ಇಂದೋರ್: ಮೇಘಾಲಯದ ಹನಿಮೂನ್ ಮರ್ಡರ್ ಪ್ರಕರಣದಲ್ಲಿ ಪತಿಯನ್ನೇ ಕೊಂದಿರುವ ಆರೋಪ ಹೊತ್ತಿರುವ ಸೋನಮ್ ರಘುವಂಶಿ ಅವರು ತಾನು ಬೇರೆಯವರನ್ನು ಪ್ರೀತಿಸುತ್ತಿರುವುದಾಗಿ ಮದುವೆಗೆ ಮೊದಲೇ ಹೆತ್ತವರಿಗೆ ತಿಳಿಸಿದ್ದಳು ಎಂಬ ವಿಚಾರ ಬಹಿರಂಗವಾಗಿದೆ.
ನಾನು ರಾಜ್ ಕುಶ್ವಾಹಾನನ್ನು ಪ್ರೇಮಿಸುತ್ತಿದ್ದು, ಆತನನ್ನೇ ಮದುವೆಯಾಗಲು ಬಯಸುತ್ತಿದ್ದೇನೆ ಎಂದು ಆಕೆ ತಿಳಿಸಿದ್ದಳು ಎಂದು ಮೂಲಗಳು ತಿಳಿಸಿವೆ. ಅಷ್ಟೇ ಅಲ್ಲ ಆಘಾತಕಾರಿ ಸಂಗತಿಯೆಂದರೆ, “ನೀವೇನಾದರೂ ನನ್ನ ಮೇಲೆ ಒತ್ತಡ ಹಾಕಿದರೆ, ಒತ್ತಡಕ್ಕೆ ಮಣಿದು ನಾನು ರಘುವಂಶಿಯನ್ನು ಮದುವೆಯಾಗುತ್ತೇನೆ. ಆದರೆ, ಅದರ ಪರಿಣಾಮ ಏನಾಗುತ್ತದೆಂದು ನೀವು ಊಹಿಸಲೂ ಸಾಧ್ಯವಿಲ್ಲ. ಹಾಗೆನೇದರೂ ಆದರೆ ಅದಕ್ಕೆ ನಾನು ಜವಾಬ್ದಾರಿಯಲ್ಲ” ಎಂದು ಸೋನಮ್ ತನ್ನ ತಾಯಿಯ ಬಳಿ ಹೇಳಿಕೊಂಡಿದ್ದಳು ಎನ್ನಲಾಗಿದೆ.
ರಾಜಾ ರಘುವಂಶಿಯವರ ಹಿರಿಯ ಸಹೋದರ ವಿಪಿನ್ ರಘುವಂಶಿಯವರೇ ಈ ವಿಚಾರವನ್ನು ತಿಳಿಸಿದ್ದಾರೆ. ಸೋನಮ್ ತಾಯಿಗೆ ಮಗಳ ಲವ್ ಅಫೇರ್ ಬಗ್ಗೆ ತಿಳಿದಿತ್ತು. ಆದರೆ, ತಮ್ಮದೇ ಜಾತಿಯವನನ್ನು ಮದುವೆಯಾಗಬೇಕು ಎಂಬ ಕಾರಣಕ್ಕೆ ಸೋನಮ್ ಮೇಲೆ ಒತ್ತಡ ಹೇರಿ ಅವರು ಮಗಳನ್ನು ರಘುವಂಶಿಯೊಂದಿಗೆ ಮದುವೆ ಮಾಡಿಸಿದ್ದರು. ಹೀಗೆಂದು ಸೋನಮ್ ಕುಟುಂಬದ ಆಪ್ತರೊಬ್ಬರು ತಮ್ಮ ಬಳಿ ಹೇಳಿಕೊಂಡಿರುವುದಾಗಿ ವಿಪಿನ್ ತಿಳಿಸಿದ್ದಾರೆ.
ಮದುವೆಯಾದ ಬಳಿಕ ರಾಜಾ ರಘುವಂಶಿಗೆ ಏನಾದರೂ ಆದರೆ ಅದಕ್ಕೆ ನೀವೇ ಹೊಣೆ ಎಂದು ಸೋನಮ್ ತನ್ನ ತಾಯಿಗೆ ಎಚ್ಚರಿಕೆ ನೀಡಿದ್ದಳು.
ಆದರೆ, ಆಕೆಯ ತಾಯಿ, “ನೀನು ಯಾರನ್ನಾದರೂ ಲವ್ ಮಾಡು. ಆದರೆ ಮದುವೆ ಮಾತ್ರ ನಮ್ಮ ಜಾತಿಯವರನ್ನೇ ಆಗಬೇಕು” ಎಂದು ಹೇಳಿದ್ದರು.
ತಾಯಿಯ ಒತ್ತಡಕ್ಕೆ ಕೊನೆಗೂ ಮಣಿದ ಸೋನಮ್, ರಘುವಂಶಿಯನ್ನು ಮದುವೆಯಾಗಲು ಒಪ್ಪಿಗೆ ನೀಡಿದಳು. ಆದರೆ, ನನ್ನನ್ನು ಮದುವೆಯಾಗುವ ವ್ಯಕ್ತಿಗೆ ಏನಾಗಲಿದೆ ಎಂಬುದನ್ನು ನೀವು ನೋಡುತ್ತಿರಿ. ಈ ಒತ್ತಾಯದ ಪರಿಣಾಮವೇನೆಂದು ನಿಮಗೆಲ್ಲರಿಗೂ ತೋರಿಸಿಕೊಡುತ್ತೇನೆ ಎಂದೂ ಆಕೆ ಸವಾಲು ಹಾಕಿದ್ದಳಂತೆ. ಆದರೆ, ಆಕೆ ನನ್ನ ಅಣ್ಣನನ್ನು ಕೊಲ್ಲುವ ಮಟ್ಟಿಗೆ ಇಳಿಯುತ್ತಾಳೆಂದು ನಾವು ಯಾರೂ ಊಹಿಸಿರಲಿಲ್ಲ ಎಂದಿದ್ದಾರೆ ವಿಪಿನ್.
