ಹನೋಯಿ: ಮದುವೆ ವೇಳೆ ಮಗಳಿಗೆ ಚಿನ್ನಾಭರಣಗಳು, ಸೈಟ್, ಕಾರು ಉಡುಗೊರೆಯಾಗಿ ಕೊಡುವುದನ್ನು ನೋಡಿರುತ್ತೀರಿ? ಆದರೆ ವಿಚಿತ್ರವೆಂಬಂತೆ, ವಿಯೆಟ್ನಾಂನಲ್ಲಿ ಪೋಷಕರು ತಮ್ಮ 22 ವರ್ಷದ ಮಗಳಿಗೆ ಮದುವೆಯ ಉಡುಗೊರೆಯಾಗಿ 100 ಪುನುಗು ಬೆಕ್ಕುಗಳನ್ನು(civet cats) ಉಡುಗೊರೆಯಾಗಿ ನೀಡಿದ್ದಾರೆ!
ಹೌದು, ಈ 100 ಪುನುಗು ಬೆಕ್ಕುಗಳ ಮೌಲ್ಯ ಸುಮಾರು 60 ಲಕ್ಷ ರೂಪಾಯಿಗಳು (70 ಸಾವಿರ ಅಮೆರಿಕನ್ ಡಾಲರ್). ಈ ವಿಚಾರ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ.
ಈ 100 ಹೆಣ್ಣು ಪುನುಗು ಬೆಕ್ಕುಗಳು ಸಂತಾನೋತ್ಪತ್ತಿಗೆ ಸಮರ್ಥವಾಗಿದ್ದು, ಇವುಗಳ ಒಟ್ಟು ಮೌಲ್ಯ 1.8 ಬಿಲಿಯನ್ ವಿಯೆಟ್ನಾಮೀಸ್ ಡಾಂಗ್ ಆಗಿದೆ. ಇದರ ಜೊತೆಗೆ, ವಧುವಿಗೆ 25 ಚಿನ್ನದ ಗಟ್ಟಿ, 17 ಲಕ್ಷ ರೂಪಾಯಿ ನಗದು, 98 ಲಕ್ಷ ರೂ. ಮೌಲ್ಯದ ಕಂಪನಿ ಷೇರುಗಳು, ಏಳು ಆಸ್ತಿಗಳು ಮತ್ತು ಇತರ ಮೌಲ್ಯಯುತ ವಸ್ತುಗಳನ್ನೂ ವಧುವಿಗೆ ಪೋಷಕರು ನೀಡಿದ್ದಾರೆ.
ಪುನುಗು ಬೆಕ್ಕುಗಳು ವಿಯೆಟ್ನಾಂನಲ್ಲಿ ಅತ್ಯಂತ ಮೌಲ್ಯಯುತ ಆಸ್ತಿಯಾಗಿವೆ. ಏಕೆಂದರೆ ಇವು ಕೋಪಿ ಲುವಾಕ್ ಕಾಫಿಯ ಉತ್ಪಾದನೆಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ. ಇದು ವಿಶ್ವದ ಅತ್ಯಂತ ದುಬಾರಿ ಕಾಫಿಗಳಲ್ಲಿ ಒಂದಾಗಿದೆ. ಈ ಕಾಫಿಯನ್ನು ಬೆಕ್ಕುಗಳು ತಿನ್ನುವ ಕಾಫಿ ಚೆರಿಗಳನ್ನು ಜೀರ್ಣಿಸಿದ ನಂತರ ಅವುಗಳ ಮಲದಿಂದ ಸಂಗ್ರಹಿಸಿದ ಕಾಳುಗಳನ್ನು ಸಂಸ್ಕರಿಸಿ, ಒಣಗಿಸಿ, ರೋಸ್ಟ್ ಮಾಡಿ ತಯಾರಿಸಲಾಗುತ್ತದೆ.
ಒಂದು ಹೆಣ್ಣು ಪುನುಗು ಬೆಕ್ಕಿನ ಬೆಲೆ ಸುಮಾರು 60,000 ರೂ.ಗಳಾಗಿದ್ದು, ಗರ್ಭಿಣಿಯಾಗಿದ್ದರೆ 85 ಸಾವಿರ ರೂ.ಗಿಂತಲೂ ಹೆಚ್ಚಿನ ಬೆಲೆಗೆ ಮಾರಾಟವಾಗುತ್ತದೆ. ಇದರ ಜೊತೆಗೆ, ಚೀನಾ ಮತ್ತು ವಿಯೆಟ್ನಾಂನಲ್ಲಿ ಪುನುಗು ಬೆಕ್ಕಿನ ಮಾಂಸವನ್ನು ರುಚಿಕರ ಖಾದ್ಯವೆಂದು ಪರಿಗಣಿಸಲಾಗುತ್ತದೆ ಮತ್ತು ಸಾಂಪ್ರದಾಯಿಕ ಚೀನೀ ಔಷಧಿಗಳಲ್ಲಿ ಇದನ್ನು ಬಳಸಲಾಗುತ್ತದೆ.
ವಧುವಿನ ತಂದೆ, ಹಾಂಗ್ ಚಿ ತಾಮ್, “ನನ್ನ ಮಗಳು ಬ್ಯುಸಿನೆಸ್ ಸ್ಕೂಲ್ ನಿಂದ ಪದವಿ ಪಡೆದಿದ್ದಾಳೆ. ಈ ಆಸ್ತಿಗಳನ್ನು ನಿರ್ವಹಿಸಲು ಸಂಪೂರ್ಣವಾಗಿ ಸಮರ್ಥಳು. ಇದು ಅವಳ ಆರ್ಥಿಕ ಸ್ವಾತಂತ್ರ್ಯವನ್ನು ಖಾತ್ರಿಪಡಿಸುತ್ತದೆ,” ಎಂದು ತಿಳಿಸಿದ್ದಾರೆ. ಈ ಬೆಕ್ಕುಗಳನ್ನು ಸಾಕಲು ಅಥವಾ ಮಾರಾಟ ಮಾಡಲು ಸಂಪೂರ್ಣ ಸ್ವಾತಂತ್ರ್ಯವನ್ನು ಅವಳಿಗೆ ನೀಡಲಾಗಿದೆ.
ಪುನುಗು ಬೆಕ್ಕುಗಳನ್ನು ಕಾಡಿನಿಂದ ಹಾನಿಕಾರಕ ವಿಧಾನಗಳ ಮೂಲಕ ಸೆರೆಹಿಡಿಯಲಾಗುತ್ತದೆ.
ಇವುಗಳನ್ನು ಕಿರಿದಾದ ಪಂಜರಗಳಲ್ಲಿ ಇರಿಸಿ, ಕಳಪೆ ಆಹಾರ ನೀಡಿ, ಒತ್ತಡದ ವಾತಾವರಣದಲ್ಲಿ ಇಡಲಾಗುತ್ತದೆ. ಇದರಿಂದಾಗಿ ಅವು ಸ್ವಯಂ-ಹಾನಿ, ಗಾಯಗಳು ಮತ್ತು ಆರಂಭಿಕ ಮರಣಕ್ಕೆ ಒಳಗಾಗುತ್ತವೆ ಎಂದು ವಿಶ್ವ ಪ್ರಾಣಿ ಸಂರಕ್ಷಣಾ ಸಂಸ್ಥೆಯ (World Animal Protection International) ವರದಿ ತಿಳಿಸಿದೆ.
ಈ ಉಡುಗೊರೆಯ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಮಿಶ್ರ ಪ್ರತಿಕ್ರಿಯೆಗಳು ವ್ಯಕ್ತವಾಗಿವೆ. ಕೆಲವರು ಈ ಆಸ್ತಿಗಳನ್ನು ನೀಡುವ ಮೂಲಕ ಮಗಳಿಗೆ ಆರ್ಥಿಕ ಸ್ವಾತಂತ್ರ್ಯ ಒದಗಿಸಿದ್ದೀರಿ ಎಂದು ಶ್ಲಾಘಿಸಿದರೆ, ಇನ್ನು ಕೆಲವರು ವನ್ಯಜೀವಿಗಳನ್ನು ವ್ಯಾಪಾರಕ್ಕೆ ಬಳಸುವ ನೈತಿಕತೆಯ ಬಗ್ಗೆ ಪ್ರಶ್ನೆಗಳನ್ನು ಎತ್ತಿದ್ದಾರೆ.
