ಭಯೋತ್ಪಾದನೆ ಎನ್ನುವುದು ಅಮೆರಿಕದ ಪಾಪದ ಕೂಸು ಎಂಬ ಮಾತಿದೆ. ತಾನೇ ಸಾಕಿದ ಗಿಣಿ ತನ್ನನ್ನೇ ಹದ್ದಾಗಿ ಕುಕ್ಕಿದ ಕತೆ ಅಮೆರಿಕ ವಿಚಾರದಲ್ಲೂ ಸತ್ಯವಾಗಿದ್ದೂ ಇದೆ. ತಾನೇ ಸಾಕಿ ಸುಲುಹಿದ್ದ ಬಿನ್ ಲಾಡನ್ ಕಡೆಗೆ ಅಮೆರಿಕದ ಪಾಲಿಗೆ ಪರಮ ಶತ್ರುವಾಗಿ ಕಾಡಿದ್ದು ಸುಳ್ಳಲ್ಲ. ಅದೇ ರೀತಿ ಈಗ ತನ್ನ ಪ್ರತಿಷ್ಠೆ, ಅಹಂಕಾರಕ್ಕೆ ಅಮೆರಿಕ ಮತ್ತೊಮ್ಮೆ ಬೆಲೆ ತೆರುವ ಕಾಲ ಬರುತ್ತಾ ಎನ್ನುವ ಪ್ರಶ್ನೆ ಮೂಡುತ್ತಿದೆ. ಹೌದು, ಇಸ್ರೇಲ್ ಸಾರಿದ್ದ ಸಮರದಲ್ಲಿ ಅಮೆರಿಕ ಈಗ ಮೂಗುತೂರಿಸಿದೆ. ಇದರ ಪರಿಣಾವನ್ನು ಅನುಭವಿಸಬೇಕಾದ ಕಾಲ ಹತ್ತಿರವಿದೆಯಾ ಎಂಬ ಅನುಮಾನ ಆವರಿಸಿದೆ.
ಇರಾನ್ ನ ಬೇನಾಮಿಗಳಿಂದ ಕಾದಿದೆಯಾ ಗಂಡಾಂತರ?
ಅಮೆರಿಕದ 10 ಸಾವಿರ ನೆಲೆಗಳ ಮೇಲೆ ತೂಗುಗತ್ತಿ
ಇಸ್ರೇಲ್ ಹೆಗಲ ಮೇಲೆ ಬಂದೂಕಿಟ್ಟು ಹೋರಾಟಕ್ಕಿಳಿದಿರುವ ಅಮೆರಿಕಗೆ ಇದಕ್ಕೆ ತಕ್ಕ ಶಾಸ್ತಿ ಕಾದಿದೆಯಾ ಎಂಬ ಗುಮಾನಿ ಇದೆ. ಇವತ್ತು ಇರಾನ್ ಮೇಲೆ ಬಿ-2 ಯುದ್ಧ ವಿಮಾನಗಳಿಂದ ದಾಳಿ ನಡೆಸಿರುವ ಅಮೆರಿಕ ಇದಕ್ಕೆ ತಕ್ಕ ಬೆಲೆ ತೆರಬೇಕಾಗಬಹುದು.
ಈಗಾಗಲೇ ಇರಾನ್ ಸರ್ವೋಚ್ಛ ನಾಯಕ ಖಮೇನಿ ಕೂಡಾ ಅಮೆರಿಕಗೆ ಅಂತಿಮ ಸಂದೇಶ ರವಾನಿಸಿದ್ದಾರೆ. ಇದನ್ನೂ ಲೆಕ್ಕಿಸದೆ ಸಿಡಿದೆದ್ದಿರುವ ಅಮೆರಿಕಗೆ ಮುಂದೆ ದೊಡ್ಡ ಅನಾಹುತ ಕಾದಿರುವ ಸುಳಿವು ಸಿಗುತ್ತಿದೆ. ಕುವೈತ್, ಕತಾರ್, ದುಬೈ ಸೇರಿದಂತೆ ಮಧ್ಯಪ್ರಾಚ್ಯದ ಹಲವು ದೇಶಗಳಲ್ಲಿ ಅಮೆರಿಕದ 10 ಸಾವಿರ ಸೇನಾ ನೆಲೆಗಳಿವೆ. ಈ ನೆಲೆಗಳನ್ನು ಇರಾನ್ ಟಾರ್ಗೆಟ್ ಮಾಡುವ ಸಾಧ್ಯತೆಗಳಿವೆ.
ಹಮಾಸ್, ಹಿಜ್ಬೊಲ್ಲಾ, ಹೌತಿಗಳಿಂದ ಪ್ರತಿದಾಳಿ
ಅಮೆರಿಕಗೆ ನುಗ್ಗಿ ಹೊಡೀತಾರಾ ಎದುರಾಳಿಗಳು
2001ರಲ್ಲಿ ಒಸಾಮಾ ಬಿನ್ ಲಾಡೆನ್ ನಡೆಸಿದ ಪ್ರಳಯಾತಂಕ ದಾಳಿ ಇನ್ನೂ ಅಮೆರಿಕನ್ನರ ಮನದಲ್ಲಿ ಅಚ್ಚಳಿಯದೆ ಉಳಿದಿದೆ. ಈಗ ಇರಾನ್ ಕೆಣಕಿರುವ ಅಮೆರಿಕಗೆ ಭವಿಷ್ಯದಲ್ಲಿ ಇಂಥದ್ದೇ ದಾಳಿಯ ಆತಂಕ ಆವರಿಸಿದೆ. ಇನ್ನು ಇರಾನ್ ಪ್ರತೀಕಾರದ ವಿಷಕಾರುತ್ತಿದೆ. ಹೀಗಾಗಿಯೇ, ತನ್ನ ಬೇನಾಮಿಗಳಾಗಿ ಹಮಾಸ್, ಹಿಜ್ಬೊಲಾ, ಹೌತಿಗಳಿಗೆ ಹಾಲೆರೆದು ಬೆಳೆಸಿದೆ ಇರಾನ್.
ಅಗತ್ಯ ಹಣಕಾಸು, ಶಸ್ತ್ರಾಸ್ತ್ರಗಳನ್ನು ಪೂರೈಸುತ್ತಾ ಬಂದಿರುವ ಇರಾನ್, ಅನಿವಾರ್ಯತೆ ಬಂದ್ರೆ, ಇವರನ್ನೇ ಅಸ್ತ್ರವಾಗಿಸುವ ಲೆಕ್ಕದಲ್ಲಿದೆ. ಹಮಾಸ್, ಹಿಜ್ಬುಲ್ಲಾ ಅಷ್ಟು ಪ್ರಬಲವಾಗಿಲ್ಲದಿದ್ದರೂ ಹೌತಿಗಳು ಎಂತಹ ಸನ್ನಿವೇಶವನ್ನೂ ಗೆದ್ದು ಬರುವ ಛಾತಿಯವರಾಗಿದ್ದಾರೆ. ಅದರಲ್ಲೂ ಕೆಂಪು ಸಮುದ್ರದಲ್ಲಿ ಅಮೆರಿಕದ ವಹಿವಾಟಿಗೆ ಈ ಹೌತಿಗಳು ದೊಡ್ಡ ಅಡ್ಡಗಾಲಾಗುವ ಸಾಧ್ಯತೆಗಳಿವೆ. ಹೀಗಾಗಿ, ಅಮೆರಿಕದ ಒಂದು ದೊಡ್ಡ ನಿರ್ಧಾರ, ಆ ದೇಶದ ಪ್ರಜೆಗಳ ಪಾಲಿಗೆ ಮೃತ್ಯುಗಂಟೆಯಾಗಿ ಬದಲಾಗುತ್ತಾ ಅನ್ನೋ ಆತಂಕ ಸೃಷ್ಟಿಸಿದೆ.
