ನವದೆಹಲಿ: ಕಾಶ್ಮೀರದ ಪಹಲ್ಗಾಮ್‌ನಲ್ಲಿ ಪ್ರವಾಸಿಗರನ್ನು ಗುರಿಯಾಗಿಸಿಕೊಂಡು ನಡೆದ ದಾಳಿ ಮತ್ತು 26 ಪ್ರವಾಸಿಗರ ಹತ್ಯೆ ಘಟನೆಯು ಭಾರತ-ಪಾಕಿಸ್ತಾನದ ಸಂಬಂಧವನ್ನು ಮತ್ತಷ್ಟು ಹದಗೆಡಿಸಿರುವಂತೆಯೇ, ಮಹಿರಾ ಖಾನ್, ಹನಿಯಾ ಅಮೀರ್ ಮತ್ತು ಅಲಿ ಜಾಫರ್ ಸೇರಿದಂತೆ ಪಾಕಿಸ್ತಾನದ ಜನಪ್ರಿಯ ಸಿನಿಮಾ ತಾರೆಯರ ಇನ್ ಸ್ಟಾಗ್ರಾಂ ಖಾತೆಗಳನ್ನೂ ಭಾರತದಲ್ಲಿ ನಿರ್ಬಂಧಿಸಲಾಗಿದೆ.
ಪ್ರಚೋದನಕಾರಿ ಮತ್ತು ಕೋಮು ಸೂಕ್ಷ್ಮ ವಿಷಯವನ್ನು ಹರಡಿದ್ದಕ್ಕಾಗಿ 16 ಪಾಕಿಸ್ತಾನಿ ಯೂಟ್ಯೂಬ್ ಚಾನೆಲ್ ಗಳನ್ನು ಭಾರತ ಸರ್ಕಾರ ನಿಷೇಧಿಸಿದ ಬೆನ್ನಲ್ಲೇ ಈ ಬೆಳವಣಿಗೆ ನಡೆದಿದೆ. ತಮ್ಮ ಸಾಮಾಜಿಕ ಜಾಲತಾಣ ಖಾತೆಗಳು ಸ್ಥಗಿತಗೊಂಡಿರುವ ವಿಚಾರವನ್ನು ಸ್ವತಃ ತಾರೆಯರೂ ಬಹಿರಂಗಪಡಿಸಿದ್ದಾರೆ..
ಪಾಕಿಸ್ತಾನಿ ನಾಟಕಗಳಾದ “ಮೇರೆ ಹಮ್ಸಫರ್” ಮತ್ತು “ಕಭಿ ಮೈ ಕಭಿ ತುಮ್” ಮೂಲಕ ಭಾರತದಲ್ಲಿ ಭಾರೀ ಸಂಖ್ಯೆಯ ಅಭಿಮಾನಿಗಳನ್ನು ಗಳಿಸಿದ್ದ, ಜನಪ್ರಿಯ ನಟಿ ಹನಿಯಾ ಅಮೀರ್ ಅವರ ಇನ್ ಸ್ಟಾ ಖಾತೆಗೂ ನಿರ್ಬಂಧ ಹೇರಲಾಗಿದೆ. ಇವರು, ಪಹಲ್ಗಾಮ್ ದಾಳಿಯ ಬಗ್ಗೆ ಇತ್ತೀಚೆಗೆ ಪ್ರತಿಕ್ರಿಯಿಸುತ್ತಾ, “ದುರಂತ ಎಲ್ಲೇ ನಡೆದರೂ ಅದು ದುರಂತವೇ. ಅದು ಎಲ್ಲರಿಗೂ ನೋವು ತರುತ್ತದೆ” ಎಂದು ಬರೆದುಕೊಂಡಿದ್ದರು.
“ಪಹಲ್ಗಾಮ್ ಘಟನೆಯಿಂದ ನೋವುಂಡವರ ಕುಟುಂಬಗಳಿಗಾಗಿ ನನ್ನ ಹೃದಯ ಬಡಿಯುತ್ತಿದೆ. ನೋವಿನಲ್ಲಿ, ದುಃಖದಲ್ಲಿ ಮತ್ತು ಭರವಸೆಯಲ್ಲಿ ನಾವು ಒಂದಾಗಿದ್ದೇವೆ. ಮುಗ್ಧ ಜೀವಗಳು ಪ್ರಾಣ ಕಳೆದುಕೊಂಡಾಗ, ಆ ವೇದನೆ ಅವರದ್ದಷ್ಟೇ ಅಲ್ಲ, ಅದು ನಮ್ಮೆಲ್ಲರದ್ದೂ ಆಗಿದೆ. ನಾವು ಎಲ್ಲಿಂದ ಬಂದಿದ್ದೇವೆ ಎನ್ನುವುದು ಮುಖ್ಯವಲ್ಲ, ವೇದನೆಗೆ ಇರುವುದು ಒಂದೇ ಭಾಷೆ. ನಾವು ಯಾವತ್ತಿದ್ದರೂ ಮಾನವೀಯತೆಯನ್ನೇ ಆಯ್ಕೆ ಮಾಡಿಕೊಳ್ಳಬೇಕಿದೆ” ಎಂದು ಅವರು ಹೇಳಿದ್ದರು.
ಮಹಿರಾ ಖಾನ್ ಅವರು 2017ರಲ್ಲಿ ಶಾರುಖ್ ಖಾನ್ ಅಭಿನಯದ ರಯೀಸ್ ಚಿತ್ರದ ಮೂಲಕ ಬಾಲಿವುಡ್ ಗೆ ಪ್ರವೇಶ ಪಡೆದಿದ್ದರು.
2016 ರಲ್ಲಿ ಜಮ್ಮು ಮತ್ತು ಕಾಶ್ಮೀರದ ಉರಿಯಲ್ಲಿರುವ ಭಾರತೀಯ ಸೇನಾ ನೆಲೆಯ ಮೇಲೆ ಭಯೋತ್ಪಾದಕರು ದಾಳಿ ನಡೆಸಿದ ನಂತರ ಯಾವುದೇ ಪಾಕಿಸ್ತಾನಿ ನಟ-ನಟಿಯರು ಭಾರತೀಯ ಚಲನಚಿತ್ರೋದ್ಯಮದಲ್ಲಿ ಕೆಲಸ ಮಾಡಿಲ್ಲ.
