ಡಾ. ರಾಜ್ ಕುಮಾರ್ ಮೊಮ್ಮಕ್ಕಳು ಚಿತ್ರರಂಗದಲ್ಲಿ ಸದ್ದು ಮಾಡಲು ಸಾಲು-ಸಾಲಾಗಿ ನಿಂತು ಸಾಹಸ ಮಾಡುತ್ತಿದ್ದಾರೆ. ಅದರಲ್ಲಿ ಸ್ವಲ್ಪ ಮಟ್ಟಿಗೆ ಯಶಸ್ಸು ಕಂಡಿದ್ದು, “ಯುವರಾಜ್ ಕುಮಾರ್” ಮಾತ್ರ. ಇತ್ತೀಚೆಗೆ ತೆರೆಕಂಡಿದ್ದ “ಯುವ” ಚಿತ್ರದಲ್ಲಿ ಈ ರಾಜ್ ಕುಡಿ ಯುವರಾಜ್ ಒಂದು ಮಟ್ಟಿಗೆ “ಪವರ್” ತೋರಿಸಿದ್ದರು. ಇನ್ನೊಂದಷ್ಟು ತಯಾರಿ ಪಡೆದು ಬಂದು ತೆರೆಯಲ್ಲಿ ನಿಂತರೇ, ದೊಡ್ಮನೆ ಅಭಿಮಾನಿಗಳ ಪಾಲಿಗೆ ಮತ್ತೊಬ್ಬ ಹೀರೋ ದೊರೆತಂತೆಯೇ. ಎಸ್! ಯುವ ಚಿತ್ರ ಆ ಮಟ್ಟಿಗಿನ ಭರವಸೆಯಂತೂ ಮೂಡಿಸಿದೆ. ಈ ಯಶಸ್ಸನ್ನು ದೂರದಿಂದಲೇ ಕಂಡ ಇನ್ನೊಬ್ಬ ರಾಜ್ ಕುಟುಂಬದ ನಟ “ಧೀರೇನ್ ರಾಮ್ ಕುಮಾರ್” ತನ್ನ ಹೆಸರು ಬದಲಿಸಿಕೊಂಡು ಅದೃಷ್ಟ ಪರೀಕ್ಷೆಗಿಳಿದಿದ್ದಾರೆ.
“ಶಿವ 143” ಎಂಬ ರಿಮೇಕ್ ಚಿತ್ರದ ಮೂಲಕ ಚಿತ್ರರಂಗಕ್ಕೆ ಭರ್ಜರಿ ಎಂಟ್ರಿಯನ್ನೇ ಬಯಸಿದ್ದ ಧೀರೇನ್ ಗೆ, ಅಂದುಕೊಂಡ ಮಟ್ಟಕ್ಕೆ ಯಶಸ್ಸು ದೊರಕಿರಲಿಲ್ಲ. ಸಿನಿಮಾ ಅಂದಕೊಂಡ ಮಟ್ಟಕ್ಕೆ ಹೋಗಲಿಲ್ಲ. ಇದೀಗ ಈ ನಟನಿಗೆ “ಕೆಆರ್ ಜಿ ಸ್ಟುಡಿಯೋ” ದವರು ಸಾಥ್ ನೀಡುವ ಮೂಲಕ ಭರವಸೆ ಮೂಡಿಸಿದ್ದಾರೆ. ಕರ್ನಾಟಕದ ಹೆಸರಾಂತ ನಿರ್ಮಾಣ ಸಂಸ್ಥೆಯಾದ “ಹೊಂಬಾಳೆ ಫಿಲಂಸ್” ನೆರಳಿನಲ್ಲೇ ಇರುವ ಈ “ಕೆಆರ್ ಜಿ ಸ್ಟುಡಿಯೋ”, ಚಿತ್ರದ ನಿರ್ಮಾಣ ಮತ್ತು ವಿತರಣೆಯಲ್ಲಿ ದೊಡ್ಡ ಸ್ಥಾನದಲ್ಲಿರುವವರು. ಈ ಸಂಸ್ಥೆಯ ಕಾರ್ತಿಕ್
ಗೌಡ ಮತ್ತು ಯೋಗಿ ಜಿ ರಾಜ್ ನಿರ್ಮಾಣದಲ್ಲಿ ಧೀರೇನ್ ಗೊಂದು ಸಿನಿಮಾ ತಯಾರಿಗೊಂದು ಗ್ರೀನ್ ಸಿಗ್ನಲ್ ಸಿಕ್ಕಿದ್ದು, ನಟ ದಿಲ್ಖುಷ್ ಆಗಿದ್ದಾರೆ. ಈ ಬೆಳವಣಿಗೆಯಲ್ಲೇ ನಟ ತನ್ನ ಹೆಸರು ಬದಲಿಸಿಕೊಂಡು “ರೀ ಎಂಟ್ರಿ”ಗೆ ರೆಡಿಯಾಗಿದ್ದಾರೆ.
ಈ ಹಿಂದೆ ಅಪ್ಪನ ಹೆಸರು ಸೇರಿಸಿಕೊಂಡು “ಧೀರೇನ್ ರಾಮ್ ಕುಮಾರ್” ಎಂದಿದ್ದ ತನ್ನ ಹೆಸರನ್ನು ಬದಲಿಸಿ, ಧೀರೇನ್ “ರಾಜ್ ಕುಮಾರ್” ಎಂದಿರಿಸಿಕೊಂಡಿದ್ದಾರೆ. ಆ ಮೂಲಕ ಅಪ್ಪನನ್ನು (ರಾಮ್ ಕುಮಾರ್) ಬದಿಗಿರಿಸಿ, ತಾತನನ್ನು (ರಾಜ್ ಕುಮಾರ್) ಮುಂದಿರಿಸಿಕೊಂಡು ಯಶಸ್ಸಿನ ಬೆನ್ನು ಹತ್ತಿದ್ದಾರೆ. ಚಿತ್ರಕ್ಕೆ ಸಂಬಂಧ ಪಟ್ಟ ಬೆಳವಣಿಗೆಗಳು ಇನ್ನಷ್ಟೇ ತಿಳಿಯಬೇಕಿದ್ದು, ಧೀರೇನ್ ರಾಜ್ ಕುಮಾರ್ ಚಿತ್ರದ ತಯಾರಿಯಲ್ಲಿ ತೊಡಗಿಸಿಕೊಂಡಿದ್ದಾರೆ.
