ಲೀಡ್ಸ್: ಭಾರತದ ಡೈನಾಮಿಕ್ ವಿಕೆಟ್ ಕೀಪರ್-ಬ್ಯಾಟ್ಸ್‌ಮನ್ ರಿಷಭ್ ಪಂತ್ ಅವರು ಇಂಗ್ಲೆಂಡ್ ವಿರುದ್ಧದ ಮೊದಲ ಟೆಸ್ಟ್‌ನ ಎರಡನೇ ದಿನದಾಟದಲ್ಲಿ ಇತಿಹಾಸ ನಿರ್ಮಿಸಿದ್ದಾರೆ. ಮೊದಲ ದಿನಧೋನಿ ಅವರ ರನ್ ದಾಖಲೆ ಮುರಿದಿದ್ದ ಪಂತ್, ಶನಿವಾರ ಶತಕ ಸಿಡಿಸಿ, ಟೆಸ್ಟ್ ಕ್ರಿಕೆಟ್‌ನಲ್ಲಿ ಭಾರತದ ಪರ ಅತಿ ಹೆಚ್ಚು ಶತಕ ಬಾರಿಸಿದ ವಿಕೆಟ್ ಕೀಪರ್ ಎನಿಸಿಕೊಂಡಿದ್ದಾರೆ. 65 ರನ್‌ಗಳಿಂದ ತಮ್ಮ ಬ್ಯಾಟಿಂಗ್ ಮುಂದುವರಿಸಿದ ಪಂತ್, ಅದ್ಭುತವಾಗಿ ಶತಕ ಪೂರೈಸಿ ಸಂಭ್ರಮಿಸಿದರು. ಶತಕಕ್ಕೆ ಕೇವಲ ಒಂದು ರನ್ ಬೇಕಿದ್ದಾಗ, ತಮ್ಮ ಸಿಗ್ನೇಚರ್ ಒನ್-ಹ್ಯಾಂಡೆಡ್ ಸಿಕ್ಸರ್ ಮೂಲಕ ಶತಕದ ಗಡಿ ದಾಟಿದ್ದು ವಿಶೇಷವಾಗಿತ್ತು.
ಧೋನಿ ದಾಖಲೆ ಪತನ: ಪಂತ್ ಈಗ ಅಗ್ರಸ್ಥಾನದಲ್ಲಿ!
ಈವರೆಗೂ ಟೆಸ್ಟ್ ಕ್ರಿಕೆಟ್‌ನಲ್ಲಿ ಅತಿ ಹೆಚ್ಚು ಶತಕ ಬಾರಿಸಿದ ಭಾರತೀಯ ವಿಕೆಟ್ ಕೀಪರ್‌ಗಳ ಪಟ್ಟಿಯಲ್ಲಿ ಪಂತ್ ಮತ್ತು ಎಂ.ಎಸ್. ಧೋನಿ ಜಂಟಿ ಅಗ್ರಸ್ಥಾನದಲ್ಲಿದ್ದರು. ಈಗ ಪಂತ್ ತಮ್ಮ 7ನೇ ಟೆಸ್ಟ್ ಶತಕ ಪೂರೈಸುವ ಮೂಲಕ ಧೋನಿ ಅವರ 6 ಶತಕಗಳ ದಾಖಲೆಯನ್ನು ಹಿಂದಿಕ್ಕಿದ್ದಾರೆ. ಈ ಹಿಂದೆ, ಸೇನಾ (SA, ENG, NZ, AUS) ರಾಷ್ಟ್ರಗಳಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಏಷ್ಯನ್ ವಿಕೆಟ್ ಕೀಪರ್ ಎಂಬ ಧೋನಿಯ ದಾಖಲೆಯನ್ನೂ ಪಂತ್ ಮುರಿದಿದ್ದರು.
ಭಾರತ ಪರ ವಿಕೆಟ್‌ಕೀಪರ್‌ ಆಗಿ ಅತ್ಯಧಿಕ ಟೆಸ್ಟ್ ಶತಕಗಳು:
- ರಿಷಭ್ ಪಂತ್: 7 ಶತಕಗಳು
- ಎಂ.ಎಸ್ ಧೋನಿ: 6 ಶತಕಗಳು
- ವೃದ್ಧಿಮಾನ್‌ ಸಾಹಾ: 3 ಶತಕಗಳು
23 ವರ್ಷಗಳ ಬಳಿಕ ಲೀಡ್ಸ್‌ನಲ್ಲಿ ತ್ರಿವಳಿ ಶತಕದ ಸಂಭ್ರಮ!
ಈ ಪಂದ್ಯದಲ್ಲಿ ಪಂತ್ ಶತಕ ಬಾರಿಸುವುದರೊಂದಿಗೆ, ಭಾರತ ತಂಡವು 23 ವರ್ಷಗಳ ಬಳಿಕ ಮತ್ತೊಂದು ಐತಿಹಾಸಿಕ ಸಾಧನೆ ಮಾಡಿದೆ. 2002ರಲ್ಲಿ ಲೀಡ್ಸ್‌ನಲ್ಲಿ ಇಂಗ್ಲೆಂಡ್ ವಿರುದ್ಧ ಭಾರತ ಆಡಿದ್ದಾಗ, ರಾಹುಲ್ ದ್ರಾವಿಡ್ (148), ಸಚಿನ್ ತೆಂಡೂಲ್ಕರ್ (193) ಮತ್ತು ನಾಯಕ ಸೌರವ್ ಗಂಗೂಲಿ (128) ಶತಕ ಬಾರಿಸಿ ಭಾರತಕ್ಕೆ ಇನ್ನಿಂಗ್ಸ್ ಮತ್ತು 46 ರನ್‌ಗಳ ಭರ್ಜರಿ ಗೆಲುವು ತಂದುಕೊಟ್ಟಿದ್ದರು.
ಈಗ 2025ರಲ್ಲಿ, ಶುಭಮನ್ ಗಿಲ್, ಯಶಸ್ವಿ ಜೈಸ್ವಾಲ್ ಮತ್ತು ರಿಷಭ್ ಪಂತ್ ಅವರು ಶತಕ ಬಾರಿಸುವ ಮೂಲಕ ಲೀಡ್ಸ್‌ನಲ್ಲಿ ತ್ರಿವಳಿ ಶತಕಗಳ ಸಾಧನೆ ಪುನರಾವರ್ತಿಸಿದ್ದಾರೆ. 2002ರ ಪಂದ್ಯದಲ್ಲಿ ಭಾರತ 628 ರನ್ ಗಳಿಸಿ ಡಿಕ್ಲೇರ್ ಮಾಡಿತ್ತು. ಈ ಪಂದ್ಯದ ಲಕ್ಷಣಗಳನ್ನು ಗಮನಿಸಿದರೆ, ಆಗಿನ ಪಂದ್ಯದಂತೆ ಭಾರತಕ್ಕೆ ಇನ್ನಿಂಗ್ಸ್ ಗೆಲುವು ದಕ್ಕುವ ಸಾಧ್ಯತೆ ಗೋಚರಿಸುತ್ತಿದೆ. ಪಂತ್ ಅವರ ಈ ಶತಕ ತಂಡದ ಬೃಹತ್ ಮೊತ್ತಕ್ಕೆ ಭದ್ರ ಬುನಾದಿ ಹಾಕಿದೆ.
