ಕ್ಷಮಿಸಿ ಅಪ್ಪಾ, ಎಲ್ಲವೂ ಮುಗಿಯಿತು… ವರದಕ್ಷಿಣೆ ಪಿಡುಗಿಗೆ ಬಲಿಯಾದ ಕನಸು: ತಿರುಪ್ಪೂರ್‌ನಲ್ಲಿ ನವವಿವಾಹಿತೆಯ ದಾರುಣ ಅಂತ್ಯ

ತಿರುಪ್ಪೂರು: ಪ್ರೀತಿ, ಆಶಯಗಳಿಂದ ಹೊಸ ಬಾಳನ್ನು ಆರಂಭಿಸಿದ್ದ ನವವಿವಾಹಿತೆಯೊಬ್ಬರು ವರದಕ್ಷಿಣೆ ಕಿರುಕುಳದ ನರಕಯಾತೆಗೆ ಸಿಲುಕಿ ಜೀವ ಕಳೆದುಕೊಂಡಿರುವ ಹೃದಯ ವಿದ್ರಾವಕ ಘಟನೆ ತಮಿಳುನಾಡಿನ ತಿರುಪ್ಪೂರಿನಲ್ಲಿ ನಡೆದಿದೆ.

ಇದು ಭಾರತೀಯ ಸಮಾಜದಲ್ಲಿ ಇನ್ನೂ ಜೀವಂತವಾಗಿರುವ ವರದಕ್ಷಿಣೆ ಎಂಬ ಸಾಮಾಜಿಕ ಪಿಡುಗಿನ ಅಮಾನವೀಯ ಮುಖವನ್ನು ಮತ್ತೊಮ್ಮೆ ಬಯಲಿಗೆ ತಂದಿದೆ. ಕೇವಲ ಎರಡು ತಿಂಗಳ ಹಿಂದಷ್ಟೇ ಹೊಸ ಬದುಕಿನ ಕನಸು ಕಂಡಿದ್ದ 27 ವರ್ಷದ ನವವಿವಾಹಿತೆ ರಿಧನ್ಯಾ, ಅತ್ತೆ-ಮಾವ ಮತ್ತು ಪತಿಯ ವರದಕ್ಷಿಣೆ ಕಿರುಕುಳಕ್ಕೆ ಬೇಸತ್ತು ಆತ್ಮಹತ್ಯೆಗೆ ಶರಣಾಗಿದ್ದಾರೆ. ಈ ಘಟನೆ ಸಾರ್ವಜನಿಕ ವಲಯದಲ್ಲಿ ತೀವ್ರ ಆಘಾತ ಮತ್ತು ಆಕ್ರೋಶಕ್ಕೆ ಕಾರಣವಾಗಿದೆ.

ಕನಸುಗಳು ಕಮರಿದ ಹಾದಿ: ವಿವಾಹದಿಂದ ದುರಂತದವರೆಗೆ
ರಿಧನ್ಯಾ ಅವರ ವಿವಾಹವು ಏಪ್ರಿಲ್‌ 11ರಂದು 28 ವರ್ಷದ ಕವಿನ್‌ಕುಮಾರ್ ಅವರೊಂದಿಗೆ ಅದ್ದೂರಿಯಾಗಿ ನಡೆದಿತ್ತು. ರಿಧನ್ಯಾ ಕುಟುಂಬದವರು ತಮ್ಮ ಮಗಳ ಭವಿಷ್ಯ ಉಜ್ವಲವಾಗಿರಲಿ ಎಂದು ಬಯಸಿ, ವರದಕ್ಷಿಣೆಯ ರೂಪದಲ್ಲಿ ಅಪಾರ ಆಸ್ತಿಯನ್ನು ನೀಡಿದ್ದರು. ರಿತನ್ಯಾ ಅವರ ತಂದೆ ಅಣ್ಣಾದುರೈ ಗಾರ್ಮೆಂಟ್ ಉದ್ಯಮ ಹೊಂದಿದ್ದು, ಒಂದು ಕಾಲದಲ್ಲಿ ರಾಜಕೀಯದಲ್ಲೂ ಸಕ್ರಿಯರಾಗಿದ್ದರು.

ಮಗಳ ಮದುವೆಯ ಸಂದರ್ಭದಲ್ಲಿ ವರದಕ್ಷಿಣೆಯಾಗಿ 300 ಸವರೈನ್ ಚಿನ್ನ, 70 ಲಕ್ಷ ರೂ. ಮೌಲ್ಯದ ವೋಲ್ವೋ ಕಾರು ನೀಡಿದ್ದಲ್ಲದೇ, 2.5 ಕೋಟಿ ರೂ. ಖರ್ಚು ಮಾಡಿ ಮದುವೆ ಮಾಡಿಸಿಕೊಟ್ಟಿದ್ದರು. ಆ ಸಮಯದಲ್ಲಿ ಎಲ್ಲವೂ ಸುಸೂತ್ರವಾಗಿ ನಡೆಯಿತು ಎಂದು ತೋರಿತ್ತಾದರೂ, ಮದುವೆಯಾಗಿ ಕೆಲವೇ ವಾರಗಳಲ್ಲಿ ರಿಧನ್ಯಾ ಅವರ ಬದುಕಿನಲ್ಲಿ ಕರಾಳ ಅಧ್ಯಾಯ ಆರಂಭವಾಯಿತು.

ಕವಿನ್‌ಕುಮಾರ್ ಮತ್ತು ಅವರ ಕುಟುಂಬ ಸದಸ್ಯರು, ನೀಡಿದ ವರದಕ್ಷಿಣೆಯಿಂದ ತೃಪ್ತರಾಗದೆ, ಮತ್ತೆ ಹೆಚ್ಚಿನ ಹಣ ಮತ್ತು ವಸ್ತುಗಳಿಗಾಗಿ ರಿಧನ್ಯಾ ಅವರಿಗೆ ಕಿರುಕುಳ ನೀಡಲು ಶುರುಮಾಡಿದರು. ಆರಂಭದಲ್ಲಿ ಸಣ್ಣಪುಟ್ಟ ಮಾತಿನ ಚಕಮಕಿಯಿಂದ ಶುರುವಾದ ಈ ಕಿರುಕುಳ, ದಿನ ಕಳೆದಂತೆ ತೀವ್ರ ಸ್ವರೂಪ ಪಡೆದುಕೊಂಡಿತು. ರಿಧನ್ಯಾ ಅವರು ಮಾನಸಿಕವಾಗಿ ಮತ್ತು ದೈಹಿಕವಾಗಿ ಹಿಂಸೆ ಅನುಭವಿಸತೊಡಗಿದರು. ಆಕೆಗೆ ನೆಮ್ಮದಿಯಿಲ್ಲದ ಬದುಕು ನರಕ ಸಮಾನವಾಯಿತು.

ಕೊನೆಯ ಆಡಿಯೋ ಸಂದೇಶ
ಭಾನುವಾರ ಮೊಂಡಿಪಾಳಯಂನ ದೇವಸ್ಥಾನಕ್ಕೆ ಹೋಗಿ ಬರುವುದಾಗಿ ಹೇಳಿ ರಿಧನ್ಯಾ ಮನೆ ಬಿಟ್ಟಿದ್ದರು. ದಾರಿ ಮಧ್ಯೆಯೇ ಕಾರನ್ನು ರಸ್ತೆ ಬದಿ ನಿಲ್ಲಿಸಿ, ವಿಷ ಸೇವಿಸಿದ್ದಾರೆ. ತುಂಬಾ ಹೊತ್ತು ಕಾರು ಅಲ್ಲೇ ಪಾರ್ಕ್ ಮಾಡಿದ್ದನ್ನು ನೋಡಿದ ಸ್ಥಳೀಯರು ಸ್ಥಳಕ್ಕಾಗಮಿಸಿದಾಗ ಒಳಗೆ ರಿಧನ್ಯಾ ಪ್ರಜ್ಞಾಹೀನ ಸ್ಥಿತಿಯಲ್ಲಿ ಬಿದ್ದಿದ್ದರು. ಕೂಡಲೇ ಪೊಲೀಸರಿಗೆ ಮಾಹಿತಿ ನೀಡಿ, ಆಕೆಯನ್ನು ಆಸ್ಪತ್ರೆಗೆ ಸಾಗಿಸಲಾಯಿತಾದರೂ, ಅಷ್ಟರಲ್ಲೇ ಅವರು ಕೊನೆಯುಸಿರೆಳೆದಿದ್ದರು. ಆತ್ಮಹತ್ಯೆಗೂ ಮುಂಚೆ ರಿಧನ್ಯಾ ತಮ್ಮ ತಂದೆಗೆ ವಾಟ್ಸ್ ಆ್ಯಪ್ ಮೂಲಕ 7 ಆಡಿಯೋ ಸಂದೇಶಗಳನ್ನು ಕಳುಹಿಸಿದ್ದರು. ಅದರಲ್ಲಿ ಆಕೆ ತನ್ನ ಅಸಹಾಯಕತೆಯನ್ನು ಹಾಗೂ ನೋವನ್ನು ತೋಡಿಕೊಂಡಿದ್ದಾರೆ. ಈ ಆಡಿಯೋ ಸಂದೇಶಗಳು ಈಗ ಎಲ್ಲೆಡೆ ವೈರಲ್ ಆಗುತ್ತಿದ್ದು, ವ್ಯಾಪಕ ಆಕ್ರೋಶಕ್ಕೆ ಕಾರಣವಾಗಿದೆ.

ಈ ಸಂದೇಶಗಳಲ್ಲಿ, ತನ್ನ ಪತಿ ಮತ್ತು ಅತ್ತೆ-ಮಾವರಿಂದ ತಾನು ಪ್ರತಿದಿನವೂ ಹೇಗೆ ಮಾನಸಿಕವಾಗಿ ಹಿಂಸೆಗೆ ಒಳಗಾಗುತ್ತಿದ್ದೇನೆ, ದೈಹಿಕ ದೌರ್ಜನ್ಯವನ್ನೂ ಎದುರಿಸುತ್ತಿದ್ದೇನೆ ಎಂಬುದನ್ನು ಕಣ್ಣೀರಿಡುತ್ತಲೇ ವಿವರಿಸಿದ್ದಾರೆ. “ನನಗೆ ಬದುಕುವುದಕ್ಕೆ ಇಷ್ಟವಿಲ್ಲ, ಈ ಕಿರುಕುಳವನ್ನು ಸಹಿಸಿಕೊಳ್ಳಲು ಸಾಧ್ಯವಿಲ್ಲ,” ಎಂಬಂತಹ ಮಾತುಗಳು ಆ ಆಡಿಯೋಗಳಲ್ಲಿ ದಾಖಲಾಗಿವೆ. ಈ ಆಡಿಯೋಗಳು ರಿಧನ್ಯಾ ಅನುಭವಿಸಿದ ಯಾತನೆಯ ಆಳವನ್ನು, ಅವರ ಅಸಹಾಯಕತೆಯನ್ನು ಸ್ಪಷ್ಟವಾಗಿ ತೋರಿಸುತ್ತವೆ. ಈ ಆಡಿಯೋಗಳೇ ಈ ಪ್ರಕರಣದ ಪ್ರಮುಖ ಸಾಕ್ಷಿಯಾಗಿವೆ.

ಆಡಿಯೋದಲ್ಲಿ ಏನಿದೆ?
ಪ್ರತಿನಿತ್ಯ ನಾನು ಯಾತನೆ ಅನುಭವಿಸುತ್ತಿದ್ದೇನೆ. ಇದನ್ನು ಯಾರ ಬಳಿಯೂ ಹೇಳಿಕೊಳ್ಳಲು ಆಗುತ್ತಿಲ್ಲ. ನನ್ನ ಸುತ್ತಲೂ ಇರುವವರೆಲ್ಲರೂ ನಾಟಕ ಮಾಡುತ್ತಿದ್ದಾರೆ. ಜೀವನಪೂರ್ತಿ ನಿಮಗೆ ಹೊರಯಾಗಿ ಇರಲು ನನಗೆ ಇಷ್ಟವಿಲ್ಲ. ನಾನು ಯಾವುದೇ ತಪ್ಪು ಮಾಡಿಲ್ಲ. ಅವರೆಲ್ಲರೂ ನನಗೆ ಮಾನಸಿಕ ಹಿಂಸೆ ನೀಡುತ್ತಿದ್ದಾರೆ, ನನ್ನ ಗಂಡ ದೈಹಿಕ ಹಿಂಸೆ ನೀಡುತ್ತಾನೆ. ನನಗೆ ಈ ಬದುಕು ಬೇಡ. ನೀವು ಮತ್ತು ಅಮ್ಮ ನನ್ನ ಜಗತ್ತು. ನನ್ನ ಕೊನೆಯ ಉಸಿರಿನವರೆಗೂ ನೀವೇ ನನ್ನ ಭರವಸೆಯಾಗಿದ್ದಿರಿ. ನನಗೆ ನಿಮ್ಮ ನೋವು ಅರ್ಥವಾಗುತ್ತದೆ. ಎಲ್ಲವೂ ಮುಗಿಯಿತು, ನನ್ನನ್ನು ಕ್ಷಮಿಸಿ ಅಪ್ಪಾ, ನಾನು ಹೊರಡುತ್ತಿದ್ದೇನೆ ಎಂದು ರಿಧನ್ಯಾ ಹೇಳಿಕೊಂಡಿದ್ದಾರೆ.

ಕಾನೂನಿನ ಕಠಿಣ ಕ್ರಮ ಮತ್ತು ತನಿಖೆ
ರಿಧನ್ಯಾ ಅವರ ದಾರುಣ ಸಾವಿನ ವಿಷಯ ತಿಳಿದ ಕುಟುಂಬ ಸದಸ್ಯರು ತಕ್ಷಣವೇ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ರಿಧನ್ಯಾ ಅವರ ತಂದೆ ನೀಡಿದ ದೂರಿನ ಆಧಾರದ ಮೇಲೆ, ಪೊಲೀಸರು ತಕ್ಷಣವೇ ವರದಕ್ಷಿಣೆ ಕಿರುಕುಳ (Dowry Harassment) ಮತ್ತು ಆತ್ಮಹತ್ಯೆಗೆ ಪ್ರಚೋದನೆ (Abetment to Suicide) ನೀಡಿದ ಆರೋಪದ ಅಡಿಯಲ್ಲಿ, ರಿಧನ್ಯಾ ಅವರ ಪತಿ ಕವಿನ್‌ಕುಮಾರ್, ಅತ್ತೆ ಮತ್ತು ಮಾವನನ್ನು ಬಂಧಿಸಲಾಗಿದೆ.

ತಿರುಪ್ಪೂರ್ ಪೊಲೀಸರು ಈ ಪ್ರಕರಣವನ್ನು ಅತ್ಯಂತ ಗಂಭೀರವಾಗಿ ಪರಿಗಣಿಸಿದ್ದು, ಸದ್ಯ ಸಮಗ್ರ ತನಿಖೆ ನಡೆಸುತ್ತಿದ್ದಾರೆ. ಬಂಧಿತರನ್ನು ವಿಚಾರಣೆಗೆ ಒಳಪಡಿಸಲಾಗಿದ್ದು, ಹೆಚ್ಚಿನ ಮಾಹಿತಿ ಕಲೆಹಾಕಲಾಗುತ್ತಿದೆ. ಈ ಪ್ರಕರಣಕ್ಕೆ ಸಂಬಂಧಿಸಿದ ಎಲ್ಲಾ ಸಾಕ್ಷ್ಯಗಳನ್ನು, ವಿಶೇಷವಾಗಿ ರಿಧನ್ಯಾ ಅವರು ಕಳುಹಿಸಿದ ಆಡಿಯೋ ಸಂದೇಶಗಳನ್ನು, ಪೊಲೀಸರು ಸೂಕ್ಷ್ಮವಾಗಿ ಪರಿಶೀಲಿಸುತ್ತಿದ್ದಾರೆ.