ಚಿನ್ನ ಅಡವಿಟ್ಟು ಸಾಲ ಪಡೆಯೋ ಮುನ್ನ…

ಹೊಸ ಮನೆ ಕಟ್ಟಬೇಕು, ಮಗಳ ಹೈಯರ್ ಎಜುಕೇಷನ್ ಗೆ ದುಡ್ಡು ಬೇಕು, ಮಗಳ ಮದುವೆ ಮಾಡಬೇಕು, ಸೈಟ್ ಖರೀದಿಸಬೇಕು… ಹೀಗೆ ಯಾವ್ದೇ ತುರ್ತು ಪರಿಸ್ಥಿತಿ ಬಂದ್ರೆ, ನಾವು ಮೊದ್ಲು ಚಿನ್ನವನ್ನು ಅಡಮಾನ ಇಟ್ಟು ಸಾಲ ತೆಗೆದುಕೊಳ್ತೀವಿ. ಹೀಗೆ ತುರ್ತು ಸಂದರ್ಭದಲ್ಲಿ ಚಿನ್ನವನ್ನ ಅಡಮಾನ ಇಟ್ಟು ಸಾಲ ಪಡೆಯೋರಿಗೆ ಆರ್ ಬಿ ಐ ಸಿಹಿ ಸುದ್ದಿ ನೀಡಿದೆ. ಹಾಗಾದ್ರೆ, ಆರ್ ಬಿ ಐ ಹೊಸ ನಿಯಮಗಳು ಯಾವವು? ಇವುಗಳಿಂದ ನಮಗೆ ಹೇಗೆ ಅನುಕೂಲ? ಇದೇ ಇವೊತ್ತಿನ ಸ್ಪೆಷಲ್ ಸ್ಟೋರಿ.

ಚಿನ್ನದ ಅಡಮಾನಕ್ಕೆ ಇನ್ನು ಸಿಗತ್ತೆ 85% ಸಾಲ
ಎಲ್ ಟಿ ವಿ ಪ್ರಮಾಣ ಜಾಸ್ತಿ ಮಾಡಿದ ಆರ್ ಬಿ ಐ
ಹೊಸ ನಿಯಮಗಳಿಂದ ನಮಗೆ ಏನೆಲ್ಲ ಅನುಕೂಲ?

ಇದುವರೆಗೆ ಲೋನ್ ಟು ವ್ಯಾಲ್ಯೂ ಅಂದ್ರೆ, ನಾವು ಅಡಮಾನ ಇಡುವ ಚಿನ್ನದ ಒಟ್ಟು ಮೌಲ್ಯದ ಮೇಲೆ ಶೇ.75ರಷ್ಟು ಮೊತ್ತವನ್ನು ಸಾಲವಾಗಿ ನೀಡಲಾಗುತ್ತಿತ್ತು. ಆದರೆ, ಆರ್ ಬಿ ಐ ಇದನ್ನು ಶೇ.85ರಷ್ಟಕ್ಕೆ ಏರಿಕೆ ಮಾಡಿದೆ. ಇನ್ನುಮುಂದೆ ನಾವು ಒಂದು ಲಕ್ಷ ರೂ. ಮೌಲ್ಯದ ಚಿನ್ನವನ್ನು ಅಡಮಾನ ಇಟ್ಟರೆ, ನಮಗೆ ಸಾಲವಾಗಿ 85 ಸಾವಿರ ರೂ. ಸಾಲ ನೀಡಲಾಗುತ್ತದೆ. ಇದಕ್ಕೂ ಮೊದಲು 75 ಸಾವಿರ ರೂ. ಸಾಲ ನೀಡಲಾಗುತ್ತಿತ್ತು.

2.5 ಲಕ್ಷ ರೂ.ವರೆಗೆ ಕ್ರೆಡಿಟ್ ಸ್ಕೋರ್ ಬೇಕಾಗಿಲ್ಲ
ಗ್ರಾಮೀಣ ಭಾಗದ ಜನರಿಗೂ ಇದ್ರಿಂದ ಅನುಕೂಲ
ಯಾರಿಗೆಲ್ಲ ಹೊಸ ನಿಯಮಗಳು ಅನ್ವಯ ಗೊತ್ತಾ?

ಯಾವುದೇ ದಾಖಲೆ ಇಲ್ಲದೆ, ಕ್ರೆಡಿಟ್ ಸ್ಕೋರ್ ಬೇಕಾಗಿಲ್ಲದೆ, ಹೆಚ್ಚಿನ ತಲೆನೋವು ಇಲ್ಲದೆ, ಚಿನ್ನವನ್ನು ಅಡಮಾನ ಇಟ್ಟು ಸುಮಾರು 2.5 ಲಕ್ಷ ರೂ.ವರೆಗೆ ಸಾಲ ಪಡೆಯಬಹುದಾಗಿದೆ. ಇದರಿಂದಾಗಿ ಗ್ರಾಮೀಣ ಭಾಗದ ಜನರು ಸುಲಭವಾಗಿ ಸಾಲ ಪಡೆಯಬಹುದಾಗಿದೆ. ಹೊಸ ನಿಯಮಗಳು ಬ್ಯಾಂಕುಗಳು, ಬ್ಯಾಂಕೇತರ ಹಣಕಾಸು ಸಂಸ್ಥೆಗಳು, ಕೋ-ಆಪರೇಟಿವ್ ಬ್ಯಾಂಕುಗಳಿಗೆ ಆರ್ ಬಿ ಐ ನಿಯಮಗಳು ಅನ್ವಯವಾಗುತ್ತವೆ. ಇಲ್ಲೆಲ್ಲ ಗ್ರಾಹಕರು ಸುಲಭವಾಗಿ ಸಾಲ ಪಡೆಯಬಹುದಾಗಿದೆ.

ಯಾರು ಎಷ್ಟು ಬೇಕಾದ್ರೂ ಅಡಮಾನ ಇಡಬಹುದಾ?
ಇದಕ್ಕೂ ನಿಯಮಗಳನ್ನು ರೂಪಿಸಿದೆ ಆರ್ ಬಿ ಐ
ಇಷ್ಟೇ ಅಡಮಾನ ಇರಿಸಲು ಇವೆ ನಿಯಮಗಳು

ನಮ್ಮ ಬಳಿ ತುಂಬ ಚಿನ್ನ ಇದೆ, ಅದನ್ನು ಅಡಮಾನ ಇಟ್ಟು ಸಾಲ ಪಡೆಯುತ್ತೇನೆ ಎಂದರೆ, ನೀವು ತಿಳ್ಕೊಂಡಿರೋದು ತಪ್ಪು. ಚಿನ್ನಾಭರಣಗಳಾದರೆ ಗರಿಷ್ಠ ಒಂದು ಕೆ.ಜಿ, ಚಿನ್ನದ ನಾಣ್ಯಗಳಾದರೆ 50 ಗ್ರಾಂ, ಬೆಳ್ಳಿಯ ಆಭರಣಗಳಾದರೆ 10 ಕೆ.ಜಿ, ಬೆಳ್ಳಿಯ ನಾಣ್ಯಗಳಾದರೆ 500 ಗ್ರಾಂ ಮಾತ್ರ ಅಡಮಾನ ಇರಿಸಲು ಆರ್ ಬಿ ಐ ಅನುಮತಿ ನೀಡಿದೆ.

ಚಿನ್ನದ ಸಾಲ ಪಡೆಯೋರಿಗೆ ಈ ನಿಯಮ ಇಂಪಾರ್ಟಂಟ್
ಶೀಘ್ರದಲ್ಲೇ ಚಿನ್ನ ವಾಪಸ್ ಕೊಡದಿದ್ದರೆ ಹೀಗೆ ಮಾಡಿ
ಗ್ರಾಹಕರ ರಕ್ಷಣೆಗೆ ನಿಂತ ಕೇಂದ್ರೀಯ ಬ್ಯಾಂಕ್

ಅವಶ್ಯಕತೆ ಎಂದು ಚಿನ್ನವನ್ನು ಅಡಮಾನ ಇರಿಸುತ್ತೇವೆ. ನಮ್ಮ ಕಷ್ಟ ನೀಗಿದ ಬಳಿಕ ಸಾಲ ತೀರಿಸಿ, ಚಿನ್ನವನ್ನು ವಾಪಸ್ ಪಡೆಯುತ್ತೇವೆ. ಹೀಗೆ ಸಾಲ ತೀರಿಸಿದ ಒಂದು ವಾರದೊಳಗೆ ಬ್ಯಾಂಕುಗಳು ಅಡಮಾನ ಇರಿಸಿದ ಚಿನ್ನವನ್ನು ವಾಪಸ್ ನೀಡಬೇಕು. ಹಾಗೊಂದು ವೇಳೆ, ನೀಡದಿದ್ದರೆ ಮೇಲಧಿಕಾರಿಗಳ ಗಮನಕ್ಕೆ ತರಬೇಕು. ಹಾಗೆಯೇ, ಗ್ರಾಹಕರಿಗೆ 5 ಸಾವಿರ ರೂ. ಪರಿಹಾರ ನೀಡಬೇಕು ಎಂದೂ ಆರ್ ಬಿ ಐ ತಿಳಿಸಿದೆ.

ಅಷ್ಟೇ ಅಲ್ಲ, ಅಡವಿಟ್ಟ ಚಿನ್ನ ಅಥವಾ ಬೆಳ್ಳಿಯು ಸಾಲ ತೀರಿಸಿದ ನಂತರ ಗ್ರಾಹಕರಿಗೆ ವಾಪಸ್ ಕೊಡುವ ವೇಳೆ ಅವುಗಳು ಮೊದಲಿನ ಸ್ಥಿತಿಯಲ್ಲೇ ಇವೆಯೇ ಎಂಬುದನ್ನು ಗ್ರಾಹಕರು ಪರಿಶೀಲನೆ ಮಾಡಿಕೊಳ್ಳಬೇಕು. ಸಂಪೂರ್ಣ ಹಾನಿ ಅಥವಾ ಡ್ಯಾಮೇಜ್ ಆದರೆ, ಬ್ಯಾಂಕುಗಳೇ ಪೂರ್ಣ ಪರಿಹಾರ ನೀಡಬೇಕು ಎಂದು ಆರ್ ಬಿ ಐ ತಿಳಿಸಿದೆ. ಹಾಗಾಗಿ, ಆರ್ ಬಿ ಐ ಹೊಸ ನಿಯಮಗಳು ಗ್ರಾಹಕರಿಗೆ ಪೂರಕವಾಗಿವೆ.
ಚಿನ್ನದ ಬೆಲೆ ದಿನೇದಿನೆ ಜಾಸ್ತಿ ಆಗ್ತಿರೋದ್ರಿಂದ ಗೋಲ್ಡ್ ಮೇಲೆ ಹೂಡಿಕೆ ಮಾಡುವವರ ಪ್ರಮಾಣ ಜಾಸ್ತಿಯಾಗಿದೆ. ಆಭರಣ, ಬಿಸ್ಕತ್, ಕಾಯಿನ್ ಗಳನ್ನು ಖರೀದಿಸಿ, ಹೂಡಿಕೆ ಮಾಡಲಾಗುತ್ತಿದೆ. ಹಾಗಂತ, ಚಿನ್ನದ ಮೇಲೆ ಹೂಡಿಕೆ ಮಾಡೋದು ಅಂದ್ರೆ, ಚಿನ್ನ ಖರೀದಿ ಅಷ್ಟೇ ಅಲ್ಲ. ಗೋಲ್ಡ್ ಇಟಿಎಫ್ ಗಳ ಮೇಲೆ ಹೂಡಿಕೆ ಮಾಡಿಯೂ ಉತ್ತಮ ರಿಟರ್ನ್ಸ್ ಪಡೆಯಬಹುದಾಗಿದೆ. ಹಾಗಾದ್ರೆ ಏನಿದು ಗೋಲ್ಡ್ ಇಟಿಎಫ್? ಇದೇ ಇವತ್ತಿನ ವಿಶೇಷ ಸ್ಟೋರಿ.

ಏನಿದು ಗೋಲ್ಡ್ ಇಟಿಎಫ್ ಹೂಡಿಕೆ?
ಇದರ ಮೇಲೆ ಹೂಡಿಕೆ ಮಾಡುವುದು ಏಕೆ?
ಇತ್ತೀಚೆಗೆ ಇದು ಎಷ್ಟು ರಿಟರ್ನ್ಸ್ ನೀಡಿದೆ?

ಗೋಲ್ಡ್ ಇಟಿಎಫ್ ನ ವಿಸ್ತೃತ ರೂಪ ಎಂದರೆ ಗೋಲ್ಡ್ ಎಕ್ಸ್ ಚೇಂಜ್ ಟ್ರೇಡೆಡ್ ಫಂಡ್ ಆಗಿದೆ. ಷೇರು ಮಾರುಕಟ್ಟೆಯಲ್ಲಿ ಕಂಪನಿಗಳ ಷೇರುಗಳನ್ನು ಖರೀದಿಸಿದ ರೀತಿಯಲ್ಲೇ ಗೋಲ್ಡ್ ಇಟಿಎಫ್ ಗಳನ್ನು ಖರೀದಿಸಬಹುದಾಗಿದೆ. ಒಂದು ಗೋಲ್ಡ್ ಇಟಿಎಫ್ ಎಂದರೆ ಒಂದು ಗ್ರಾಂ ಚಿನ್ನಕ್ಕೆ ಸಮ ಆಗಿದೆ. ಹೆಚ್ಚು ಯೂನಿಟ್ ಗಳನ್ನು ಕೂಡ ಖರೀದಿಸಬಹುದಾಗಿದೆ. ಇಲ್ಲಿ, ಭೌತಿಕ ಚಿನ್ನ ಇರುವುದಿಲ್ಲ. ಹೂಡಿಕೆ ಲೆಕ್ಕಾಚಾರಕ್ಕಾಗಿ ಇಟಿಎಫ್ ಗಳನ್ನು ಲೆಕ್ಕ ಹಾಕಲಾಗುತ್ತದೆ.

ಚಿನ್ನದ ಮೇಲೆ ಹೂಡಿಕೆ ಮಾಡೋದಿಕ್ಕೂ, ಗೋಲ್ಡ್ ಇಟಿಎಫ್ ಗಳ ಮೇಲೆ ಹೂಡಿಕೆ ಮಾಡೋದಿಕ್ಕೂ ಸಾಮ್ಯತೆಗಳಿವೆ. ಚಿನ್ನದ ಬೆಲೆ ಏರಿಕೆಯಾದಂತೆಲ್ಲ ಗೋಲ್ಡ್ ಇಟಿಎಫ್ ಗಳ ಬೆಲೆಯೂ ಜಾಸ್ತಿಯಾಗತ್ತೆ. ಬೆಲೆ ಕುಸಿದರೆ, ಇವುಗಳ ಬೆಲೆಯೂ ಕುಸಿಯುತ್ತೆ. ಹಾಗಾಗಿ, ಗೋಲ್ಡ್ ಇಟಿಎಫ್ ಗಳ ಮೇಲೆ ಹೂಡಿಕೆ ಮಾಡೋದು ಅಂದ್ರೆ, ಚಿನ್ನದ ಮೇಲೆ ಹೂಡಿಕೆ ಮಾಡಿದ ಹಾಗೆಯೇ. ಕಳೆದ 3 ವರ್ಷಗಳಲ್ಲಿ ಗೋಲ್ಡ್ ಇಟಿಎಫ್ ಮೇಲಿನ ಹೂಡಿಕೆಯು ಶೇ.21ರಷ್ಟು ರಿಟರ್ನ್ಸ್ ನೀಡಿದೆ.

ಗೋಲ್ಡ್ ಇಟಿಎಫ್ ಕಂಪನಿಗಳು ಯಾವುವು?
ಯಾವ ಇಟಿಎಫ್ ಗಳು ಹೆಚ್ಚು ಖ್ಯಾತಿ ಗಳಿಸಿವೆ?
ಇದಕ್ಕೆ ತೆರಿಗೆ ಅನ್ವಯ ಆಗತ್ತಾ?

ಮಾರುಕಟ್ಟೆಯಲ್ಲಿ ನೂರಾರು ಗೋಲ್ಡ್ ಇಟಿಎಫ್ ಗಳಿವೆ. ಹೆಚ್ಚು ಪ್ರಸಿದ್ಧಿ ಗಳಿಸಿದ ಗೋಲ್ಡ್ ಇಟಿಎಫ್ ಕಂಪನಿಗಳ ಹೆಸರು ತೆಗೆದುಕೊಳ್ಳೋದಾದ್ರೆ ಹತ್ತಾರಿವೆ. ಜೆರೋಧಾ ಗೋಲ್ಡ್ ಇಟಿಎಫ್, ನಿಪ್ಪಾನ್ ಇಂಡಿಯಾ ಇಟಿಎಫ್ ಗೋಲ್ಡ್ ಬೀಸ್, ಐಸಿಐಸಿಐ ಪ್ರುಡೆನ್ಶಿಯಲ್ ಗೋಲ್ಡ್ ಇಟಿಎಫ್ ಉದಾಹರಣೆಯಾಗಿವೆ. ಒಂದು ವರ್ಷಕ್ಕಿಂತ ಹೆಚ್ಚಿನ ಅವಧಿಗೆ ಹೂಡಿಕೆ ಮಾಡಿ, ಬಳಿಕ ಮಾರಾಟ ಮಾಡಿದರೆ ಶೇ.12.5ರಷ್ಟು ಎಲ್ ಟಿ ಸಿ ಜಿ ತೆರಿಗೆ ಅನ್ವಯವಾಗತ್ತೆ.

ಕಡಿಮೆ ಮೊತ್ತದಿಂದಲೂ ಹೂಡಿಕೆ ಸಾಧ್ಯ
ಇದಕ್ಕೆ ಬೇಕಾಗಿಲ್ಲ ಡಿಮ್ಯಾಟ್ ಖಾತೆ
ಹಣ ನಗದೀಕರಣವೂ ಈಗ ಸುಲಭ

ಗೋಲ್ಡ್ ಇಟಿಎಫ್ ಗಳಿಗೆ ಟಿಮ್ಯಾಟ್ ಖಾತೆಯ ಅಗತ್ಯವೇ ಇರುವುದಿಲ್ಲ. ಅಲ್ಲದೆ, 85-90 ರೂಪಾಯಿಯಿಂದ ಗೋಲ್ಡ್ ಇಟಿಎಫ್ ಗಳನ್ನು ಖರೀದಿಸಬಹುದಾಗಿದೆ. ಷೇರು ಮಾರುಕಟ್ಟೆ ಚಾಲ್ತಿಯ ವೇಳೆಯೇ ಗೋಲ್ಡ್ ಇಟಿಎಫ್ ಗಳನ್ನು ಮಾರಾಟ ಮಾಡಬಹುದಾದ ಕಾರಣ ಅಗತ್ಯ ಸಮಯದಲ್ಲಿ ಹಣಕ್ಕಾಗಿ ಮಾರಾಟ ಮಾಡಿ, ಕ್ಷಿಪ್ರವಾಗಿ ಹಣ ಪಡೆಯಬಹುದಾಗಿದೆ. ಗೋಲ್ಡ್ ಇಟಿಎಫ್ ಗಳ ಮಾರಾಟದ ವೆಚ್ಚ ಅನುಪಾತ ಅಥವಾ ಎಕ್ಸ್ ಪ್ರೆನ್ಸ್ ರೇಶಿಯೋ ಕೂಡ ಶೇ.0.30ರಿಂದ ಶೇ.1ರಷ್ಟು ಇರುತ್ತದೆ. ಹಾಗಾಗಿ, ಮಾರಾಟ ಮಾಡಿದಾಗ ಹೆಚ್ಚಿನ ಶುಲ್ಕ ಪಾವತಿಸೋ ಅಗತ್ಯ ಇರೋದಿಲ್ಲ.

ಚಿನ್ನದ ಮೇಲಿನ ಹೂಡಿಕೆಯೂ ಬಂಪರ್
ಒಂದು ವರ್ಷದಲ್ಲಿ ಶೇ.30ರಷ್ಟು ರಿಟರ್ನ್ಸ್
ಬೆಲೆಯೇರಿಕೆಯೇ ಹೂಡಿಕೆಗೆ ವರದಾನ

ಭೌತಿಕ ಚಿನ್ನ ಖರೀದಿಯೂ ಹೂಡಿಕೆಯ ದೃಷ್ಟಿಯಿಂದ ಇತ್ತೀಚೆಗೆ ಲಾಭದಾಯಕವಾಗಿದೆ. ಅದರಲ್ಲೂ, ಚಿನ್ನದ ಬೆಲೆಯು 10 ಗ್ರಾಂಗೆ 95 ಸಾವಿರ ರೂಪಾಯಿ ಆಸುಪಾಸು ಇದೆ. ಇದರಿಂದಾಗಿ ಚಿನ್ನ ಖರೀದಿಯೂ ಉತ್ತಮ ಹೂಡಿಕೆಯಾಗಿದೆ. ಅದರಲ್ಲೂ, ಚಿನ್ನವು ಕಳೆದ ಒಂದು ವರ್ಷದಲ್ಲಿ ಶೇ.30ರಷ್ಟು ರಿಟರ್ನ್ಸ್ ನೀಡಿದೆ. ಇದರಿಂದಾಗಿ ಚಿನ್ನ ಖರೀದಿಯು ಯಾವಾಗಲೂ ಸುರಕ್ಷತೆಯ ಹೂಡಿಕೆಯಾಗಿದೆ.

ಚಿನ್ನದ ಆಭರಣಗಳಿಗಿಂತ ಬಿಸ್ಕೆಟ್, ಕಾಯಿನ್ ರೂಪದಲ್ಲಿ ಚಿನ್ನ ಖರೀದಿಯು ಉತ್ತಮ ಎಂಬುದು ತಜ್ಞರ ಅಂಬೋಣವಾಗಿದೆ. ಆಭರಣ ಖರೀದಿಯಾದರೆ ಮೇಕಿಂಗ್ ಚಾರ್ಜ್, ವೇಸ್ಟೇಜ್ ಎಂದು ಹಲವು ಶುಲ್ಕಗಳು ಎದುರಾಗುತ್ತವೆ. ಇವು ಮಾರಾಟ ಮಾಡುವಾಗಲೂ ಹೆಚ್ಚಿನ ಶುಲ್ಕ ಕಡಿತಕ್ಕೆ ಕಾರಣವಾಗುತ್ತವೆ. ಹಾಗಾಗಿ, ಬಿಸ್ಕಟ್, ಕಾಯಿನ್ ಗಳ ರೂಪದಲ್ಲಿ ಚಿನ್ನವನ್ನು ಖರೀದಿಸುವುದು ಉತ್ತಮವಾಗಿದೆ.

ಗಮನಿಸಿ: ಗೋಲ್ಡ್ ಇಟಿಎಫ್ ಗಳ ರಿಟರ್ನ್ಸ್ ಮಾರುಕಟ್ಟೆ ಆಧಾರಿತವಾಗಿರುತ್ತದೆ. ಇದರಲ್ಲಿ ರಿಸ್ಕ್ ಕೂಡ ಇರುತ್ತದೆ. ನಿಮಗೆ ಹೂಡಿಕೆ ಕುರಿತು ಮಾಹಿತಿ ನೀಡುವುದಷ್ಟೇ ನಮ್ಮ ಉದ್ದೇಶ. ಹಾಗಾಗಿ, ಯಾವುದೇ ಮಾದರಿಯ ಹೂಡಿಕೆಗೂ ಮೊದಲು ತಜ್ಞರ ಸಲಹೆಗಳನ್ನು ಪಡೆಯುವುದು ಮರೆಯದಿರಿ.