ಎಲ್ಐಸಿ ಪಾಲಿಸಿ ಮೇಲೆ ಕಡಿಮೆಬಡ್ಡಿಗೆ ಸಾಲ ಪಡೆಯೋದು ಹೇಗೆ?

ಯಾವುದೋ ಕಾರಣಕ್ಕೆ ಹಣದ ಅವಶ್ಯಕತೆ ತುಂಬ ಇರತ್ತೆ. ಹೂಂ ಹೂಂ, ಗೆಳೆಯರು, ಸಂಬಂಧಿಕರು ಯಾರೂ ನೆರವಿಗೆ ಬರಲ್ಲ. ಬ್ಯಾಂಕ್ ಗಳಲ್ಲಿ ಪರ್ಸನಲ್ ಲೋನ್ ತೆಗೆದುಕೊಳ್ಳೋಣ ಅಂದ್ರೆ, ಬಡ್ಡಿ ಜಾಸ್ತಿ. ಇಂಥ ಟೈಮಲ್ಲಿ ಏನು ಮಾಡಬೇಕು ಎಂಬುದೇ ತೋಚೋದಿಲ್ಲ. ಆದ್ರೆ, ಚಿಂತೆ ಬೇಡ. ನೀವು ಎಲ್ಐಸಿ ಪಾಲಿಸಿದಾರರಾಗಿದ್ದರೆ, ನೀವು ಪಾಲಿಸಿಯನ್ನು ಕಟ್ಟುತ್ತಿದ್ದರೆ, ಸುಲಭವಾಗಿ ಕಡಿಮೆ ಬಡ್ಡಿಗೆ ಸಾಲ ಸಿಗುತ್ತೆ. ಅದಕ್ಕೆ ನೀವು ಮಾಡಬೇಕಾಗಿರೋದೇನು? ಇದೇ ಇವತ್ತಿನ ಸ್ಪೆಷಲ್ ಸ್ಟೋರಿ.

ಎಲ್ಐಸಿ ಎಂದೆಂದಿಗೂ ನಮಗೆ ಆಪತ್ಬಾಂಧವ
ಪಾಲಿಸಿ ಇದ್ದರೆ ಸಾಕು, ಸಾಲ ಸಿಗೋದು ಗ್ಯಾರಂಟಿ
2-3 ದಿನಗಳಲ್ಲೇ ಸಿಗುತ್ತದೆ ಎಲ್ಐಸಿ ಸಾಲ

ನೀವು ಎಲ್ಐಸಿ ಪಾಲಿಸಿ ಹೊಂದಿದ್ದರೆ, ಅದರ ಮೇಲೆ ಸುಲಭವಾಗಿ ಸಾಲ ಪಡೆಯಬಹುದು. ಬಡ್ಡಿಯೂ ತುಂಬಾ ಕಡಿಮೆ ಇರತ್ತೆ. ನಿಮಗೆ ಹಣ ಸಿಕ್ಕಾಗಲೇ ಮರುಪಾವತಿ ಮಾಡಬಹುದು. ನಿಮ್ಮ ಪಾಲಿಸಿಯ ಅವಧಿಯವರೆಗೆ ನೀವು ಸಾಲವನ್ನು ರಿವೈಸ್ ಮಾಡಬಹುದು. ವರ್ಷಕ್ಕೊಮ್ಮೆ ಬಡ್ಡಿಯನ್ನೂ ಅಪ್ಡೇಟ್ ಮಾಡಲಾಗುತ್ತದೆ. ಎಲ್ಐಸಿ ಪಾಲಿಸಿಯ ಮೇಲೆ ತೆಗೆದುಕೊಂಡ ಸಾಲಗಳು ಸುರಕ್ಷಿತ ಸಾಲಗಳ ವ್ಯಾಪ್ತಿಯಲ್ಲಿ ಬರುತ್ತವೆ. ಹಾಗಾಗಿ ಇವುಗಳ ಮೇಲಿನ ಬಡ್ಡಿ ಕಡಿಮೆ ಇರುತ್ತದೆ. ಆದರೆ, ನೀವು ಪಡೆಯುವ ಸಾಲದ ಮೊತ್ತವು ನಿಮ್ಮ ಪಾಲಿಸಿಗೆ ಈಗಾಗಲೇ ಪಾವತಿಸಿರುವ ಪ್ರೀಮಿಯಂಅನ್ನು ಅವಲಂಬಿಸಿರುತ್ತದೆ.

ಎಲ್ಐಸಿ ಸಾಲಕ್ಕಿಲ್ಲ ಇಎಂಐ ತಲೆನೋವು
ಹಣ ಇದ್ದಾಗಲೇ ಅಸಲು, ಬಡ್ಡಿ ಕಟ್ಟಿ
ವರ್ಷ ವರ್ಷ ಮಾತ್ರ ರಿವೈಸ್ ಮಾಡ್ತಿರಿ

ಎಲ್ಐಸಿ ಪಾಲಿಸಿಯ ಆಧಾರದಲ್ಲಿ ಪಡೆದ ಸಾಲಗಳಿಗೆ ಇಎಂಐ ಪಾವತಿಸುವ ಅಗತ್ಯವಿಲ್ಲ. ನೀವು ತೆಗೆದುಕೊಂಡ ಸಾಲದ ಹಣವನ್ನು ಬಳಕೆ ಮಾಡಿ, ನಂತರ ನಿಮ್ಮ ಬಳಿ ಹಣ ಇದ್ದಾಗ ಅಸಲು, ಬಡ್ಡಿ ಪಾವತಿಸಬಹುದು. ಆದರೆ, ಸಾಲ ಪಡೆದುಕೊಂಡವರು ಪ್ರತಿ ವರ್ಷ ಸಾಲ, ಬಡ್ಡಿಯನ್ನು ರಿವೈಸ್ ಮಾಡೋದನ್ನು ಮಾತ್ರ ಮರೀಬಾರ್ದು.

ಎಲ್ಐಸಿ ಸಾಲ ನೀಡಲೂ ಇವೆ ರೂಲ್ಸ್
ಪ್ರೊಫೈಲ್ ಆಧರಿಸಿ ಸಾಲದ ಮೊತ್ತ ನಿಗದಿ
ಮರುಪಾವತಿ ಮಾಡದಿದ್ದರೆ ಪಾಲಿಸಿ ರದ್ದು

ಯಾವುದೇ ಪಾಲಿಸಿದಾರನ ಪಾಲಿಸಿಯ ಸರೆಂಡರ್ ಮೌಲ್ಯದ ಶೇ. 80-90 ರಷ್ಟು ಮೊತ್ತವನ್ನು ಮಾತ್ರವೇ ಸಾಲ ನೀಡಲಾಗುತ್ತದೆ. ಬಡ್ಡಿದರವನ್ನು ಪಾಲಿಸಿದಾರರ ಪ್ರೊಫೈಲ್ ಆಧರಿಸಿ ನಿರ್ಧರಿಸಲಾಗುತ್ತದೆ. ನೀವು ಸಾಲವನ್ನು ಮರುಪಾವತಿ ಮಾಡದಿದ್ದರೆ ಅಥವಾ ಸಾಲದ ಮೊತ್ತವು ಪಾಲಿಸಿಯ ಸರೆಂಡರ್ ಮೌಲ್ಯಕ್ಕಿಂತ ಹೆಚ್ಚಾದಾಗ, ನಿಮ್ಮ ಪಾಲಿಸಿಯನ್ನು ರದ್ದುಗೊಳಿಸಲಾಗುತ್ತದೆ. ನೀವು ಸಾಲವನ್ನು ಮರುಪಾವತಿ ಮಾಡುವ ಮೊದಲೇ ಪಾಲಿಸಿಯು ಮೆಚ್ಯೂರ್ ಆಗಿದ್ದರೆ, ಸಾಲ ಮತ್ತು ಬಡ್ಡಿಯನ್ನು ಪಾಲಿಸಿ ಹಣದಿಂದ ಕಡಿತಗೊಳಿಸಲಾಗುತ್ತದೆ.

ಹಾಗಾದ್ರೆ, ಎಲ್ಐಸಿ ಸಾಲ ಪಡೆಯೋದು ಹೇಗೆ?
ಯಾವೆಲ್ಲ ಪ್ರಕ್ರಿಯೆ ಅನುಸರಿಸಬೇಕು?
ಆನ್ ಲೈನ್ ನಲ್ಲೂ ಇದೆ ಅರ್ಜಿ ಸಲ್ಲಿಕೆಗೆ ಅವಕಾಶ

ಸಮೀಪದ ಎಲ್ಐಸಿ ಆಫೀಸ್ ಗೆ ಭೇಟಿ ನೀಡಿ, ಅರ್ಜಿ ಸಲ್ಲಿಸುವ ಮೂಲಕ ಸಾಲ ಪಡೆಯಬಹುದಾಗಿದೆ. ಹಾಗೆಯೇ, ಎಲ್ಐಸಿಯ ವೆಬ್ ಸೈಟ್ ಗೆ ತೆರಳುವ ಮೂಲಕವೂ ಅರ್ಜಿ ಸಲ್ಲಿಸಬಹುದಾಗಿದೆ. ಅರ್ಜಿ ಪರಿಶೀಲನೆಯಾಗಿ, ಮೂರ್ನಾಲ್ಕು ದಿನದಲ್ಲಿಯೇ ಸಾಲದ ಮೊತ್ತ ಕ್ರೆಡಿಟ್ ಆಗುತ್ತದೆ.

ಎರಡು ಪಾಸ್ಪೋರ್ಟ್ ಛಾಯಾಚಿತ್ರದೊಂದಿಗೆ ಅಪ್ಲಿಕೇಶನ್ ಫಾರ್ಮ್ ಅನ್ನು ನೀಡಬೇಕಾಗುತ್ತದೆ. ಪಾಲಿಸಿಯ ಮಾಹಿತಿ, ಆಧಾರ್ ಕಾರ್ಡ್, ಪಾಸ್ ಪೋರ್ಟ್, ವೋಟರ್ ಐಡಿ ಕಾರ್ಡ್, ಇತರೆ ಗುರುತಿನ ದಾಖಲೆ, ವಿಳಾಸದ ದಾಖಲೆ ಸೇರಿ ಹಲವು ಡಾಕ್ಯೂಮೆಂಟ್ ಗಳನ್ನು ನೀಡುವ ಮೂಲಕ ಸಾಲ ಪಡೆಯಬಹುದಾಗಿದೆ. ಮತ್ತಿನ್ಯಾಕೆ ತಡ, ಕೂಡಲೇ ಅರ್ಜಿ ಸಲ್ಲಿಸಿ, ಸಾಲ ಪಡೆಯಿರಿ. ಹಾಗೆಯೇ, ದುಡ್ಡು ಬಂದ ಕೂಡಲೇ ಪಾವತಿಸೋದನ್ನ ಮರೆಯದಿರಿ.