ಈಗ ಐಪಿಎಲ್ ಅಬ್ಬರ ಎಲ್ಲೆಡೆ ತಾರಕಕ್ಕೇರಿದೆ. ಅಂಗೈಯಲ್ಲೇ ಕ್ರಿಕೆಟ್ ದುನಿಯಾದ ಆರ್ಭಟವನ್ನು ಕಣ್ತುಂಬಿಕೊಳ್ತಿದ್ದೇವೆ. ಮೊಬೈಲ್ ಡಾಟಾ ಸ್ಪೀಡ್ ನ ಮನ್ವಂತರವೇ ಇವತ್ತು ನಾವುಗಳೆಲ್ಲಾ ಎಲ್ಲೇ ಇದ್ದರೂ ಜಗತ್ತನ್ನೇ ತುದಿಬೆರಳಲ್ಲಿ ಕಣ್ಣಾಡಿಸಬಹುದಾಗಿದೆ. ಅದಕ್ಕೆಲ್ಲಾ ಕಾರಣ ಈ 5ಜಿ. ಭಾರತದಲ್ಲಿ ಈಗಾಗಲೇ 5ಜಿ ಎಲ್ಲೆಡೆ ತನ್ನ ಕಬಂಧ ಬಾಹುಗಳನ್ನು ಚಾಚಿಯಾಗಿದೆ. ಅಷ್ಟೇ ಅಲ್ಲಾ ಈಗಾಗಲೇ 6ಜಿ ಕಾರ್ಯಾರಂಭಕ್ಕೂ ನೀಲನಕ್ಷೆ ಸಿದ್ಧವಾಗುತ್ತಿದೆ. ಆದರೆ, ಸದಾ ಆವಿಷ್ಕಾರಗಳಲ್ಲಿ ಒಂದು ಹೆಜ್ಜೆ ಮುಂದಿರುವ ಚೀನಾ, ಜಗತ್ತೇ ನಿಬ್ಬೆರಗಾಗುವಂಥಾ ಸಾಧನೆ ಮಾಡಿದೆ.
ಚೀನಾದಲ್ಲಿ ಶುರುವಾಯ್ತು 10ಜಿ ಸೇವೆ
ಅಚ್ಚರಿಯಾದರೂ ಇದು ಸತ್ಯ. 2ಜಿ ಯುಗದಿಂದ 5ಜಿ ಯುಗಕ್ಕೆ ಶಿಫ್ಟ್ ಆದವರಿಗೆ ಅದರ ವೇಗದ ಅರಿವಿದೆ. ಭಾರತೀಯರಿಗಂತೂ ಈ 5ಜಿ ಕಾರ್ಯಾರಂಭದ ಬೆನ್ನಲ್ಲೇ ಬಯಸಿದ್ದೆಲ್ಲಾ ಅಂಗೈಯಲ್ಲೇ ಲಭ್ಯವಿದೆ. ಆದರೆ 5ಜಿನೇ ಆ ಪಾಟಿ ವೇಗದಲ್ಲಿದೆ ಅಂತಿರೋ ನಾವುಗಳು ಇನ್ನು 10 ಜಿ ಕತೆ ಇನ್ನೇನಪ್ಪಾ ಅನ್ನಬಹುದು. ಆದರೆ, ಚೀನಾ ಮಾತ್ರ ಇದನ್ನು ಸಾಧಿಸಿ ತೋರಿಸಿದೆ. ಹುವೈ ಮತ್ತು ಚೀನಾ ಯುನಿಕಾರ್ನ್ ಸಂಸ್ಥೆಗಳು ಜಂಟಿಯಾಗಿ 10ಜಿ ಸೇವೆಯನ್ನು ಆರಂಭಿಸಿದ್ದು, ಹಬೈ ಪ್ರಾಂತದ ಸುನನ್ ಕೌಂಟಿಯಲ್ಲಿ ಮೊದಲ ಬಾರಿಗೆ 10 ಜಿ ಸೇವೆಯನ್ನು ಪರಿಚಯಿಸಿದೆ.
1000 ಎಂಬಿಪಿಎಸ್ ವೇಗದಲ್ಲಿ ಡೌನ್ ಲೋಡ್
ಇನ್ನು ಚೀನಾದ ಈ 10 ಜಿ ಸೇವೆ ಅಲ್ಲಿನ ಯುವ ಜನತೆಯಲ್ಲಿ ಹೊಸ ಕ್ರೇಜ್ ಕ್ರಿಯೇಟ್ ಮಾಡಿದೆ. ಭಾರತದಲ್ಲಿ ಇಂಟರ್ ನೆಟ್ 100 ಎಂಬಿಪಿಎಸ್ ವೇಗ ಹೊಂದಿದೆ ಅದೇ 10ಜಿಯ ವೇಗ ಸಾವಿರ ಎಂಬಿಪಿಎಸ್ ಆಗಿದೆ. 2 ಗಂಟೆಗಳ ಒಂದು ಸಿನಿಮಾ ಡೌನ್ ಲೋಡ್ ಆಗಲು ಕೇವಲ ಒಂದು ನಿಮಿಷ ತೆಗೆದುಕೊಳ್ತಿದೆ. ಹೀಗಾಗಿ ಶೀಘ್ರವೇ ಚೀನಾದ ಈ ಪ್ರಯೋಗ ಸಾಕಾರಗೊಂಡು ಜಗತ್ತಿನೆಲ್ಲೆಡೆ 10ಜಿ ಸೇವೆ ಲಭ್ಯವಾದ್ರೆ ಮತ್ತಷ್ಟು ಹೊಸತುಗಳಿಗೆ ನಾಂದಿಯಾಗಬಹುದಾಗಿದೆ.
