದ್ದರು. ಈಗ ಮಗ ಸಿಂಗಾಪುರ್ ದಲ್ಲಿದ್ದು, ತಾಯಿ ಪರೀಕ್ಷೆ ಬರೆದು ಪಾಸ್ ಮಾಡಿದ್ದಾರೆ.
